ଭୁବନେଶ୍ବର: ଏ ବର୍ଷ ରାଜ୍ୟବାସୀଙ୍କୁ ନିରାଶ କରିବ ବର୍ଷା । ଓଡ଼ିଶାରେ ସ୍ୱାଭାବିକ ଠାରୁ କମ୍ ହେବ ମୌସୁମୀ ବର୍ଷା । ଚଳିତ ବର୍ଷ ସାରା ଦେଶରେ ମୌସୁମୀ ବର୍ଷା ସାମାନ୍ୟରୁ ଅଧିକ ହେବ । ୨୦୨୪ରେ ସାରା ଭାରତ ବର୍ଷରେ ୧୦୬ ପ୍ରତିଶତ ବର୍ଷା ହେବ ବୋଲି ଆକଳନ ହୋଇଛି । କିନ୍ତୁ ଓଡ଼ିଶାରେ ବର୍ଷାର ପରିମାଣ ସ୍ବାଭାବିକ ଠାରୁ କମ୍ ରହିବ ବୋଲି ପୂର୍ବାନୁମାନ କରିଛି ଭାରତୀୟ ପାଣିପାଗ ବିଭାଗ ବା ଆଇଏମଡି ।
ଚଳିତ ବର୍ଷ ଗ୍ରୀଷ୍ମ ପ୍ରବାହ ପ୍ରଭାବରେ ରାଜ୍ୟବାସୀ କଲବଲ ହେଉଥିବା ବେଳେ ଆଗକୁ ବର୍ଷାର ପରିମାଣ ମଧ୍ୟ କମ୍ ହେବ । ପ୍ରତିବର୍ଷ ଓଡ଼ିଶାରେ ମୌସୁମୀ ବାୟୁ ପ୍ରବାହିତ ସମୟରେ ଯେତିକି ପରିମାଣର ବର୍ଷା ହୁଏ ଏ ବର୍ଷ ସେହି ପରିମାଣର ବର୍ଷା ହେବ ନାହିଁ । ରାଜ୍ୟରେ ବର୍ଷାର ପରିମାଣ କମିବାର ଯଥେଷ୍ଟ ସମ୍ଭାବନା ରହିଛି । ସାଧାରଣତଃ ଚଳିତ ବର୍ଷ ଜୁନରୁ ସେପ୍ଟେମ୍ବର ମାସ ମଧ୍ୟରେ କମ ବର୍ଷା ହେବ । ତେବେ ଓଡ଼ିଶାର ଉପକୂଳ ଅଞ୍ଚଳରେ କମ୍ ବର୍ଷା ହେବ । ଆଭ୍ୟନ୍ତରୀଣ ଓଡ଼ିଶାରେ ସାମାନ୍ୟରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ଥିବା ନେଇ ଆକଳନ କରିଛି ଭାରତୀୟ ପାଣିପାଗ ବିଭାଗ । ରାଜ୍ୟରେ ବର୍ଷା କମିଲେ, କୃଷି ପ୍ରଧାନ ଓଡ଼ିଶାରେ ଚାଷ ପ୍ରଭାବିତ ହେବା ନେଇ ଆଶଙ୍କା ପ୍ରକାଶ ପାଇଛି ।