কোকৰাঝাৰ, 21 এপ্ৰিল : আজি ষোড়শ অসামৰিক সেৱা দিৱস (16th Civil Services Day) ৷ অসামৰিক সেৱা দিৱসৰ উপলক্ষে নতুন দিল্লীৰ বিজ্ঞান ভৱনত সমগ্ৰ দেশতে নিৰ্বাচিত শ্ৰেষ্ঠ পদক্ষেপসমূহৰ এক প্ৰদৰ্শনীৰ আয়োজন কৰা হয় (Deputy Commissioner of Kokrajhar)।
এই কেন্দ্ৰীয় অসামৰিক সেৱা দিৱসৰ প্ৰদৰ্শনীত তেওঁলোকৰ প্ৰচেষ্টা প্ৰদৰ্শন কৰাৰ সুযোগ লাভ কৰা কোকৰাঝাৰ জিলাৰ উপায়ুক্ত বৰ্ণালী ডেকা আছিল অসমৰ একমাত্ৰ বিষয়া ৷ সমগ্ৰ দেশৰ মুষ্টিমেয় কেইগৰাকীমান নিৰ্বাচিত বিষয়াৰ মাজৰ এগৰাকী উপাযুক্ত বৰ্ণালী ডেকা (Kokrajhar DC Barnali Deka honored in Delhi)।
2022 চনত প্ৰদান কৰা উদ্ভাৱন আৰু উচ্চাকাংক্ষী জিলাৰ বাবে প্ৰধানমন্ত্ৰী বঁটা, 2020 কে ধৰি কেবাবাৰো বঁটা আৰু সন্মান লাভ কৰি বৰ্ণালী ডেকাই অসমলৈ সন্মান কঢ়িয়াই আনিছে । বিজ্ঞান ভৱনত দেশৰ উপ-ৰাষ্ট্ৰপতি জগদীপ ধনখৰে এই প্ৰদৰ্শনী অনুষ্ঠানৰ উদ্বোধন কৰে । কেন্দ্ৰীয় মন্ত্ৰী ড৹ জীতেন্দ্ৰ সিঙৰ লগতে কেবিনেট সচিব ৰাজীৱ গৌবা আৰু অন্যান্য বিশিষ্ট ব্যক্তিসকলে বৰ্ণালী ডেকাৰ সৈতে বাৰ্তালাপ কৰে ।
কেন্দ্ৰীয় অসামৰিক সেৱা দিৱস অনুষ্ঠানৰ অংশ হিচাপে আজিৰ অনুষ্ঠানত ভাৰতৰ প্ৰধানমন্ত্ৰী নৰেন্দ্ৰ মোডী মুখ্য অতিথি হিচাপে উপস্থিত থাকে । এই অনুষ্ঠানটো প্ৰতি বছৰে দেশৰ সকলো অসামৰিক বিষয়াৰ দ্বাৰা অতি উলহ-মালহেৰে পালন কৰা হয় । এই বৰ্ষৰ ষোড়শ অসামৰিক সেৱা দিৱসটো থীম আছিল "Vikasit Bharat - Empowering Citizens and Reaching the Last Mile." ৷