গুৱাহাটী, ৯ ছেপ্টেম্বৰ: শিলসাঁকোত পুনৰ সক্ৰিয় হৈ পৰিছে একাংশ মাটিৰ দালাল । শিলসাঁকোৰ ভূমি অবৈধভাৱে দখল কৰা লোকক প্ৰশাসনে উচ্ছেদ কৰাৰ পিছত শেহতীয়াকৈ GMDA কৰ্তৃপক্ষই সীমা নিৰ্ধাৰণ কৰি ফেঞ্চিং দিয়াৰ কাম আৰম্ভ কৰিছে ।
তেনে সময়তে শিলসাঁকোত পুনৰ নতুন ৰূপত আগমন ঘটিছে ভূ-মাফিয়াৰ । এনে একাংশ মাটিৰ দালালে সীমা নিৰ্ধাৰণৰ বাবে অহা GMDAৰ একাংশ বিষয়াৰ লগত গোপন বুজা বুজি কৰি মাটি হস্তগত কৰাৰ অভিযোগ উত্থাপিত হৈছে ।
অভিযোগ অনুসৰি এনে মাটিৰ দালালে শিলসাঁকোৰ উচ্ছেদৰ পিছত সীমাৰ ভিতৰত নপৰা একাংশ ঘৰত GMDAৰ শিলসাঁকোৰ ভূমি সম্পৰ্কীয় এখন জাননী ফলক আঁৰি মাটিৰ গৰাকীৰ পৰা ধন দাবী কৰা ঘটনা শেহতীয়াকৈ পোহৰলৈ আহিছে । মাটিৰ দালালৰ এনে চক্ৰান্তত ভৰি দিয়া দুই-এগৰাকী ব্যক্তি উপায়ন্তৰ হৈ সংবাদ মাধ্যমৰ কাষ চাপিবলৈও বাধ্য হৈছে ।
মন কৰিবলগীয়া কথা এই যে, চলিত সপ্তাহৰ বৃহস্পতিবাৰে অৰ্থাৎ ৭ ছেপ্টেম্বৰত মুখ্যমন্ত্ৰী হিমন্ত বিশ্ব শৰ্মাই শিলসাঁকোৰ উচ্ছেদ সাময়িকভাৱে স্থগিত ৰখা বুলি ঘোষণা কৰিছিল । ইয়াৰ পূৰ্বে GMDAৰ অধ্যক্ষ নাৰায়ণ ডেকাই ১৩০ মিটাৰ ব্যাসাৰ্ধৰ ভিতৰত উচ্ছেদ কৰিবলগীয়া সকলো ঘৰ ইতিমধ্যে উচ্ছেদ কৰা হোৱা বুলি ঘোষণা কৰাৰ পিছত কৰ্তৃপক্ষই সীমা নিৰ্ধাৰণ কৰি ফেঞ্চিং দিয়া কাম আৰম্ভ কৰিছিল ।