গুৱাহাটী, ১৩ জানুৱাৰী: ৰাজ্যত দিনক দিনে ভয়াৱহ হাৰত বৃদ্ধি পাইছে আক্ৰান্তৰ সংখ্যা (Covid cases increase in Assam)। যাৰ পৰিপ্ৰেক্ষিতত ইতিমধ্যে ৰাজ্যত বলৱৎ হৈছে ক'ভিড সম্পৰ্কীয় নতুন নীতি-নিৰ্দেশনা । পঞ্চম শ্ৰেণীলৈকে বিদ্যালয়সমূহ বন্ধ কৰি দিয়া হৈছে । গুৱাহাটী মহানগৰীত অষ্টম মান শ্ৰেণীলৈ বন্ধ কৰি দিয়া হৈছে বিদ্যালয় । লক্ষণীয় বিষয় যে গুৱাহাটী মহানগৰী ক'ভিড সংক্ৰমণৰ অভিকেন্দ্ৰ হিচাপে চিনাক্ত হৈছে ।
এসপ্তাহৰ আগলৈ গুৱাহাটীত ক'ভিডত দৈনিক আক্ৰান্তৰ সংখ্যা ৫০ ৰ ঘৰলৈ নামিছিল যদিও এই মূহুর্তত দৈনিক আক্ৰান্তই হাজাৰৰ ঘৰ অতিক্ৰম কৰিছে (Covid 19 updates of Assam)। ৰাজ্যৰ ৰাজধানী চহৰখনত ক'ভিডৰ নতুন ভেৰিয়েন্ট অ'মিক্ৰণ প্ৰৱেশ কৰাৰ তথ্য স্বাস্থ্য বিভাগে নিশ্চিত কৰাৰ পাছতেই সাধাৰণ জনতা শংকিত হৈ পৰিছে ।
ইফালে দৈনিক আক্ৰান্তৰ সংখ্যা উদ্বেগজনকভাৱে বৃদ্ধি পোৱাত উদ্বিগ্ন হৈ পৰিছে স্বাস্থ্য বিভাগ । স্বাস্থ্য বিভাগে প্ৰকাশ কৰা তথ্য অনুসৰি শুকুৰবাৰে ৰাজ্যত নতুনকৈ ৩,২৩৮ গৰাকী লোক ক'ভিডত আক্ৰান্ত হৈছে । ইয়াৰে ১,০৭০ গৰাকী লোক গুৱাহাটী মহানগৰীৰ । আক্ৰান্তৰ হাৰ ৭.৮৭ শতাংশলৈ বৃদ্ধি পাইছে । দৈনিক দ্ৰুত গতিত বৃদ্ধি পাইছে আক্ৰান্তৰ সংখ্যা । আজিৰ দিনটোত ৰাজ্যৰ ৪১,১৬৫ গৰাকী লোকৰ ক'ভিড টেষ্ট কৰা হৈছিল ।