চিৰাং, ১৪ এপ্ৰিল:অসম সাহিত্য সভাৰ নিৰ্দেশনা অনুসৰি আজি চিৰাং জিলা সাহিত্য সভাৰ অধীনৰ ১৫ খন শাখাত পহিলা ব'হাগ উপলক্ষে 'নিজৰ দিন ' উদযাপন কৰা হয় ৷ এই উপলক্ষে দেওবাৰে চিৰাং জিলাৰ ঢালিগাঁও অঞ্চলৰ বৰতালোৱা-ছাতিপুৰ শাখা সাহিত্য সভাই অঞ্চলটোৰ কেইবাগৰাকী বিশিষ্ট লোকক ঘৰে ঘৰে গৈ সম্বৰ্ধনা জ্ঞাপন কৰে ৷ চিৰাং জিলা সাহিত্য সভাৰ সাধাৰণ সম্পাদক দেৱান গাজী মুস্তাফা আৰু বৰতালোৱা-ছাতিপুৰ শাখা সাহিত্য সভাৰ সভাপতি নজমুল হকৰ নেতৃত্বত এটি সজাঁতি দলে এই বিশিষ্ট লোকসকল ঘৰে ঘৰে গৈ সম্বৰ্ধনা জ্ঞাপন কৰে ৷
তেওঁলোকে হাতীপোতা হাইস্কুলৰ অৱসৰপ্ৰাপ্ত শিক্ষক বৰতালোৱাৰ বাদশ্বাহ আলী আহমেদ, বঙাইগাঁও শোধনাগাৰৰ অৱসৰপ্ৰাপ্ত কৰ্মচাৰী, সমাজকৰ্মী আব্দুল হামিদ পাৰমাণিক আৰু বিলাসপুৰ মনছুৰীয়া হাইস্কুলৰ অৱসৰপ্ৰাপ্ত প্ৰধান শিক্ষক শ্বেৰ এৰছাদ আলীক নিজ নিজ ঘৰলৈ গৈ পহিলা ব'হাগৰ প্ৰথম দিন নিজৰ দিন উপলক্ষে ফুলাম গামোচাৰে সম্বৰ্ধনা জ্ঞাপন কৰাৰ লগতে অসম সাহিত্য সভাৰ ওলগনি পত্ৰ প্ৰদান কৰে ৷