Lakshya Sen: 'సయ్యద్ మోదీ ఇంటర్నేషనల్ సూపర్ 300' టోర్నమెంట్లో పాల్గొనడం లేదని ప్రకటించాడు ఇండియా ఓపెన్ 2022 ఛాంపియన్ లక్ష్య సేన్. గతేడాది అక్టోబర్ నుంచి తీరిక లేకుండా బ్యాడ్మింటన్ టోర్నీల్లో పాల్గొంటున్నానని, శారీరకంగా ఎంతో అలసిపోయినందు వల్లే ఈ నిర్ణయం తీసుకుంటున్నట్లు నిర్వాహకులకు ఓ లేఖలో తెలిపాడు. మార్చి నుంచి అన్ని టోర్నీలకు అందుబాటులో ఉంటానని స్పష్టం చేశాడు.
"ఇండియా ఓపెన్ టోర్నమెంట్ను విజయవంతంగా పూర్తి చేశా. ఇప్పుడు బాగా అలసిపోయినట్లు అన్పిస్తోంది. ఇలాంటి పరిస్థితుల్లో టోర్నీలో పాల్గొంటే న్యాయం చేయలేను అనే భయాందోళన ఉంది. అందుకే టోర్నీకి దూరంగా ఉండాలని భావిస్తున్నా. నా కోచ్లు, ఫిజియోలు, కుటుంబ సభ్యులను సంప్రదించిన తర్వాతే ఈ నిర్ణయం తీసుకున్నా. టోర్నీ నుంచి వైదొలుగుతున్నందుకు నిర్వాహకులకు క్షమాపణలు చెబుతున్నా. వాళ్లు నా పరిస్థితిని అర్థం చేసుకుంటారనే విశ్వాసం ఉంది. టోర్నమెంట్ సాఫీగా సాగుతుందని ఆశిస్తున్నా. ఇందులో పాల్గొంటున్న అందరికీ, ప్రత్యేకించి భారత ఆటగాళ్లకు విషెస్ చెబుతున్నా."
-లక్ష్య సేన్
India open 2022 champion
దిల్లీ వేదికగా జరిగిన ఇండియా ఓపెన్ 2022లో గెలిచి వరల్డ్ ఛాంపియన్ లోహ్ కీన్యూకు షాక్ ఇచ్చాడు లక్ష్యసేన్. ఉత్తరాఖండ్కు చెందిన ఈ యువకెరటం గతేడాది అక్టోబర్ నుంచి ఇప్పటివరకు 9 టోర్నీల్లో పాల్గొన్నాడు. తీరిక లేకండా షటిల్ ఆడుతున్నాడు. డచ్ ఓపెన్లో ఫైనల్స్ చేరడమే గాక, హైలో టోర్నీలో సెమీఫైనల్స్, వరల్డ్ టూర్ ఫైనల్స్లో నాకౌట్ దశకు చేరాడు.
భారత షట్లర్లు ఈ ఏడాది కామన్వెల్త్ గేమ్స్ వంటి పెద్ద టోర్నీతో పాటు ఏషియన్ గేమ్స్, వరల్డ్ ఛాంపియన్స్, ఆల్ ఇంగ్లాండ్ ఛాంపియన్స్ వంటి ముఖ్యమైన టోర్నీల్లో పాల్గొనాల్సి ఉంది. అందుకే సాత్విక్సాయి రాజ్, చిరాగ్ శెట్టి జోడి కూడా సయ్యద్ మోదీ టోర్నీకి దూరంగా ఉండనున్నట్లు ఇప్పటికే ప్రకటించింది. కిదాంబి శ్రీకాంత్, అశ్వని పొన్నప్ప కూడా పాల్గొనడం లేదు.
సయ్యద్ మోదీ ఇంటర్నేషనల్ టోర్నీ జనవరి 18నుంచి 23వరకు ఉత్తర్ప్రదేశ్ రాజధాని లఖ్నవూలో జరగనుంది.
అతిపెద్ద విజయం..
ఇండియా ఓపెన్ ఛాంపియన్గా అవతరించిన అనంతరం ఆదివారం తన అనుభవాన్ని షేర్ చేసుకున్నాడు లక్ష్య సేన్. మ్యాచ్ సమయంలో కొంచెం ఆందోళనకు గురైనట్లు చెప్పాడు. అయితే గెలిచిన తర్వాత చాలా సంతోషంగా ఉందన్నాడు. ప్రపంచ టోర్నీల్లో ఇదే తనకు అతిపెద్ద విజయం అని హర్షం వ్యక్తం చేశాడు.
ఇదీ చదవండి: ఇంగ్లాండ్ జట్టు కోసం రూట్ త్యాగం.. ఐపీఎల్కు దూరం
