গুৱাহাটী, 6 ছেপ্তেম্বৰ : প্ৰকৃত শিক্ষক হৈছে এগৰাকী যথাৰ্থ শিল্পী, ভাস্কৰ । শিল্পী, ভাস্কৰে যেনেদৰে এটি শিল্প কাৰ্যত বেয়াখিনি আঁতৰাই সুন্দৰ ৰূপত গঢ়ি তোলে, ঠিক তেনেদৰে এগৰাকী প্ৰকৃত শিক্ষকেও ছাত্ৰ-ছাত্ৰীৰ মাজত দেখা নেতিবাচক দিশসমূহ উপদেশ, মৰমেৰে শুধৰাই মানুহৰূপে গঢ়ি তুলিব পাৰে ।
দেওবাৰে কামৰূপ জিলাৰ উপায়ুক্তৰ কাৰ্যালয় সভাকক্ষত জিলা প্ৰশাসন আৰু কামৰূপ জিলা শিক্ষা বিভাগৰ যুটীয়া উদ্যোগত আয়োজিত ৬০ তম শিক্ষক দিৱসৰ অনুষ্ঠানত উপস্থিত থাকি ৰবীন্দ্ৰনাথ ঠাকুৰ বিশ্ববিদ্যালয়ৰ উপাচাৰ্য অধ্যাপক ড৹ অমলেন্দু চক্ৰৱৰ্তীয়ে এইদৰে কয় ।
কামৰূপ জিলাৰ উপায়ুক্ত কৈলাশ কাৰ্তিক এনৰ সভাপতিত্বত অনুষ্ঠিত হোৱা সভাত ভাষণত কয় যে, সকলোৰে জীৱনত এগৰাকী শিক্ষকৰ ভূমিকা অপৰিসীম । সভাত জিলাখনৰ পৰা প্ৰকাশ কৰা শৈক্ষিক ই আলোচনী গুৰুবাৰ্তাৰ তৃতীয় সংখ্যাটি উপায়ুক্ত কাৰ্তিকে উন্মোচন কৰে ৷ লগতে শিক্ষক দিৱসৰ লগত সংগতি ৰাখি প্ৰকাশ কৰা ই স্মৰণিকা "ই কামৰূপিকা" উন্মোচন কৰে জিলা শিক্ষা বিভাগৰ দায়িত্বত থকা অতিৰিক্ত উপায়ুক্ত মানালী জৈনে ।
লগতে পঢ়ক: শিক্ষক দিৱসৰ লগত সংগতি ৰাখি বলাই ওজাক সম্বৰ্ধনা
সভাত শিক্ষয়িত্ৰী মানসী ডেকা আৰু কামৰূপ সমগ্ৰ শিক্ষাৰ বিষয়াসকলে সৰস্বতী বন্দনা পৰিবেশন কৰে । ড৹ সৰ্বপল্লী ৰাধাকৃষ্ণণৰ প্ৰতিচ্ছবিত মাল্যাৰ্পণেৰে আৰম্ভ কৰা সভাত আদৰণি ভাষণ দিয়ে জিলা শিক্ষা বিষয়া অপূৰ্ব ঠাকুৰীয়াই ৷ দেওবাৰে অনুষ্ঠিত হোৱা এই সভাত গুৱাহাটী আই আই টিৰ অধ্যাপক কে ইউ সাৰাথিয়া, স্বাস্থ্য বিভাগৰ যুটীয়া সঞ্চালক গুণীন্দ্ৰ দেৱ শৰ্মা, বকো মহাবিদ্যালয়ৰ প্ৰৱক্তা ড৹ তপন দত্ত, উত্তৰ গুৱাহাটী মহাবিদ্যালয়ৰ প্ৰবক্তা তৰণী হালৈ, জিলা সমাজ কল্যাণ বিষয়া ৰুবুল শৰ্মাকে ধৰি কেইবাগৰাকীও বিশিষ্ট ব্যক্তি উপস্থিত থাকে ।
লগতে পঢ়ক: কলিয়াবৰত উদযাপন শিক্ষক দিৱস
বিয়লিৰ ভাগত জিলাখনৰ শিক্ষকসকলৰ মাজত ৰং-বিৰং শীৰ্ষক এক ভাৰ্চুৱেল সাংস্কৃতিক অনুষ্ঠান অনুষ্ঠিত হয় । ইপিনে সামাজিক সাংস্কৃতিক অনুষ্ঠান ‘TRIKON FOR WORLD FOUNDATION’ ৰ উদ্যোগত দেওবাৰে গুৱাহাটী প্ৰেছ ক্লাবত শিক্ষক দিৱসৰ লগত সংগতি ৰাখি অসমৰ ১২ গৰাকী শিক্ষক-শিক্ষয়িত্ৰীক জ্ঞান জ্যোতি, জ্ঞান ৰত্ন শিক্ষা জ্যোতি আৰু শিক্ষা শিৰোমণি বঁটা প্ৰদান কৰা হয় ।
অনুষ্ঠানত মুখ্য অতিথি হিচাপে উপস্থিত থাকে অসম উদ্যোগিক উন্নয়ন নিগমৰ উপাধ্যক্ষ জিতু তালুকদাৰ, বিশিষ্ট অতিথি হিচাপে উপস্থিত থাকে নেপেডচ গ্ৰুপ অৱ ইনষ্টিটিউচনৰ অধ্যক্ষ ডাঃ প্ৰশান্ত বুঢ়াগোঁহাই ।
লগতে পঢ়ক: শিক্ষকসকলক প্ৰাপ্য দিবলৈ শিক্ষা বিভাগৰ সময়ৰ অভাৱ : শংকৰজ্যোতি বৰুৱা
