পৰেশ বৰুৱা অবিহনে সম্পূৰ্ণ নহয় এই শান্তিচুক্তি গুৱাহাটী, 29 ডিচেম্বৰ: কেন্দ্ৰীয় চৰকাৰ আৰু আলফাৰ মাজত শুকুৰবাৰে নতুন দিল্লীৰ নৰ্থ ব্লকত স্বাক্ষৰিত হ’ব বহু প্ৰত্যাশিত শান্তিচুক্তি । এই চুক্তি স্বাক্ষৰিত হোৱাৰ পিচতে আনুষ্ঠানিকভাৱে আলফা ভংগ হ’ব যদিও ৰৈ যাব ৰক্তবীজ ৷ কিয়নো 2012 চনত দ্বিখণ্ডিত হোৱা সংযুক্ত মুক্তি বাহিনী অসমৰ পৰেশ বৰুৱা ফৈদ এতিয়াও মূলসূঁতিলৈ ঘূৰি অহা নাই ৷ যি দাবীৰে আলফাৰ জন্ম হৈছিল, সেই দাবীত এতিয়াও অটল হৈ আছে আলফা(স্বা) ৷ কিন্তু তাৰ পিচতো আত্মসমৰ্পণকাৰী একাংশ নেতাকলৈ চৰকাৰে শান্তি চুক্তি স্বাক্ষৰিত কৰিব খুজিছে ৷ য’ত নাই পৰেশ বৰুৱা ৷
আলফা-চৰকাৰৰ শান্তিচুক্তি সন্দৰ্ভত শান্তি আলোচনা প্ৰক্ৰিয়াৰ বাবে গঠিত সমিতিৰ অন্যতম সদস্য হিৰণ্য শইকীয়াই প্ৰতিক্ৰিয়া প্ৰকাশ কৰিছে ৷ সাংবাদিকৰে হোৱা এক সাক্ষাৎকাৰত শইকীয়াই কয় যে, পৰেশ বৰুৱা অবিহনে এই আলোচনা কেতিয়াও সম্পূৰ্ণ নহয় ৷ যদি পৰেশ বৰুৱাক আলোচনাৰ মজিয়ালৈ আনিব পৰা যায়, তেতিয়াহে এই প্ৰক্ৰিয়াই পূৰ্ণতা পাব বুলি তেওঁ মত ব্যক্ত কৰে ৷
উল্লেখ্য যে আলফা আৰু চৰকাৰৰ মাজত শান্তি আলোচনাৰ 2004 চনত পৰেশ বৰুৱাৰ পৰা সেউজ সংকেত লাভ কৰিছিল হিৰণ্য শইকীয়াই ৷ তাৰ পিচতে তেওঁ প্ৰথিতযশা সাহিত্যিক মামনি ৰয়ছম গোস্বামীক আগত ৰাখি চৰকাৰৰ সৈতে যোগসূত্ৰ স্থাপন কৰে ৷ চৰকাৰেও সদিচ্ছা প্ৰকাশ কৰাত 2005 চনত তদানীন্তন প্ৰধানমন্ত্ৰী মনমোহন সিঙৰ সৈতে তিনিলানি আলোচনা হয় ৷
কিন্তু সাৰ্বভৌমত্বৰ যি দাবী সেয়া আলফাই এৰিব নোখোজে আৰু চৰকাৰেও মানি ল’ব নিবিচাৰে ৷ তাৰ মাজতেই সেনা আৰু আলফাৰ সংঘাত আৰম্ভ হোৱাত এই আলোচনা প্ৰক্ৰিয়া স্থৱিৰ হয় ৷ হিৰণ্য শইকীয়াই লগতে কয় যে হীৰেন গোহাঁই তেতিয়া আলফাৰ বিৰোধিতা কৰিছিল । হীৰেন গোহাঁয়ে প্ৰস্তুত কৰা দাবী চনদ মতেই এতিয়া আলফাই শান্তিচুক্তিত স্বাক্ষৰ কৰিবলৈ ওলাইছে ৷ কিন্তু সেই দাবী চনদ অত্যন্ত দুৰ্বল আছিল বুলি কয় পিচিজিৰ সদস্যজনে ৷
তেওঁ লগতে কয় যে 2011 চনতেই শান্তিচুক্তি হ’লহেতেন ৷ কিন্তু চৰকাৰে তেতিয়াই ভুল কৰিলে । তদানীন্তন কেন্দ্ৰীয়মন্ত্ৰী পি চিদাম্বৰমে পৰেশ বৰুৱা অবিহনেই আলোচনা হ’ব বুলি কোৱাৰ পিচতেই আলফা দুভাগত বিভক্ত হ’ল ৷ আলফাক দূৰ্বল কৰাৰ বাবে এয়া চৰকাৰৰ কূটকৌশলো হ’ব পাৰে বুলি মন্তব্য কৰে শইকীয়াই ৷
তেওঁ আৰু কয় যে 2012 চনত আলফা স্বাধীনৰ জন্ম হ’ল আৰু পৰেশ বৰুৱাই তাকৰীয়া সৈন্যৰে হ’লেও আজি পৰ্যন্ত যুঁজ দি আহিছে ৷ পৰেশ বৰুৱাক বাদ দি এই আলোচনা কেতিয়াও সম্ভৱ নহয় ৷ যিদিনা পৰেশ বৰুৱা শান্তি আলোচনাৰ মেজলৈ আহিব, স্থায়ী শান্তিৰ সূত্ৰপাত তেতিয়াহে হ’ব ৷ ‘‘আলফা বুলি ক'লে পৰেশ বৰুৱাৰ ছবিখনহে মানুহৰ চকুত ভাঁহি উঠে ৷ পৰেশ বৰুৱা এতিয়াও নিজৰ আদৰ্শত অটল ৷ পৰেশ বৰুৱাক মই অসমৰ বীৰ বুলি ক’ব খোজোঁ ৷ এইগৰাকী বীৰক বাদ দি এই আলোচনাৰ পৰা কেতিয়াও সু-খবৰ নাপায় ৷’’ শইকীয়াই কয় ৷
লগতে পঢ়ক:অসমবাসীয়ে বিচৰা ধৰণেই এই চুক্তি : অনুপ চেতিয়া
