ଝାରସୁଗୁଡା: କ୍ରୀଡାର ବିକାଶ ପାଇଁ ରାଜ୍ୟ ସରକାର ନେଇଛନ୍ତି ସ୍ବାଗତଯୋଗ୍ୟ ପଦକ୍ଷେପ । ଝାରସୁଗୁଡା ଜିଲ୍ଲାରେ କ୍ରିକେଟ ଇତିହାସରେ ଯୋଡି ହୋଇଛି ଏକ ନୂଆ ଅଧ୍ୟାୟ । ଝାରସୁଗୁଡାବାସୀଙ୍କ ବହୁ ଦିନର ସ୍ବପ୍ନ ସାକାର ହୋଇଛି । ଆଜି ଝାରସୁଗୁଡ଼ା ଜିଲ୍ଲାର ମାଲିମୁଣ୍ଡା ଠାରେ ଉଦଘାଟନ ହୋଇଛି ବହୁ ପ୍ରତୀକ୍ଷିତ କ୍ରିକେଟ ଷ୍ଟାଡିୟମ । ଏହା ସହିତ ଆରମ୍ଭ ହେବାକୁ ଯାଉଛି ମହିଳା କ୍ରିକେଟ ଏକାଡେମୀ । ଆଜି ଭିଡିଓ କନଫେରେନ୍ସି ମାଧ୍ୟମରେ ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଝାରସୁଗୁଡ଼ା ସହରସ୍ଥିତ ମାଲିମୁଣ୍ଡାଠାରେ ପ୍ରାୟ ୩୦ ଏକରର ଏକ ଷ୍ଟାଡିୟମ ୨୦୧୬ ରେ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା ଏବଂ ୨୦୧୮ ରେ ସମ୍ପୂର୍ଣ୍ଣ ମଧ୍ୟ ହୋଇଥିଲା । ଓସିଏର ପୂର୍ବତନ ଯୁଗ୍ମ ସମ୍ପାଦକ ମହତାବ ଖାଁ କହିଛନ୍ତି ଯେ, ଏହି ଷ୍ଟାଡିୟମ ଦୀର୍ଘଦିନର ସ୍ବପ୍ନ ଥିଲା ଯାହା ଆଜି ସତ ହୋଇଛି । କଟକର ବାବବାଟୀ ଷ୍ଟାଡିୟମ ପରେ ଏହା ଦ୍ବିତୀୟ ସର୍ବଶ୍ରେଷ୍ଠ ଷ୍ଟାଡିୟମ । ତେଣୁ ଆମେ ପ୍ରୟାସ କରୁଛୁ ଯେ ଆସନ୍ତା ରଣଜୀ ସିଜିନରେ କିଛି ମ୍ୟାଚ୍ ଏହି ଷ୍ଟାଡିୟମରେ ହେବା ପାଇଁ । ଏହା ସହ ମହିଳା କ୍ରିକେଟ ଟିମ ପାଇଁ କୋଚ ଚୟନ ସରିଛି ଏବଂ ଟ୍ରେନିଂ ପାଇଁ କଟକ ଯାଇଛନ୍ତି । ଆଶାବାଦୀ ଅଛୁ ଯେ ଆଗାମୀ ଦିନରେ ଆମେ ଆଇପିଏଲ ମ୍ୟାଚ୍ ଆୟୋଜନ କରିବୁ । ଜିଲ୍ଲା କ୍ରିକେଟ ସଂଘ ସଭାପତି ପ୍ରଜ୍ବଲ ପଟେଲ କହିଛନ୍ତି ଯେ ଏଠାରେ ଥିବା ଟର୍ଫ ୱିକେଟ ଫଳରେ କ୍ରିକେଟର ମାନଙ୍କୁ ଅନେକ ସାହାର୍ଯ୍ୟ ହୋଇପାରିବ । ଏଥି ପାଇଁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ମଧ୍ୟ କରିଛନ୍ତି ।