ଖୋର୍ଦ୍ଧା:ସ୍ତ୍ରୀର ହକ ପାଇବା ଦାବିରେ ଦୀର୍ଘ ପାଞ୍ଚ ମାସ ଧରି ଶ୍ବଶୁର ଘର ପିଣ୍ଡାରେ ବସିଥିବା ମହିଳାଙ୍କୁ ମିଳିଲା ସହାୟତା । ଇଟିଭି ଭାରତ ମାଧ୍ୟମରେ ଖବର ପ୍ରସାରିତ ହେବା ପରେ ଭୁବନେଶ୍ୱର ଗୁଗୁଲ ଫାଉଣ୍ଡେସନ ଧାରଣାରତ ମହିଳା ପିଙ୍କିଙ୍କୁ ସହାୟତାର ହାତ ବଢ଼ାଇଛି । ଗୁଗୁଲ ଫାଉଣ୍ଡେସନର ଏମଡି ତଥା ସଭାପତି ସଞ୍ଜୁକ୍ତା ନାୟକ ଓ ସମ୍ପାଦିକା ରଞ୍ଜୁକ୍ତା ବେହେରା ବାଘମାରୀଠାରେ ପିଙ୍କି ଦେଇଥିବା ଧାରଣା ସ୍ଥାନରେ ପହଞ୍ଚି ତାଙ୍କ ସହ ଦେଖା ହୋଇଛନ୍ତି ।
ପିଙ୍କିଙ୍କ ଠାରୁ ସମ୍ପୂର୍ଣ୍ଣ ଘଟଣାକ୍ରମ ପଚାରି ବୁଝିବା ସହିତ ପୋଲିସ କଣ ସହଯୋଗ କରୁଛି ସେ ସମ୍ପର୍କରେ ତଥ୍ୟ ସଂଗ୍ରହ କରିଥିଲେ । ପରେ ବାଘମାରୀ ଥାନା ଅଧିକାରୀଙ୍କ ସହିତ ସମସ୍ତ ଘଟଣା ନେଇ ଆଲୋଚନା କରିଛନ୍ତି । ପିଙ୍କିଙ୍କୁ ଦିଅରର ଆକ୍ରମଣ ପରେ ଗିରଫ କରାଯାଇନଥିବା ନେଇ ସମାଜସେବୀ ପ୍ରଶ୍ନ କରିଛନ୍ତି । ସେ କହିଛନ୍ତି,"ସ୍ଥାନୀୟ ଥାନା ପକ୍ଷରୁ ଦୀର୍ଘ ତିନି ମାସ ଧରି ସୁରକ୍ଷା ହଟାଇ ଦିଆଯିବା ଯୋଗୁଁ ପିଙ୍କିଙ୍କ ଦିଅର ଏଭଳି ଆକ୍ରମଣ କରିବାକୁ ସାହସ ଜୁଟାଇଲା । ପୋଲିସର ଭୂମିକାକୁ ଆମେ ନିନ୍ଦା କରୁଛୁ । ଯଥାଶୀଘ୍ର ପିଙ୍କିକୁ ନ୍ୟାୟ ଦେଇ ଆକ୍ରମଣ କରିଥିବା ଦିଅର ବିରୁଦ୍ଧରେ ଦୁଢ କାର୍ଯ୍ୟାନୁଷ୍ଠାନ ନେବାକୁ ଉଚ୍ଚ ଅଧିକାରୀଙ୍କ ନିକଟରେ ଦାବି କରାଯିବ ।"