ବୌଦ୍ଧ: ହାତୀ ଆକ୍ରମଣରେ ବୃଦ୍ଧ ମୃତ । କୁଷ୍ଠ ରୋଗରେ ଆକ୍ରାନ୍ତ ଜଣେ ବୃଦ୍ଧ ଏକାକୀ ଜଙ୍ଗଲ ଅଞ୍ଚଳରେ ବସବାସ କରୁଥିବା ବେଳେ ଗତ ୨ ଦିନ ତଳେ ତାଙ୍କୁ ଏକ ଦନ୍ତା କଚାଡି ମାରିଛି । ବୌଦ୍ଧ ଜିଲ୍ଲାରେ ଅନ୍ଧବିଶ୍ୱାସ ତଥା କୁସଂସ୍କାର ଯୋଗୁଁ ଜଣେ ବେନାମୀ ଜୀବନ ବିତାଉଥିବା ବୃଦ୍ଧ ହାତୀ ଆକ୍ରମଣରେ ପ୍ରାଣ ହରାଇଛନ୍ତି । ଘଟଣା ସ୍ଥଳରେ ବନ ବିଭାଗ ପହଞ୍ଚି ତଦନ୍ତ ଆରମ୍ଭ କରିଛି । ଏଭଳି ଏକ ଦୁଃଖଦ ଘଟଣା ଦେଖିବାକୁ ମିଳିଛି ଗୁନ୍ଦୁଳିଆ ପଞ୍ଚାୟତର ମାଦିସୁକା ଗାଁରେ ।

ସୂଚନା ମୁତାବକ, ଜିଲ୍ଲା ସଦର ବ୍ଲକ ଅନ୍ତର୍ଗତ ଗୁନ୍ଦୁଳିଆ ପଞ୍ଚାୟତ ମାଦିସୁକା ଗ୍ରାମ ନିକଟରେ ଏକାକୀ ବସବାସ କରୁଥିଲେ ପାତ୍ର କହଁର ନାମକ ଜଣେ ବୃଦ୍ଧା । କିଛି ବର୍ଷ ପୂର୍ବରୁ ସେ କୁଷ୍ଠ ରୋଗରେ ପୀଡିତ ହୋଇଥିଲେ । ପରେ ତାଙ୍କୁ ପରିବାର ଓ ସମାଜରୁ ଏକପ୍ରକାର ଅଲଗା ରଖାଗଲା । ଧିରେ ଧିରେ ସେ ସାମାଜିକ ବାସନ୍ଦର ଶିକାର ହୋଇ ମାଦିସୁକା ନିକଟସ୍ଥ ଏକ ଜଙ୍ଗଲ ଅଞ୍ଚଳରେ ଛୋଟିଆ ଚାଳ କୁଡିଆ ତିଆରି ଏକାକୀ ରହିବାକୁ ବାଧ୍ୟ ହେଲେ ।

ହେଲେ ଶେଷରେ ଗତ ଦୁଇ ଦିନ ତଳେ ଏକ ବଣୁଆ ହାତୀପଲ ପାତ୍ର ରହୁଥିବା ଜଙ୍ଗଲ ଅଞ୍ଚଳରେ ବୁଲୁଥିବା ସମୟରେ ହଠାତ୍ ଏକ ହାତୀ ବୃଦ୍ଧ ତାଙ୍କୁ ଚାଳ କୁଡିଆ ମଧ୍ୟରୁ ଘୋଷାଡି ଆଣି କଚାଡି ଦେଇଥିଲା । ଫଳରେ ବୃଦ୍ଧ ପାତ୍ରଙ୍କ ଘଟଣା ସ୍ଥଳରେ ମୃତ୍ୟୁ ହୋଇଯାଇଥିଲା । ଘଟଣା ସମ୍ପର୍କରେ ସୂଚନା ପାଇ ମନମୁଣ୍ଡା ଥାନା, ମନମୁଣ୍ଡା ବନାଞ୍ଚଳ ଓ ଗୁନ୍ଦୁଳିଆ ସେକ୍ସନର ଅଧିକାରୀ, କର୍ମଚାରୀ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ ।

ଏହା ମଧ୍ୟ ପଢନ୍ତୁ....ହାତୀ ଘଉଡାଇବା ହେଲା କାଳ, ଯୁବକକୁ କଚାଡି ମାରିଲା ଦନ୍ତା

ଉଭୟ କେନ୍ଦ୍ର ଓ ରାଜ୍ୟ ସରକାର ଅସହାୟ, ଭିନ୍ନକ୍ଷମ, ରୋଗୀ, ମାନସିକ ରୋଗୀଙ୍କ ପାଇଁ ଚିକିତ୍ସା ସହିତ ଥଇଥାନର ବ୍ୟବସ୍ଥା କରିଛନ୍ତି । କିନ୍ତୁ ଆମ ସମାଜରେ ପ୍ରଚଳିତ ବିଭିନ୍ନ କୁସଂସ୍କାର ପ୍ରଥା ଯୋଗୁଁ ଅନେକ ସମୟରେ ଅତ୍ୟନ୍ତ କରୁଣ ତଥା ଅମାନବୀୟ ଘଟଣା ଦେଖିବାକୁ ମିଳିଥାଏ । ଯାହାର ସଦ୍ୟତମ ଉଦାହରଣ ହେଉଛନ୍ତି ପାତ୍ର କହଁର । ସାମାଜିକ ବାସନ୍ଦର ଶିକାର ହୋଇ ଆଜି ହାତୀ ଆକ୍ରମଣରେ ପ୍ରାଣ ହରାଇଛନ୍ତି ।

ଏଭଳି ଅଘଟଣ ପାଇଁ କାହାକୁ ଦାୟୀ କରାଯିବ ସେନେଇ ଉଠିଛି ପ୍ରଶ୍ନବାଚୀ । କାରଣ କୁଷ୍ଠ ରୋଗାକ୍ରାନ୍ତ ବୃଦ୍ଧ ଜଣକ ସାମାଜିକ ବାସନ୍ଦର ଶିକାର ହୋଇ ଜଙ୍ଗଲ ଭିତରେ ଏକାକୀ ରହିବାକୁ ବାଧ୍ୟ ହୋଇଥିଲେ । ଫଳରେ ତାଙ୍କ ସହ ଏଭଳି ଅଘଟଣ ଘଟିଲା ।

ଇଟିଭି ଭାରତ, ବୌଦ୍ଧ