নতুন দিল্লী, 21 মাৰ্চ: অৱশেষত গ্ৰেপ্তাৰ কৰা হ’ল দিল্লীৰ মুখ্যমন্ত্ৰী অৰবিন্দ কেজৰিৱালক ৷ দিল্লীৰ সুৰানীতি কেলেংকাৰীৰ অভিযোগত অভিযুক্ত আপ নেতাগৰাকীক ইডিয়ে 9 খনকৈ চমন দিয়াৰ পিচতো হাজিৰ হোৱাৰ নাছিল ৷ অৱশেষত দশমখন চমন লৈ কেজৰিৱালৰ বাসগৃহত বৃহস্পতিবাৰে সন্ধিয়া উপস্থিত হয় প্ৰৱৰ্তন সঞ্চালকালয়ৰ 12 জনীয়া এটা দল ৷
বৃহস্পতিবাৰে দিল্লীৰ মুখ্যমন্ত্ৰীগৰাকীৰ বাসগৃহত ইডিৰ দলটো উপস্থিত হৈ প্ৰায় দুঘন্টা তেওঁক জেৰা কৰাৰ লগতে বিভিন্ন অনুসন্ধান চলায় ৷ অনুসন্ধানকাৰী দলটোৱে কেজৰিৱালৰ মোবাইল ফোনকে ধৰি আন বহু সামগ্ৰী জব্দ কৰে ৷ ইপিনে মুখ্যমন্ত্ৰীগৰাকীৰ বাসগৃহত এই অভিযান চলি থকাৰ সময়ছোৱাত তেওঁৰ ঘৰৰ চৌদিশে নিয়োগ কৰা হয় ৰেপিড এক্সন ফ’ৰ্চ(RAF). একেদৰে সেই সময়তেই দিল্লী চৰকাৰৰ কেবাগৰাকীও মন্ত্ৰীৰ লগতে দিল্লী বিধানসভাৰ অধ্যক্ষ আৰু আম আদমি পাৰ্টীৰ বহু শীৰ্ষ নেতা সমবেত হয় কেজৰিৱালৰ বাসগৃহত ৷ গ্ৰেপ্তাৰৰ পিচতেই দিল্লী চৰকাৰৰ মন্ত্ৰী আতিশী সিঙে স্পষ্ট কৰি দিছে যে গ্ৰেপ্তাৰ হ’লেও মুখ্যমন্ত্ৰীৰ আসনত কেজৰিৱালেই অধিস্থিত হৈ থাকিব ৷ আনহাতে কেজৰিৱালৰ গ্ৰেপ্তাৰৰ পিচতে উচ্চতম ন্যায়ালয়ৰ কাষ চাপিছে আপ ৷