Venkatesh About Rana Naidu : ఇటీవలే ప్రముఖ ఓటీటీ సంస్థ నెట్ఫ్లిక్స్లో విడుదలైన పాపులర్ వెబ్సిరీస్ రానా నాయుడు పై ప్రేక్షకుల నుంచి వస్తున్న విమర్శల పై టాలీవుడ్ స్టార్ హీరో విక్టరీ వెంకటేశ్ స్పందించారు. ఈ సీరిస్ లోని కొన్ని సన్నివేశాలు, తీసిన విధానం కొందరిపై ప్రభావం చూపిన మాట వాస్తవమేనని ఆయన అన్నారు. రానాతో కలిసి ఆయన నటించిన యాక్షన్‌ క్రైమ్‌ డ్రామా ఇది. ఈ సిరీస్ చూసి, చాలా మంది అవాక్కయ్యారు. కుటుంబ కథానాయకుడిగా వెంకటేశ్‌ను చూసిన అభిమానులు ఒక్కసారిగా షాక్కు గురైయ్యారు.
ఇందులోని చాలా సన్నివేశాల్లో అసభ్యపదజాలం, శ్రుతిమించిన శృంగార సన్నివేశాలు ఉండటం వల్ల సామాజిక మాధ్యమాల వేదికగా విమర్శలు వెల్లువెత్తాయి. అయితే ఈ వ్యవహారంపై ఇప్పటికే రానా స్పందించగా.. తాజాగా వెంకటేశ్ తొలిసారి మాట్లాడారు. దగ్గుబాటి ఇంటి వారసుడైన అభిరామ్‌ దగ్గుబాటి హీరోగా తెరకెక్కుతున్న 'అహింస' మూవీ ప్రమోషన్స్లో పాల్గొన్న ఆయన.. అందులో భాగంగా జరిగిన విలేకరుల సమావేశంలో ఈ విషయంపై స్పందించారు.
Rana Naidu Web Series : 'రానా నాయుడు'పై వచ్చిన నెగెటివ్‌ ఫీడ్‌ బ్యాక్‌పై మీ స్పందన ఏంటి? అని ఓ విలేకరి అడగ్గా.. అందుకు సమాధానం చెప్పేందుకు మొదట వెంకటేశ్ ఆసక్తి చూపలేదు. ఇది సరైన వేదిక కాదని, దీని గురించి ఇంకొకసారి మాట్లాడుకుందామని దాటవేసేందుకు ప్రయత్నించారు. అయితే మరొకసారి విలేకరి ప్రశ్నించగా.. ఇక తన అభిప్రాయాన్ని పంచుకున్నారు.
"రానా నాయుడు సిరీస్‌పై నెట్‌ఫ్లిక్స్‌ చాలా సంతోషంగా ఉంది. చాలా మంది ప్రేక్షకుల నుంచి ఫీడ్‌ బ్యాక్‌ కూడా వచ్చింది. జరిగిన దాని గురించి ఆలోచిస్తూ కూర్చోవడం కన్నా ముందుకు వెళ్లిపోవడమే మంచిదని నేను ఎంతగానో నమ్ముతాను. తర్వాతి సీజన్‌ అందరికీ నచ్చేలా తప్పకుండా తీర్చిదిద్దుతాం. అలాగని అందరినీ మెప్పించడం కూడా కష్టమే అని చెప్పలి. ఒక విషయమైతే చెప్పగలను. ఫస్ట్‌ సీజన్‌లో కొన్ని సన్నివేశాలు, వాటిని తీసిన విధానం ప్రభావం చూపిన మాట వాస్తవం. అయితే, మొదటి సీజన్‌తో పోలిస్తే రెండో సీజన్‌కు కచ్చితంగా ప్రేక్షకులు పెరుగుతారు. ఈ సిరీస్ను ఎంతగానో ఆదరిస్తారు. చూద్దాం అందరికీ నచ్చేలా ఉత్తమమైన కంటెంట్‌ ఇవ్వడానికి మేము కూడా ప్రయత్నిస్తాం" అని వెంకటేశ్ అన్నారు.
అలాగే నంది అవార్డుల పైనా కూడా ఆయన ఈ వేదికగా స్పందించారు. అవార్డుల గురించి తాను ఎక్కువ ఆలోచించనని అన్నారు. అయితే, అవార్డులు ఇస్తే ప్రతి నటుడికీ ప్రోత్సాహంగా ఉంటుందని అభిప్రాయపడ్డారు. అభిరామ్‌ నటించిన 'అహింస' సినిమా మంచి విజయాన్ని అందుకోవాలని ఈ సందర్భంగా వెంకటేశ్ ఆకాంక్షించారు.
