ନ୍ୟୁୟର୍କ:ବିଗତ ୫୨ ବର୍ଷରେ ଗୋଟିଏ କ୍ୟାଲେଣ୍ଡର ବର୍ଷରେ ୪ଟି ଗ୍ରାଣ୍ଡସ୍ଲାମ ବିଜେତା ପୁରୁଷ ଖେଳାଳି ବନିବାର ନୋଭାକ ଜୋକଭିକଙ୍କ ସ୍ବପ୍ନ ଚୁରମାର । ବିଶ୍ବର ନମ୍ବର ୧ ଖେଳାଳି ଜୋକଭିକଙ୍କ ଏହି ସ୍ବପ୍ନ ଭାଙ୍ଗିଛନ୍ତି ଡାନିଲ ମେଡେଭେଡେବ । ୟୁଏସ ଓପନ ଫାଇନାଲରେ ସମସ୍ତଙ୍କୁ ଚକିତ କରି ୬-୪, ୬-୪, ୬-୪ ସେଟ୍ରେ ଏକତରଫା ବିଜୟ ହାସଲ କରିଛନ୍ତି । ଏଥିସହ ଜୋକଭିକଙ୍କୁ ୨୧ତମ ଗ୍ରାଣ୍ଡସ୍ଲାମ ଟ୍ରଫି ଜିତିବାକୁ ଆହୁରି ଅପେକ୍ଷା କରାଇଛନ୍ତି ।
ବିଶ୍ବର ନମ୍ବର ୧ ଖେଳାଳି ଜୋକଭିକ୍ ଏହି ଟୁର୍ଣ୍ଣାମେଣ୍ଟରେ ୨୦୨୧ରେ ୨୭.୦ ରେକର୍ଡ ନେଇ ପହଞ୍ଚିଥିଲେ । ଫେବ୍ରୁଆରୀରେ ଅଷ୍ଟ୍ରେଲିଆନ ଓପନ ଫାଇନାଲ୍ରେ ମେଡେଭେଡେବଙ୍କୁ ହରାଇଥିଲେ । ପରେ ଜୁନ୍ରେ ଫ୍ରେଞ୍ଚ୍ ଓପନ ଓ ଜୁଲାଇରେ ୱିମ୍ବଲଡନ ଟାଇଟେଲ ମଧ୍ୟ ଜିତିଥିଲେ । ମାତ୍ର ଆମେରିକା ଓପନ ଫାଇନାଲରେ ନିଜର ସର୍ବଶ୍ରେଷ୍ଠ ଫର୍ମରେ ନଥିଲେ । ୩୮ ସହଜ ଭୁଲ ସହିତ ବ୍ରେକ ପଏଣ୍ଟ ଭରଣା କରିପାରିନଥିଲେ । ରାଗରେ ନିଜ ଉପରୁ ନିୟନ୍ତ୍ରଣ ହରାଇ ନିଜର ରାକେଟ୍ ମଧ୍ୟ ଭାଙ୍ଗିଦେବା ପରେ ଚେୟାର ଅମ୍ପାୟରଙ୍କ ଠାରୁ ଚେତାବନୀ ମଧ୍ୟ ମିଳିଲା । ଆର୍ଥର ଏସେ ଷ୍ଟାଡିୟମରେ ଉପସ୍ଥିତ ଦର୍ଶକ ହୁଟିଂ ମଧ୍ୟ କରିଥିଲେ ।