সৰুপথাৰ,3 আগষ্ট: বুধবাৰে টকিঅ' অলিম্পিকৰ ছেমিফাইনেলত অৱৰ্তীৰ্ণ হ'ব অসম কন্যা লাভলীনা বৰগোঁহাই ৷ ইয়াৰ বাবে সমগ্ৰ ৰাজ্যতে চলিছে ব্যাপক চৰ্চা ৷ সমান্তৰালকৈ লাভলীনাৰ জয়ৰ কামনাৰে ৰাজ্যৰ সৰ্বত্ৰে থকা মঠ-মন্দিৰ, নামঘৰ আদি ধৰ্মীয় উপাসনাস্থলী সমূহত নাম প্ৰসংগ কৰা পৰিলক্ষিত হৈছে ৷ বক্সাৰ গৰাকীৰ মংগল কামনাৰে ঐতিহ্যমণ্ডিত সৰুপথাৰৰ বাৰখেলীয়া নামঘৰতো চলিছে নাম প্ৰসংগ ৷
মঙলবাৰে পুৱা সৰুপথাৰৰ ঐতিহ্যমণ্ডিত বাৰখেলিয়া বৰ-নামঘৰত একাংশ ভকতে নাম প্ৰসংগ কৰে ৷ যাতে লাভলীনাই অলিম্পিকৰ ছেমিফাইনেলত জয়ী হোৱাৰ লগতে ফাইনেলত সোণৰ পদক বুটলি ভাৰত তথা ধনশিৰি মহকুমালৈ গৌৰৱ কঢ়িয়াই আনিব পাৰে ৷ অকল বাৰখেলীয়া নামঘৰেই নহয় বৰপথাৰ,সৰুপথাৰ অঞ্চলৰ মন্দিৰ,নামঘৰত এতিয়া লাভলীনাৰ জয়ৰ বাৰে পূজা অৰ্চনা তথা নাম প্ৰসংগ কৰা দেখা পোৱা গৈছে ৷ সকলোৰে এটাই মাত্ৰ কামনা, লাভলীনাই যাতে বুধবাৰৰ খেলখনত জয়ী হোৱাৰ লগতে সোণৰ পদকো অৰ্জন কৰে ৷
লগতে পঢ়কঃ ১৫ আগষ্টৰ লালকিল্লাৰ কাৰ্যসূচীত বিশেষ অতিথি হ'ব ভাৰতীয় অলিম্পিক দল
লক্ষণীয় যে, সমগ্ৰ দেশবাসীৰ লগতে অসমবাসীয়ো এতিয়া আক্ৰান্ত হৈছে অলিম্পিকৰ জ্বৰত ৷ কাৰণ সূদীৰ্ঘ 125 বছৰৰ পাছত অলিম্পিকত প্ৰথমটো পদক নিশ্চিত কৰিছে এগৰাকী অসম কন্যা লাভলীনা বৰগোঁহাইয়ে ৷ বুধবাৰে অনুষ্ঠিত হবলগীয়া ছেমিফাইনেল মেচখনৰ বাবে অধীৰ আগ্ৰহেৰে বাট চাইছে সমগ্ৰ দেশবাসীয়ে ৷
উল্লেখ্য যে, ৪ আগষ্ট, বুধবাৰে টকিঅ’ অলিম্পিকৰ 69 কিলোগ্ৰাম শাখাৰ মহিলা বক্সিঙৰ ছেমিফাইনেলত অৱতীৰ্ণ হ’ব অসম-কন্যা লাভলীনা বৰগোঁহাই ৷ ছেমিফাইনেলত তুৰ্কীৰ বক্সাৰ বুচেনাছ চাৰমেনেলী(Busenaz Surmeneli)ৰ বিৰুদ্ধে বক্সিং ৰিঙত নামিব লাভলীনা ৷ লাভলীনাৰ এই সাফল্যত স্বাভাৱিকতেই সমগ্ৰ দেশৰ লগতে উৎফুল্লিত হৈ পৰিছে বক্সাৰ গৰাকীৰ গৃহ স্থান বৰপথাৰৰ লোকসকল ৷ সকলোৰে মুখে মুখে এতিয়া মাথো লাভলীনাৰ নাম ৷
লগতে পঢ়কঃ লাভলীনাৰ জীৱনৰ জনা-নজনা কিছু কথা
