ନୂଆଦିଲ୍ଲୀ:ଆସନ୍ତାକାଲି ନୂତନ ସଂସଦ ଭବନରେ ହେବାକୁ ଥିବା ସ୍ବତନ୍ତ୍ର ଅଧିବେଶନର ଦ୍ବିତୀୟ କାର୍ଯ୍ୟଦିବସରେ ପ୍ରଥମ ବିଲ୍ ଭାବେ ଆଗତ ହେବ ବହୁଚର୍ଚ୍ଚିତ ତଥା ପ୍ରତୀକ୍ଷିତ ମହିଳା ସଂରକ୍ଷଣ ବିଲ୍ । ଲୋକସଭା ତଥା ରାଜ୍ୟସଭାରେ ମହିଳାଙ୍କ ପାଇଁ ମୋଟ ଆସନର 33ପ୍ରତିଶତ ସିଟ୍ ସଂରକ୍ଷଣ ସୁନିଶ୍ଚିତ କରିବାକୁ ଆସିବାକୁ ଯାଉଥିବା ଏହି ବିଲ୍କୁ ଆଜି ସଂଧ୍ୟାରେ ବସିଥିବା କେନ୍ଦ୍ର କ୍ୟାବିନେଟ ବୈଠକରେ ମଞ୍ଜୁରୀ ମିଳିଥିବା ସୂଚନା ମିଳିଛି । ତେଣୁ ଆସନ୍ତାକାଲି ଏହା ଲୋକସଭାରେ ଆଗତ ହେବା ନେଇ ଏକପ୍ରକାର ପଥ ପରିଷ୍କାର ହୋଇଛି ।
ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ସଂଧ୍ୟାରେ ଆରମ୍ଭ ହୋଇଥିଲା କେନ୍ଦ୍ର କ୍ୟାବିନେଟର ବୈଠକ । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ଗୃହମନ୍ତ୍ରୀ ଅମିତ ଶାହ, ବାଣିଜ୍ୟ ଓ ଉଦ୍ୟୋଗ ମନ୍ତ୍ରୀ ପୀୟୁଷ ଗୋୟଲ ଏବଂ ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀଙ୍କ ସମେତ ତମାମ କେନ୍ଦ୍ର ମନ୍ତ୍ରୀମାନେ ଏହି ବୈଠକରେ ଅଂଶଗ୍ରହଣ କରିଥିଲେ । ତେବେ ପୂର୍ବରୁ ଆଜି ସଂସଦର ନିମ୍ନ ସଦନକୁ ସମ୍ବୋଧିତ କରିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେ ଏହି ସ୍ବଳ୍ପ ଅବଧି ବିଶିଷ୍ଟ ଅଧିବେଶନରେ ଗୁରୁତ୍ବପୂର୍ଣ୍ଣ ନିଷ୍ପତ୍ତି ଗ୍ରହଣ କରାଯିବ । ପରେ ସଂଧ୍ୟାରେ ଆୟୋଜିତ କ୍ୟାବିନେଟ ମିଟିଂରେ ବହୁଚର୍ଚ୍ଚିତ ମହିଳା ସଂରକ୍ଷଣ ବିଲ୍କୁ ମଞ୍ଜୁରୀ ମିଳିଛି । ତେଣୁ ଆସନ୍ତାକାଲି ଚଳିତ ଅଧିବେଶନର ପ୍ରଥମ ବିଲ୍ ଭାବେ ମହିଳା ସଂରକ୍ଷଣ ବିଲ ଲୋକସଭାରେ ଆଗତ ହେବା ନେଇ ଆଶା ମଧ୍ୟ ଉଜ୍ବଳ ହୋଇଛି ।