গুৱাহাটী,১২ জুলাই: মুখ্যমন্ত্ৰী হিমন্ত বিশ্ব শৰ্মাৰ সভাপতিত্বত বুধবাৰে জনতা ভৱনত অনুষ্ঠিত হয় ৰাজ্য চৰকাৰৰ সাপ্তাহিক কেবিনেট বৈঠক । কেবিনেট বৈঠকত কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয় । বৈঠকৰ অন্তত কেবিনেটৰ সিদ্ধান্তসমূহ সংবাদমেল যোগে সদৰী কৰে মন্ত্রী কেশৱ মহন্ত আৰু ডাঃ ৰণোজ পেগুৱে ।
কেবিনেটৰ সিদ্ধান্ত অনুসৰি ৰাজ্যৰ অন্যান্য পিছপৰা শ্ৰেণীৰ বাবে শিক্ষা বিভাগৰ অধীনত মহাবিদ্যালয় আৰু বিশ্ববিদ্যালয়সমূহত আসনৰ সংখ্যা ১৫ শতাংশৰ পৰা ২৭ শতাংশলৈ বৃদ্ধি কৰা হৈছে । সেইদৰে চাহ বাগিচা অঞ্চলৰ বিদ্যালয়সমূহত মধ্যহ্ন ভোজনত সপ্তাহত তিনিটাকৈ কণী দিয়াৰ সিদ্ধান্ত গ্ৰহণ কৰা হৈছে । ইয়াৰ আগতে এটাকৈ কণী দিয়া হৈছিল ।
কেবিনেটত ছয় জনগোষ্ঠীৰ বাবে বিশেষভাৱে আসন সংৰক্ষণৰ ব্যৱস্থা কৰা হৈছে । আজিৰ কেবিনেটৰ সিদ্ধান্ত অনুসৰি মহাত্মা গান্ধী আন্তঃৰাষ্ট্ৰীয় হিন্দী বিশ্ববিদ্যালয়ৰ এটা চৌহদ বকোত হ'ব আৰু তাৰ বাবে চৰকাৰে মাটি দিব । কেবিনেটৰ সিদ্ধান্ত অনুসৰি এতিয়াৰে পৰা যিকোনো চৰকাৰী কৰ্মচাৰীয়ে চাকৰিৰ কাৰ্যকালত ৩ বছৰৰ পৰা ৫ বছৰলৈ সুগমৰ পৰা দুৰ্গম লৈ চাকৰি কৰিবলৈ যাব লাগিব ।