ଢେଙ୍କାନାଳ: ଜିଲ୍ଲା ପରଜଙ୍ଗ ଥାନାର ଅତିରିକ୍ତ ଥାନା ଅଧିକାରୀ ବିର କିଶୋର ମଲ୍ଲିକଙ୍କର ଆଜି ଅକସ୍ମାତ ମୃତ୍ୟୁ ଘଟିଛି । ହୃଦଘାତ ଜନିତ ମୃତ୍ୟୁ ଘଟିଥିବା ଡାକ୍ତର ସୂଚନା ଦେଇଛନ୍ତି । ବୀର କିଶୋର ପରଜଙ୍ଗ ସ୍ଥିତ ସରକାରୀ ଥାନା କ୍ୱାଟରରେ ରହୁଥିଲେ । ତାଙ୍କୁ ଢେଙ୍କାନାଳ ଜିଲ୍ଲା ମୁଖ୍ୟ ଡାକ୍ତରଖାନାକୁ ଚିକିତ୍ସା ପାଇଁ ଭର୍ତ୍ତି କରିଥିଲେ ମଧ୍ୟ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଛନ୍ତି । ଏହି ଖବର ପାଇ ଡାକ୍ତରଖାନାକୁ ଢେଙ୍କାନାଳ ଏସପି ଜ୍ଞାନରଞ୍ଜନ ମହାପାତ୍ର ସମେତ ପୋଲିସ ଅଧିକାରୀମାନେ ପହଁଞ୍ଚିଥିବା ଜଣାପଡିଛି । ମୃତ ପୋଲିସ ଥାନା ଅଧିକାରୀ ବୀର କିଶୋରଙ୍କ ଘର କେନ୍ଦ୍ରାପଡା ଆଳି ଅଞ୍ଚଳରେ ।
ଗତ କିଛିଦିନ ହେଲା ସେ ରାଉରକେଲାରୁ ଢେଙ୍କାନାଳକୁ ବଦଳି ହୋଇ ଆସିଥିଲେ । ପରଜଙ୍ଗ ଥାନାର ଅତିରିକ୍ତ ଥାନା ଅଧିକାରୀ ଭାବେ କାର୍ଯ୍ୟରତ ଥିଲେ। ତାଙ୍କର ଏପରି ମୃତ୍ୟୁରେ ଢେଙ୍କାନାଳ ପୋଲିସ ମହଲରେ ଶୋକର ଛାୟା ଖେଳିଯାଇଛି । ତାଙ୍କ ମରଶରୀରକୁ ଢେଙ୍କାନାଳ ରିଜର୍ଭ ଲାଇନକୁ ନିଆଯାଇ ସେଠାରେ ପୋଲିସ ପକ୍ଷରୁ ଗାର୍ଡ ଅଫ ଅନର ଦିଆଯାଇଛି ।
ସୂଚନା ମୁତାବକ ଗତକାଲି (ମଙ୍ଗଳବାର) ଦିନ ଢେଙ୍କାନାଳରେ ଏକ ବୈଠକ ରହିଥିଲା । ଏହି ବୈଠକରେ ବୀର କିଶୋର ଯୋଗ ଦେଇଥିଲେ । ବୈଠକ ସରିବା ପରେ ସେ ଭୋଜନ କରି ପରଜଙ୍ଗ ଫେରି ଯାଇଥିଲେ । ହେଲେ ଗତ ରାତିରେ ତାଙ୍କ ଛାତିରେ ଭୀଷଣ ଯନ୍ତ୍ରଣା ହୋଇଥିଲା । ତାଙ୍କୁ ଚିକିତ୍ସା ପାଇ ପରଜଙ୍ଗ ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ପରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ । ତାଙ୍କର ହୃଦଘାତରେ ତାଙ୍କର ମୃତ୍ୟୁ ହୋଇଥିବା ଡାକ୍ତର ସୂଚନା ଦେଇଛନ୍ତି ।
ଏହା ମଧ୍ୟ ପଢନ୍ତୁ....ସ୍ତ୍ରୀକୁ ଜାଳି ମାରିବାକୁ ଉଦ୍ୟମ, ବର୍ଷେ ପରେ ବନ୍ଧା ହେଲା ନୃଶଂସ ସ୍ବାମୀ
ତେବେ ଢେଙ୍କାନାଳ ଏସପି ଘଟଣା ସ୍ଥଳରେ ପହଞ୍ଚି ଶୋକ ପ୍ରକାଶ କରିଛନ୍ତି । ତାଙ୍କ ପରିବାର ଲୋକ ରାଉରକେଲାରେ ରହୁଥିବାରୁ ତାଙ୍କୁ ସୂଚନା ଦିଆଯାଇଛି । ପରବାରରୁ ତାଙ୍କ ପୁଅ ଓ ସ୍ତ୍ରୀ ଆସି ପହଁଞ୍ଚିଛନ୍ତି । ମୃତକଙ୍କ ବ୍ୟବଚ୍ଛେଦ କରାଯାଇ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି । ତାଙ୍କ ମର ଶରୀରକୁ ଏକ ସ୍ୱତନ୍ତ୍ର ଗାଡି ଯୋଗେ ପୈତୃକ ଘର କେନ୍ଦ୍ରାପଡାର ଆଳିକୁ ନିଆଯାଇଛି । ସେଠାରେ ଶେଷକୃତ୍ୟ କରାଯିବ ବୋଲି ଜଣାପଡିଛି । ଶୋକସନ୍ତପ୍ତ ପରିବାର ବର୍ଗଙ୍କୁ ସମସ୍ତ ପ୍ରକାର ସାହାଯ୍ୟ ସହଯୋଗ କରାଯିବ ବୋଲି ଏସପି କହିଛନ୍ତି ।
ଇଟିଭି ଭାରତ, ଢେଙ୍କାନାଳ
