Virat Kohli At No 4 : టీమ్ఇండియా వన్డేల్లో నాలుగో స్థానం కొన్ని రోజుల నుంచి చర్చనీయాంశంగా మారింది. గాయపడిన స్టార్ ప్లేయర్లు కేఎల్ రాహుల్, శ్రేయస్ అయ్యర్.. ప్రపంచకప్లోపు పూర్తి ఫిట్నెస్తో తిరిగి జట్టులోకి వస్తే.. ఎలాంటి ఇబ్బంది ఉండదు. కానీ అలా వారు రాకపోతే అది ప్రధాన సమస్యే అవుతుంది.
అందుకని జట్టు మేనేజ్మెంట్ ఇప్పటికే పలువురిని నాలుగో స్థానంలో పరిశీలించింది. కాగా రీసెంట్గా ఆ స్థానంలో కెప్టెన్ రోహిత్ శర్మ రావొచ్చని కొన్ని కథనాలు వచ్చాయి. కానీ ఆ స్థానంలో స్టార్ బ్యాటర్ విరాట్ కోహ్లీని ఆడించాలని టీమ్ఇండియా మాజీ కోచ్ రవిశాస్త్రి.. ఎప్పుడో భావించాడట. మరి రవిశాస్త్రి ఎందుకు అలా అనుకున్నాడంటే..
చాలా కాలం నుంచి వన్డేల్లో.. టీమ్ఇండియా టాపార్డర్ పటిష్ఠంగా ఉంది. కానీ ఒకసారి జట్టు మొదటి మూడు వికెట్లు కోల్పోతే పరిస్థితి ఎంత ఘోరంగా ఉంటుందో 2019 ప్రపంచకప్ రెండో సెమీఫైనల్ భారత్ వర్సెస్ న్యూజిలాండ్ మ్యాచ్లో చూశామని శాస్త్రి అన్నాడు. ఆ మ్యాచ్లో టీమ్ఇండియా 240 పరుగుల ఛేదనలో.. 5 పరుగులకే ఓపెనర్లు సహా, విరాట్ కూడా ఔటయ్యాడు. తర్వాత మంచి బ్యాటింగ్ లైనప్ ఉన్నప్పటికీ.. భారత్ ఆ మ్యాచ్లో 18 పరుగుల తేడాతో ఓడి టోర్నీ నుంచి నిష్క్రమించింది.
అయితే బ్యాటింగ్ లైనప్ను బ్యాలెన్స్ చేయడానికి.. 2019 వరల్డ్ కప్ ఇంగ్లాండ్తో మ్యాచ్లో విరాట్ను నాలుగో స్థానంలో పంపాలని శాస్త్రి అనుకున్నాడట. అప్పుడు టాపార్డర్ విఫలమైనా.. మిడిల్లో కోహ్లీ పరిస్థితిని చక్కబెడతడని భావించాడట. కానీ అప్పుడు అది కుదరలేదు. అయితే అదే టోర్నమెంట్ సెమీస్లో భారత్కు ఎదురైన పరాభవం శాస్త్రి భయాలను నిజం చేసిందట. అందుకే 34 ఏళ్ల విరాట్ సేవలు.. జట్టుకు అవసరమైతే నాలుగో స్థానంలో వాడుకోవాలని అభిప్రాయపడ్డాడు.
" టీమ్ఇండియాలో పొజిషన్ నెంబర్ 4 కోసం నేను ఆలోచించిన సందర్భాలు చాలా ఉన్నాయి. గతంలో నేను కోచ్గా ఉన్న సమయంలో.. 2019 ప్రపంచ కప్లో విరాట్ను నాలుగో ప్లేస్లో ఆడించడానికి చీఫ్ సెలెక్టర్ ఎమ్ఎస్కే ప్రసాద్తో కూడా చర్చించాను. విరాట్ నాలుగో స్థానంలో ఆడితే మిడిల్ ఆర్డర్ పటిష్ఠంగా మరవచ్చు" అని రవిశాస్తి అభిప్రాయపడ్డాడు.
విరాట్ నాలుగో స్థానంలో రికార్డులు.. విరాట్ వన్డేల్లో 42 మ్యాచ్ల్లో నాలుగో స్థానంలో బ్యాటింగ్కు వచ్చాడు. ఈ స్థానంలో విరాట్ 55.21 సగటుతో 1767 పరుగులు చేశాడు. ఇందులో 7 సెంచరీలు ఉన్నాయి. ఇందులో విరాట్ ఫేమస్ ఇన్నింగ్స్ (86 బంతుల్లో 133*) 2012 శ్రీలంకపై నాలుగో స్థానంలో వచ్చి సాధించిందే. అలాగే అదే శ్రీలంకపై మళ్లీ.. నాలుగో స్థానంలోనే 2014 రాంచీలో139* పరుగులు చేశాడు. ఇక ఆ తర్వాత 2019, 2020లో ఆస్ట్రేలియాతో జరిగిన మ్యాచ్ల్లో నెంబర్ 4లో బ్యాటింగ్ చేశాడు విరాట్. కానీ ఈ రెండింట్లో 7, 16 పరుగులే చేసి ఔటయ్యాడు.
మరోవైపు జట్టు మేనేజ్మెంట్ ఈ ప్లేస్లో సంజు శాంసన్, సూర్య కుమార్, ఇషాన్ కిషన్ను పరీక్షిస్తోంది. అలాగే అటు రాహుల్, శ్రేయస్ కూడా కోలుకుంటున్న సమయంలో.. విరాట్ నాలుగులో బ్యాటింగ్ చేసే అవకాశం ఉందా? లేదా? అనేది కాలమే నిర్ణయిస్తుంది.
