Sonia Gandhi Ghulam Nabi Azad meet: కాంగ్రెస్ సీనియర్ నేత గులాం నబీ ఆజాద్.. ఆ పార్టీ అధినేత్రి సోనియా గాంధీతో శుక్రవారం సాయంత్రం భేటీ అయ్యారు. ఐదు రాష్ట్రాల ఎన్నికల్లో కాంగ్రెస్ పార్టీ ఘోర పరాజయం, జీ23 నేతల సమావేశం, గాంధీల నాయకత్వ మార్పు వంటి అంశాలపై చర్చ జరుగుతున్న నేపథ్యంలో సోనియాతో ఆజాద్ భేటీ ప్రాధాన్యం సంతరించుకుంది.
రానున్న అసెంబ్లీ ఎన్నికల్లో పార్టీని విజయతీరాలకు చేర్చటం సహా పలు కీలక అంశాలపై చర్చించినట్లు చెప్పారు ఆజాద్.
"సోనియా గాంధీతో సమావేశం సానుకూలంగా సాగింది. రానున్న అసెంబ్లీ ఎన్నికలకు ఏ విధంగా సిద్ధం కావాలి, ప్రత్యర్థి పార్టీలపై ఐక్యంగా పోరాడటంపై చర్చించాం. ఈ భేటీ మీడియాకు వార్త కావొచ్చేమో కానీ ఇది సాధారణ సమావేశమే. సోనియాతో భవిష్యత్తులోనూ సమావేశాలు ఉంటాయి. పార్టీని బలోపేతం చేయటంపై పార్టీ నేతలతో సోనియా చర్చలు జరుపుతున్నారు. కొద్ది రోజుల క్రితం వర్కింగ్ కమిటీ సమావేశమై పార్టీని ఏ విధంగా బలోపేతం చేయవచ్చని సూచనలు కోరింది. ఐదు రాష్ట్రాల అసెంబ్లీ ఎన్నికల్లో ఓటమికి గల కారణాలను అడిగింది. నా సూచనలను సైతం చెప్పాను. "
- గులాం నబీ ఆజాద్, కాంగ్రెస్ సీనియర్ నేత.
ఎలాంటి సూచనలు చేశారని విలేకరులు ప్రశ్నించగా.. అన్నింటిని గుర్తుంచుకోవటం సాధ్యం కాదని సమాధానమిచ్చారు ఆజాద్. పార్టీని పునర్వ్యవస్థీకరించేందుకు తీసుకోవాల్సిన చర్యలపై జీ-23 నేతలు సమావేశమైన మరుసటి రోజునే సోనియాతో ఆజాద్ భేటీ కావటం ప్రాధాన్యం సంతరించుకుంది.
జీ23 నేతల ప్రతిపాదనలు..
పార్టీ బలోపేతం కావాలంటే ప్రతిస్థాయిలో సమష్టి, సమ్మిళిత నాయకత్వంతోనే సాధ్యమవుతుందని అభిప్రాయపడ్డారు జీ23 నేతలు. 2024 ఎన్నికల్లో భాజపాను గద్దెదించాలంటే కాంగ్రెస్ విధానాలకు దగ్గరగా ఉండే పార్టీలతో అధిష్ఠానం చర్చలు జరిపి కూటమిని ఏర్పాటు చేసే దిశగా అడుగులు వేయాలని పేర్కొన్నారు. సీడబ్ల్యూసీ భేటీలో తీసుకున్న నిర్ణయాలు, పార్టీ బలోపేతానికి గల మార్గాలపై నేతలు చర్చించారు.
ఇదీ చూడండి: మరోసారి జీ23 నేతల సమావేశం.. హుడాతో రాహుల్ భేటీ
