ପାରଳାଖେମୁଣ୍ଡି:କୋରୋନାର ଦ୍ଵିତୀୟ ଲହର ସାରା ଦେଶକୁ ନୟାନ୍ତ କଲାଣି । ଏହା ଯେଭଳି ବେଗରେ ସଂକ୍ରମିତ କରୁଛି, ସେଭଳି ବେଗରେ ଲୋକଙ୍କ ଏ ଜୀବନ ମଧ୍ୟ ନେଉଛି । ଏହାରି ଭିତରେ ଆନ୍ଧ୍ର ଭ୍ୟାରିଏଣ୍ଟ ଆହୁରି ସମସ୍ୟା ଆତଙ୍କ ଖେଳାଇଛି । ବିଶେଷ କରି ଆନ୍ଧ୍ର ସୀମାରେ ଥିବା ଗଜପତି ଜିଲ୍ଲାପାଇଁ ଏହି ଭ୍ୟାରିଏଣ୍ଟ ଅଧିକ ବିପଜ୍ଜନକ । ସେଥିପାଇଁ ଆନ୍ତଃରାଜ୍ୟ ସୀମାରେ ଯାଞ୍ଚକୁ କଡାକଡି କରିବା ପାଇଁ ସରକାର ନିର୍ଦ୍ଦେଶନାମା ଜାରି କରିଛନ୍ତି ।
ଗଜପତି ଜିଲ୍ଲାର ପ୍ରାୟ ୮୦ କିମି ଅଂଚଳ 3 ଆନ୍ଧ୍ର ସୀମାନ୍ତବର୍ତି ହୋଇଥିବା ବେଳେ ପ୍ରାୟ ୫ଟି ମୁଖ୍ୟ ରାସ୍ତାରେ ନାକା ଗେଟ ନିର୍ମାଣ କରାଯାଇଛି । ସେହିଭଳି ଆଉ କିଛି ରାସ୍ତାରେ ମଧ୍ୟ ଗେଟ ନିର୍ମାଣ ହୋଇଛି । ନାକାରେ ପୋଲିସ ଏବଂ ଶିକ୍ଷକମାନେ ରହି ଆସୁଥିବା ଲୋକଙ୍କ କୋଭିଡ୍ ନେଗେଟିଭ୍ ରିପୋର୍ଟ କିମ୍ବା ଦ୍ଵିତୀୟ ଡୋଜ୍ ଟୀକା ଗ୍ରହଣର ପ୍ରମାଣପତ୍ର ଯାଞ୍ଚ କରୁଛନ୍ତି । ଯେଉଁମାନଙ୍କର ନାହିଁ, ସେମାନଙ୍କୁ ସଙ୍ଗରୋଧ କେନ୍ଦ୍ରରେ ରଖାଯାଉଛି । ଏହା କେବଳ ମୁଖ୍ୟ ରାସ୍ତାରେ ଥିବା ନାକା ଗେଟରେ କରାଯାଉଥିବା ବେଳେ ଅନ୍ୟ ରାସ୍ତାକୁ ମୁକୁଳା ଛାଡ଼ି ଦିଆଯାଇଛି । ଫଳରେ ଆନ୍ଧ୍ରର ଲୋକେ ବିନା ଦ୍ବିଧାରେ ଗଜପତି ଜିଲ୍ଲା ମଧ୍ୟକୁ ଅନୁପ୍ରବେଶ କରିବା ସହ ପ୍ରତିଦିନ ଯାତାୟତ କରୁଛନ୍ତି । ଆଉ କିଛି ଲୋକଙ୍କ ପାଇଁ ସୁବିଧା ହୋଇଛି ଗଳାବାଟ । ଦୀର୍ଘ ସୀମାନ୍ତ ଅଞ୍ଚଳରେ ଏକାଧିକ ଗଳାବାଟ ରହିଥିବା ଯୋଗୁଁ ସେମାନେ ଅନାୟସରେ ଓଡିଶାକୁ ଯାତାୟତ କରୁଛନ୍ତି । ତେବେ ପ୍ରଶାସନ କେବଳ ମୁଖ୍ୟ ରାସ୍ତାକୁ ଜଗି ବାକି ସବୁକୁ ଛାଡିଦେବା ଆଗକୁ ଗଜପତି ଜିଲ୍ଲା ତଥା ସାରା ଓଡିଶା ପାଇଁ ବିପଦ ସୃଷ୍ଟି କରିବା ଆଶଙ୍କା ପ୍ରକାଶ ପାଇଛି ।