Joe root ipl 2022: ఈ ఏడాది జరిగే ఐపీఎల్ వేలానికి తాను అందుబాటులో ఉంటానని కొద్ది రోజులుగా వస్తున్న వార్తలపై స్పష్టతనిచ్చాడు ఇంగ్లాండ్ టెస్టు జట్టు కెప్టెన్ జో రూట్. తాను మెగా వేలంలో పాల్గొనడం లేదని తెలిపాడు. ఆస్టేలియాతో జరిగిన యాషెస్ సిరీగ్ను 4-0 తేడాతో కోల్పోయిన అనంతరం మీడియా సమావేశంలో ఈ విషయాన్ని వెల్లడించాడు.
" ఈ ఏడాది ఐపీఎల్ వేలానికి నా పేరు ఇవ్వడం లేదు. ఇంగ్లాండ్ టెస్టు జట్టుకు నేను ఇంకా చాలా చేయాల్సి ఉంది. అందుకు నా శాయశక్తులు అవసరం అవుతాయి. ఆ అవకాశం నాకు దక్కుతుందనే భావిస్తున్నా. ఇంగ్లాండ్ టెస్టు క్రికెట్కు అద్భుత ఆదరణ ఉంటుంది. నేను కూడా టెస్టు క్రికెట్కే అత్యంత ప్రాధాన్యం ఇస్తా. అవసరమైతే జట్టు కోసం ఎలాంటి త్యాగమైనా చేసేందుకు సిద్ధం."
--జో రూట్, ఇంగ్లాండ్ టెస్టు జట్టు సారథి.
స్టార్క్ రిటర్న్..
చాలా ఏళ్ల గ్యాప్ తర్వాత ఐపీఎల్కు రీ ఎంట్రీ ఇచ్చేందుకు సిద్ధమవుతున్నట్లు ఆస్ట్రేలియా స్టార్ బౌలర్ మిచెల్ స్టార్క్ గతవారం చెప్పాడు. దాదాపు 6 సంవత్సరాలు ఈ టోర్నీకి దూరంగా ఉన్న అతడు.. ఈసారి ఆడనున్నట్లు తెలిపాడు. టీ20 ప్రపంచ కప్ ఈ ఏడాదే జరగనుండటం వల్ల ఐపీఎల్ ఆడితే ఆ అనుభవం ఉపయోగపడుతుందని భావిస్తున్నట్లు చెప్పాడు. ఆస్ట్రేలియా జట్టు షెడ్యూల్ ఎలా ఉన్నప్పటికీ.. టోర్నీలో ఆడేందుకు ప్రయత్నిస్తానన్నాడు.
చివరగా ఐపీఎల్లో ఆర్సీబీ తరఫున 27 మ్యాచ్లు ఆడాడు స్టార్క్. ఆ తర్వాత నుంచి టోర్నీకి దూరంగా ఉన్నాడు.
ఐపీఎల్లో ఈ ఏడాది 10 జట్లు పాల్గొనబోతున్నాయి. అహ్మదాబాద్, లఖ్నవూ ప్రాంఛైజీలకు బీసీసీఐ ఇప్పటికే అధికారిక అనుమతులు ఇచ్చింది. కరోనా కేసులు తగ్గితే టోర్నీని భారత్లోనే నిర్వహించనున్నారు. లేకపోతే విదేశాలకు వెళ్లేలా ప్రణాళికలు రూపొందిస్తున్నారు.
ఇదీ చదవండి: 100వ టెస్టుకు కెప్టెన్సీ ఆఫర్.. తిరస్కరించిన కోహ్లీ!
