Narendra Modi Speech In Parliament Today : లోక్‌సభలో ప్రతిపక్షాలు తెచ్చిన అవిశ్వాస తీర్మానంపై.. మూడు రోజులు జరిగిన చర్చకు ప్రధాని నరేంద్రమోదీ ఇవాళ సుదీర్ఘంగా సమాధానం ఇచ్చారు. ఈ సాయంత్రం ఐదింటి ప్రాంతంలో మొదలై.. దాదాపు ఏడున్నర వరకు సాగిన ప్రసంగంలో ప్రధాని మోదీ ప్రతిపక్షాలపై.. తీవ్రస్థాయిలో ధ్వజమెత్తారు. దేశాన్ని ఏకీకృతం చేయాల్సిన బాధ్యతను ప్రతిపక్ష కాంగ్రెస్‌ ఏనాడూ తీసుకోలేదన్న ప్రధాని.. ఓట్ల రాజకీయాల కోసం దేశాన్ని కులాలు, మతాలు, ప్రాంతాల పేరుతో విభజించిందని.. ధ్వజమెత్తారు. కాంగ్రెస్‌ చరిత్ర అంతా భారతమాతను చిన్నాభిన్నం చేయడంలోనే మునిగిపోయిందన్న ఆయన.. ఆ పార్టీ అరాచకాలు చెప్పుకుంటే అనేకమున్నాయన్నారు. భారతమాత పట్ల ప్రతిపక్ష సభ్యులు చేసిన వ్యాఖ్యలను ఖండించిన ప్రధాని.. భారతమాత మరణంపై వ్యాఖ్యలు చేయడమంటే దేశ వినాశనాన్ని కోరుకున్నట్లేనని అన్నారు. వందేమాతరాన్ని.. ముక్కలు ముక్కలుగా చేసినపుడు కాంగ్రెస్‌ ఉద్దేశాలు బయటపడ్డాయన్న మోదీ.. బుజ్జగింపు విధానాలతోనే దేశానికి ముప్పు తెచ్చిపెట్టారని ధ్వమెత్తారు. ప్రస్తుత అవిశ్వాస తీర్మానంతో ప్రతిపక్షాలు వచ్చే సార్వత్రిక ఎన్నికల్లో ఓటమికి సిద్ధమయిపోయాయని మోదీ అన్నారు. ప్రతిపక్షాలు తెచ్చిన అవిశ్వాస తీర్మానం దేవుడు తమకు ఇచ్చిన వరంగా అభివర్ణించారు.
"దేవుడు చాలా దయగలవాడు. ఏదో ఒక మాధ్యమం ద్వారా మనం కోరుకున్నవి జరిగేలా చూస్తాడు. ప్రతిపక్షం ఈ తీర్మానం తీసుకొని రావడం దేవుడి ఆశీర్వాదం అని నేను నమ్ముతున్నాను. 2018లో కూడా దేవుడి ఆశీర్వాదం వల్ల విపక్షాలు నాపైన అవిశ్వాస తీర్మానం తీసుకొని వచ్చాయి. అది మాకు బలపరీక్ష కాదు ప్రతిపక్షాలకే విశ్వాస పరీక్ష అని నేను ఆ రోజే చెప్పాను. తర్వాత మేం ఎన్నికలకు వెళ్లాం. ఆ ఎన్నికల్లో ప్రజలు సంపూర్ణంగా ఆ అవిశ్వాసాన్ని ఓడించారు. ఒక విధంగా విపక్షాల అవిశ్వాస తీర్మానం మాకు చాలా శుభం చేస్తుంది. 2024లో జరిగే ఎన్నికల్లో కూడా.. భాజపా, ఎన్డీఏ కూటమి ప్రజల ఆశీర్వాదంతో గత రికార్డులన్నీ బద్దలు కొట్టి ప్రభుత్వాన్ని ఏర్పాటు చేస్తుందని మీరు (ప్రతిపక్షాలు) ఇప్పటికే నిర్ణయానికి వచ్చేయడాన్ని నేను చూస్తున్నాను"
--నరేంద్ర మోదీ, భారత ప్రధానమంత్రి
PM Modi Speech Today :ప్రతిపక్ష ఇండియా కూటమిపై ఘాటు విమర్శలు చేసిన ప్రధాని.. వారసత్వ రాజకీయాల సమాహారమే కొత్త సంకీర్ణంగా వచ్చిందని విమర్శించారు. ఎందరో మహానుభావులు వారసత్వ రాజకీయాలు దేశానికి నష్టదాయకమని చెప్పారని అన్నారు. జాతి నిర్మాణంలో వారసత్వ రాజకీయాలు అడ్డంకిగా మారుతాయని తొలి తరం మేధావులు చెప్పిన విషయాన్ని కాంగ్రెస్‌ మర్చిపోయిందన్నారు. వారసత్వ రాజకీయాలు చేసేవాళ్లకు దేశంలో కాలం చెల్లిపోయిందన్న మోదీ కాంగ్రెస్‌ను వ్యతిరేకించిన మేధావులను కూడా ఆ పార్టీ ఓడించిందని గుర్తు చేశారు. కాంగ్రెస్‌ను ప్రశ్నించినందుకే అంబేడ్కర్‌ను రెండుసార్లు ఎన్నికల్లో ఓడించారని, ఎమర్జెన్సీని ప్రశ్నించినందుకు జగ్జీవన్‌రామ్‌ను ఓడించిందని గుర్తుచేశారు.
"తమను తాము (విపక్ష కూటమి ఇండియా) బతికించుకునేందుకు ఎన్డీఏ మద్దతు తీసుకోవాల్సినంత ఇబ్బంది పరిస్థితుల్లో వారు ఉన్నారు. కానీ గర్వమనే "ఐ" వారిని వదలడం లేదు. అందుకే వారు ఎన్డీయేలో రెండు "ఐ"లు చొప్పించారు. మొదటి ఐ అంటే 24 పార్టీల గర్వం. రెండో ఐ అంటే ఒకే కుటుంబ గర్వం. ఇండియాను కూడా ముక్కలు ముక్కలు చేశారు. I-N-D-I-A గా విడదీశారు"
--నరేంద్ర మోదీ, భారత ప్రధానమంత్రి