Karnataka Church Attack : కర్ణాటక మైసూరులోని సెయింట్ మేరీస్ చర్చిపై గుర్తు తెలియని వ్యక్తులు మంగళవారం దాడి చేశారు. బేబీ జీసస్ విగ్రహంతో పాటు చర్చిలోని ఇతర సామగ్రిని ధ్వంసం చేశారు. చర్చిలోని మరికొన్ని వస్తువులను దొంగిలించిన నిందితులు.. అనంతరం అక్కడి నుంచి పరారయ్యారు. చర్చి పాస్టర్ ఫాదర్ జాన్ పాల్ ఫిర్యాదుతో.. కేసు నమోదు చేసిన పోలీసులు దర్యాప్తు చేపట్టారు. చర్చి ప్రాంగణంలో ఉన్న సీసీటీవీ కెమెరాలను పరిశీలిస్తున్నారు. నిందితులను త్వరలోనే పట్టుకుంటామని చెప్పారు.
క్రిస్మస్ జరిగిన రెండు రోజుల్లోనే ఈ ఘటన జరగడం ప్రాధాన్యం సంతరించుకుంది. క్రిస్మస్ విహార యాత్రకు వెళ్లిన చర్చి ఉద్యోగి మంగళవారం సాయంత్రం 6 గంటల సమయంలో వచ్చి చూడగా ఈ విషయం వెలుగులోకి వచ్చింది. వెంటనే పాస్టర్కు సమాచారం అందించాడు. నిందితులు చర్చి వెనుక డోర్ నుంచి వచ్చి ఈ విధ్వంసం సృష్టించారని పోలీసులు భావిస్తున్నారు. చర్చిలోని హుండీని సైతం దుండగులు ఎత్తుకెళ్లారు.
కొంతకాలంగా బలవంతపు మతమార్పిళ్ల ఆరోపణల నేపథ్యంలో ఉత్తరాఖండ్, ఉత్తర్ ప్రదేశ్, కేరళ రాష్ట్రాల్లోని క్రిస్టియన్ మిషనరీలు, చర్చిలపై దాడులు జరుగుతున్నాయి. బలవంతపు మత మార్పిళ్లకు పాల్పడే వారిపై కఠిన చర్యలు తీసుకుంటామని కర్ణాటక ముఖ్యమంత్రి బసవరాజ్ బొమ్మై గతేడాదే ప్రకటించారు.
ఇవీ చదవండి : మోదీ తల్లికి అస్వస్థత.. హుటాహుటిన ఆస్పత్రికి తరలింపు
'దేశ ప్రజలను విద్వేషాలతో విడగొడుతున్నారు'.. కాంగ్రెస్ ఆవిర్భావ వేడుకల్లో ఖర్గే
