వడ్డించేవాడు మనవాడైతే చివరి వరుసలో కూర్చున్నా ఢోకా ఉండదు అన్నట్టుగా మారింది ఏపీలోని విజయవాడ దుర్గగుడిలోని ఉద్యోగోన్నతుల ప్రక్రియ. నిన్నటి వరకు జూనియర్‌ అసిస్టెంట్‌గా పనిచేసిన ఓ ఉద్యోగికి నేరుగా సూపరింటెండెంట్‌ ఉద్యోగం కల్పిస్తూ ఉత్తర్వులు జారీ చేయడంపై.. తోటి సిబ్బంది ఖంగుతిన్నారు. దేవాదాయశాఖలో పనిచేసే ఓ ఉన్నతాధికారి సహకారంతోనే ఇదంతా జరగడం.. పైగా రెండ్రోజుల క్రితమే పదోన్నతుల కల్పనలో కోర్టు వివాదాలకు తావు ఇవ్వొద్దని దేవాదాయ శాఖ మంత్రి చెప్పిన నేపథ్యంలో ఆయా నిబంధనలు పక్కకు నెట్టి ఓ మహిళకు ఉద్యోగోన్నతి కల్పించడం చర్చనీయాంశమైంది.
తొలుత ఇద్దరు ఉద్యోగులకు సూపరింటెండెంట్‌గా ఉద్యోగోన్నతి పొందేందుకు అవకాశం కల్పించారు. ఇందులో ఒక వ్యక్తి వెంటనే బాధ్యతలు చేపట్టగా.. మరో మహిళా ఉద్యోగి స్వీకరించలేదు. ఈ క్రమంలోనే ఆ పదోన్నతికి సంబంధించిన ఉత్తర్వులు తీసుకుని వేరొక మహిళ రావడంతో వివాదాస్పదం అయ్యింది. వాస్తవానికి కొత్తగా వచ్చిన మహిళ గతంలో జూనియర్‌ అసిస్టెంట్‌గా పనిచేశారు. ఒకవేళ ఆమెకు ఉద్యోగోన్నతి కల్పిస్తే సీనియర్‌ అసిస్టెంట్‌ ఇవ్వాలి కానీ సూపరింటెండెంట్‌ ఏవిధంగా ఇస్తారని పలువురు ప్రశ్నిస్తున్నారు.