ନୂଆଦିଲ୍ଲୀ: ବିଶ୍ବ ଆଥଲେଟ ପୁରସ୍କାର ଦୌଡ଼ରେ ଭାରତର ଷ୍ଟାର ଜାଭେଲିନ ପିଙ୍ଗାଳୀ ନୀରଜ ଚୋପ୍ରା । ବିଶ୍ବ ଆଥଲେଟିକ୍ସ ପକ୍ଷରୁ 2023 ବର୍ଷର ଶ୍ରେଷ୍ଠ ପୁରୁଷ ଆଥଲେଟ ପୁରସ୍କାର ପାଇଁ ତାଲିକା ପ୍ରକାଶ ପାଇଛି । ଏହି ତାଲିକାରେ ମୋଟ 11ଜଣ ଆଥଲେଟ ସାମିଲ ଅଛନ୍ତି । ଏଥିରେ ଅଲିମ୍ପିକ୍ସ ଓ ବିଶ୍ବ ଆଥଲେଟିକ୍ସ ଚମ୍ପିଆନସିପ ସ୍ବର୍ଣ୍ଣ ପଦକ ବିଜେତା ନୀରଜ ଚୋପ୍ରାଙ୍କ ନାମ ରହିଛି । ଭାରତର ଷ୍ଟାର ଜାଭେଲିନ ତାରକା ନୀରଜ ଚୋପ୍ରା ଏହି ପୁରସ୍କାର ଦୌଡରେ ରହିଛନ୍ତି । 3ଟି ପର୍ଯ୍ୟାୟରେ ଭୋଟିଂ କରଯାଇ ଶ୍ରେଷ୍ଠ ଆଥଲେଟଙ୍କ ନାମ ଫାଇନାଲ କରାଯାଇଛି ।
ଅନ୍ତର୍ଜାତୀୟ ଆଥେଲେଟିକ ବିଶେଷଜ୍ଞ ପ୍ୟାନେଲ ପକ୍ଷରୁ ବିଶ୍ବର ଶ୍ରେଷ୍ଠ ଆଥଲେଟ ପୁରସ୍କାର ପାଇଁ 11ଜଣିଆ ତାଲିକା ପ୍ରକାଶ ପାଇଛି । ଆସନ୍ତା 28 ତାରିଖରେ ପ୍ରଶଂସକମାନେ ନିଜ ନିଜ ପସନ୍ଦର ଆଥଲେଟଙ୍କୁ ଭୋଟ ଦେଇ ପାରିବେ । ନଭେମ୍ବର 13ରୁ 14 ତାରିଖରେ ବିଶ୍ବ ଆଥଲେଟ ପକ୍ଷରେ ଶ୍ରେଷ୍ଠ ଆଥଲେଟିକ୍ସ ପକ୍ଷରୁ 5ଜଣ ଲେଖାଏଁ ପୁରୁଷ ଓ ମହିଳା ଆଥଲେଟ୍ଙ୍କ ନାମ ଘୋଷଣା କରାଯିବ । ଡିସେମ୍ବର 11 ତାରିଖରେ ବିଶ୍ବ ଆଥଲେଟିକ୍ସ ସୋସିଆଲ ମିଡିଆ ପ୍ଲାଟଫର୍ମରେ ବିଜେତାଙ୍କ ନାମ ଘୋଷଣା କରାଯିବ ।
ନୀରଜଙ୍କ ବ୍ୟତୀତ ଆମେରିକାର ରିଆନ କ୍ରୋଉଜର (ସଟ୍ଫୁଟ), ସ୍ବିଡେନର ମୋଣ୍ଡୋ ଡୁପ୍ଲେଣ୍ଟସ (ପୋଲଭଲ୍ଟ), ମରକ୍କୋର ସୁଫିଆନ ଏଲ ବାକାଲି (300ମି ଷ୍ଟିପଲେଚେଜ), ନରୱେର ଜାକୋଭା ଇଙ୍ଗେବ୍ରିଗଷ୍ଟେନ (150ମି ଓ 500ମି ଦୌଡ଼), କେନିଆର କେଲଭିନ କିପତମ (ମାରାଥନ), କାନା଼ର ପିଏର୍ସି ଲେପେଗ (ଡେକାଥଲନ), ଆମେରିକାର ନୋଆ ଲାଇସ (100 ଓ 200ମି), ସ୍ପେନର ଆଲଭୋରା ମାର୍ଟିନ (ରେସ ୱାକର), ଗ୍ରୀସର ମିଲଟିଆଡିସ ଟେଣ୍ଟୋଗୱୋଇ (ଲଙ୍ଗଜମ୍ପ) ଓ ନରୱେର କ୍ରଷ୍ଟେନ୍ ୱାହୋଲମ (400 ମି ହର୍ଡଲ୍ସ ) ।
ପ୍ରକାଶ ଥାଉ କି, ଟୋକିଓ ଅଲମ୍ପିକ୍ସରେ ସ୍ବର୍ଣ୍ଣ ପଦକ ଜିତିଥିବା ନୀରଜ ଚୋପ୍ରା ଚଳତି ବର୍ଷ ବିଶ୍ବ ଆଥଲେଟିକ ଚମ୍ପିଆନସିପ୍ରେ ସ୍ବର୍ଣ୍ଣ ପଦକ ଜିତିଥିଲେ । 88.17 ମିଟର ଜାଭେଲିନ ଫିଙ୍ଗି ପ୍ରଥମ ସ୍ଥାନ ଅଧିକାର କରିଥିଲେ । 40ବର୍ଷ ପରେ ଭାରତକୁ ଆଥଲେଟରେ ପ୍ରଥମ ସ୍ବର୍ଣ୍ଣ ପଦକ ଭେଟି ଦେଇଥିଲେ । ସେହିପରି ଚୀନର ହଙ୍ଗଝୌରେ ସଦ୍ୟ ସମାପ୍ତ 19ତମ ଏସୀୟ କ୍ରୀଡାରେ ସ୍ବର୍ଣ୍ଣିମ ସଫଳତା ହାସଲ କରିଥିଲେ ସୁନପୁଅ ନୀରଜ । ୮୮.୮୮ ମିଟର ଦୂର ଜାଭେଲିନ ଫିଙ୍ଗି ଏସିଆନ ଗେମ୍ସରେ ସ୍ବର୍ଣ୍ଣ ପଦକ ହାସଲ କରଥିଲେ । ନୀରଜ ତାଙ୍କ କ୍ୟାରିୟରରେ 2018 ଏସିଆ ଗେମ୍ସରେ ସ୍ବର୍ଣ୍ଣ, 2018 ରାଜ୍ୟ ଗୋଷ୍ଠୀ କ୍ରୀଡାରେ ଗୋଲ୍ଟ ମେଡାଲ ସହିତ 4ଟି ଅଲଗା ଅଲଗା ଡାଇମଣ୍ଡ ଲିଗ୍ ଟାଇଟଲ ଜିତିଛନ୍ତି ।
