ମଦ ଦୋକାନ ଉଚ୍ଛେଦ ଦାବିରେ ରାସ୍ତାରୋକ, ଛାତ୍ର ଓ ମହିଳା କଂଗ୍ରେସର ବିକ୍ଷୋଭ

ପୁରୀ: ମଦ ଦୋକାନ ଉଚ୍ଛେଦ ଦାବିରେ ରାସ୍ତାରୋକ । ମଦ ଦୋକାନ ହଟାଇବା ଦାବିରେ ପୁରୀରେ ଛାତ୍ର ଓ ମହିଳା କଂଗ୍ରେସ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି । ଛାତ୍ର କଂଗ୍ରେସ ପକ୍ଷରୁ ଗୋପାଳବଲ୍ଲଭ ରୋଡଠାରେ ଥିବା ମଦ ଦୋକାନ ସମ୍ମୁଖରେ ହଙ୍ଗାମା ହୋଇଛି । ଗୋପାଳବଲ୍ଲଭ ରୋଡରେ ଥିବା ମଦ ଦୋକାନଟି ଜନଗହଳିପୂର୍ଣ୍ଣ ସ୍ଥାନରେ ଅବସ୍ଥିତ । ଏହା ନିକଟରେ ଏକ ହୋମିଓପାଥି ଚିକିତ୍ସାଳୟ ଏବଂ ଅନେକ ସାମାଜିକ ଅନୁଷ୍ଠାନ ରହିଛି। ଦୋକାନକୁ ଆସୁଥିବା ବ୍ୟକ୍ତିମାନେ ମଦ୍ୟପାନ କରି ଅପ୍ରୀତିକର ପରିସ୍ଥିତି ସୃଷ୍ଟି କରୁଛନ୍ତି। ଏହି ମଦ ଦୋକାନ ଜନଗହଳିପୂର୍ଣ୍ଣ ଅଞ୍ଚଳରେ ଥିବାରୁ ନାନା ସମସ୍ୟାର ସମ୍ମୁଖୀନ ହେଉଛନ୍ତି ଲୋକେ ।

ଯାହାକି ସ୍ଥାନୀୟ ଅଞ୍ଚଳରେ ଥିବା ଛାତ୍ରଛାତ୍ରୀଙ୍କ ଉପରେ କୁପ୍ରଭାବ ପଡୁଛି। ସେହିପରି ଝିଅ ବୋହୂ ଏହି ରାସ୍ତାରେ ଯାତାୟତ କରୁଥିବାବେଳେ ଅଶାଳୀନ ବ୍ୟବହାରର ଶିକାର ହେଉଛନ୍ତି। ମଦ୍ୟପମାନେ ବିଭିନ୍ନ ସମୟରେ ମହିଳାଙ୍କୁ ଦୁର୍ବ୍ୟବହାର କରୁଥିବା ନଜିର ରହିଛି । ସେହିପରି ମଦ ଦୋକାନ ଯୋଗୁ ସ୍ଥାନୀୟ ଅଞ୍ଚଳରେ ଅନେକ ଅସାମାଜିକ କାର୍ଯ୍ୟକଳାପ ବଢୁଛି । ଏହା ସହିତ ଚୋରି ଡକାୟତି ଭଳି ଘଟଣା ମଧ୍ୟ ବଢ଼ିବାରେ ଲାଗିଛି। ଯାହାକୁ ନେଇ ସ୍ଥାନୀୟ ଅଞ୍ଚଳରେ ଅସୁରକ୍ଷିତ ବାତାବରଣ ସୃଷ୍ଟି ହୋଇଛି । ହେଲେ ପ୍ରଶାସନ ଏ ଦିଗରେ ଦୃଷ୍ଟି ଦେଉନଥିବା ଅଭିଯୋଗ ହୋଇଛି ।

ଏନେଇ ପୂର୍ବତନ କାଉନସିଲର ସରସ୍ବତୀ ପାତ୍ର କହିଛନ୍ତି, ଏହି ମଦ ଦୋକାନ ଯୋଗୁଁ ପ୍ରତିଦିନ ମହିଳାମାନେ ଦୁର୍ବବ୍ୟବହାରର ଶିକାର ହେଉଛନ୍ତି । ସମାଜ ଉପରେ ଏହାର କୁପ୍ରଭାବ ପଡୁଛି । ଐତିହାସିକ ସହର ପୁରୀରେ ପରିକ୍ରମା ପ୍ରକଳ୍ପ କରାଯାଉଥିବାବେଳେ ଏଭଳି ଘଟଣା ପ୍ରତି କେମିତି ଦୃଷ୍ଟି ଦିଆଯାଉନାହିଁ? ତୁରନ୍ତ ସମସ୍ୟାର ସମାଧାନ ନହେଲେ ଆଗକୁ ଆନ୍ଦୋଳନ ଆହୁରି ତୀବ୍ରତର ହେବ ।"

ଏନେଇ ଥାନାରେ ବାରମ୍ବାର ଅଭିଯୋଗ ସତ୍ତ୍ବେ ପୋଲିସ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଉନଥିବା ଅଭିଯୋଗ ହୋଇଆସୁଛି। ଯାହାର ପ୍ରତିବାଦରେ ଛାତ୍ର ଓ ମହିଳା କଂଗ୍ରେସ ପକ୍ଷରୁ ଧାରଣା ଦିଆଯାଇଥିବା ଦେଖିବାକୁ ମିଳିଛି । ଏହାସହ ବିକ୍ଷୋଭ ପ୍ରଦର୍ଶନ କରିଛନ୍ତି କଂଗ୍ରେସ କର୍ମୀ । ଆଉ ଦାବି ପୂରଣ ନହେଲେ ଆନ୍ଦୋଳନ ଜୋରଦାର ହେବ ବୋଲି କଂଗ୍ରେସ ପକ୍ଷରୁ ଚେତାବନୀ ଦିଆଯାଇଛି ।

ଇଟିଭି ଭାରତ, ପୁରୀ