ମୁମ୍ବାଇ: ଫେବୃଆରୀ ୯ ତାରିଖରୁ ଭାରତ ଅଷ୍ଟ୍ରେଲିଆ ମଧ୍ୟରେ ଆରମ୍ଭ ହୋଇଛି ବର୍ଡର ଗାଭାସ୍କର ଟ୍ରଫି । ନାଗପୁରରେ ପ୍ରଥମ ମ୍ୟାଚରେ ଭାରତ ଦମଦାର ବିଜୟ ହାସଲ କରିଛି । ଗୋଟିଏ ଇନିଂସ ଓ ୧୩୨ ରନରେ କଙ୍ଗାରୁ ଦଳକୁ ପରାସ୍ତ କରିଛି ଟିମ ଇଣ୍ଡିଆ । ଦୁଇଟି ଯାକ ଇନିଂସ୍ରେ ଭାରତ ପାଇଁ ପ୍ରଭାଶାଳୀ ପ୍ରଦର୍ଶନ କରି ପ୍ଲେୟାର ଅଫ ଦ ମ୍ୟାଚ୍ ବିବେଚିତ ହେଲେ ରବିନ୍ଦ୍ର ଜାଡ଼େଜା । ତେବେ ଏହି ମ୍ୟାଚ୍ରେ ଭଲ ପ୍ରଦର୍ଶନ କରିପାରି ନାହାନ୍ତି ଲୋକେଶ ରାହୁଲ । ଯାହାକୁ ନେଇ ରାହୁଲଙ୍କୁ ସମାଲୋଚନା କରିଛନ୍ତି ଭାରତର ପୂର୍ବତନ ଦ୍ରୁତ ବୋଲର ଭେଙ୍କଟେସ ପ୍ରସାଦ ।
ପୂର୍ବତନ ଭାରତୀୟ ଦ୍ରୁତ ବୋଲର ଭେଙ୍କଟେସ ପ୍ରସାଦ କହିଛନ୍ତି, "ଅଷ୍ଟ୍ରେଲିଆ ବିପକ୍ଷ ପ୍ରଥମ ଟେଷ୍ଟ ମ୍ୟାଚ୍ରେ ରାହୁଲଙ୍କ ଚୟନ ପକ୍ଷପାତ ଉପରେ ଆଧାରିତ ଥିଲା ।" ଲଗାତାର ଭଲ ପ୍ରଦର୍ଶନ ଜାରି ରଖିଥିବା ଶୁଭମନ ଗିଲଙ୍କ ବଦଳରେ ଏହି ମ୍ୟାଚ୍ରେ ଲୋକେଶ ରାହୁଲଙ୍କୁ ଚୟନ କରାଯାଇଥିଲା । କିନ୍ତୁ ରାହୁଲ ଏହି ମ୍ୟାଚ୍ରେ ୭୧ ବଲରେ ୨୦ ରନର ସଙ୍ଘର୍ଷପୂର୍ଣ୍ଣ ପାଳି ଖେଳିଥିଲେ । ଏନେଇ ରାହୁଲ ଓ ଚୟନକର୍ତ୍ତାଙ୍କ ସମାଲୋଚନା କରିଛନ୍ତି ଭେଙ୍କଟେଶ ପ୍ରସାଦ । ନିଜ ଟ୍ବିଟର ପୃଷ୍ଠାରେ ସେ ଲେଖିଛନ୍ତି, "ରାହୁଲଙ୍କ ଚୟନ ପ୍ରଦର୍ଶନ ନୁହେଁ, ବରଂ ପକ୍ଷପାତ ଆଧାରରେ କରାଯାଇଛି । ତାଙ୍କ ପ୍ରଦର୍ଶନରେ ଲଗାତାର ଭାବେ ନିରନ୍ତରତାର ଅଭାବ ଦେଖାଦେଇଛି । ପ୍ରାୟ ୮ ବର୍ଷ ଧରି ଏଭଳି ଚାଲିଛି । ସେ ନିଜ କ୍ଷମତାକୁ ପ୍ରଦର୍ଶନରେ ବଦଳାଇ ପାରିନାହାନ୍ତି ।"