ହାଇଦ୍ରାବାଦ: ରାତି ପାହିଲେ ଆରମ୍ଭ ହେବ ବହୁ ପ୍ରିକ୍ଷିତ Tokyo Olympics । ସାରା ବିଶ୍ବର କୋଣ ଅନୁକୋଣରୁ ଖେଳାଳି ଏହି ମେଗା ଇଭେଣ୍ଟରେ ଭାଗ ନେବାପାଇଁ ପହଁଞ୍ଚି ସାରିଛନ୍ତି । ବିଭିନ୍ନ କ୍ଷେତ୍ରରେ କାର୍ଯ୍ୟ କରୁଥିବା ଖେଳାଳି ଖେଳିବେ ଅଲମ୍ପିକ ଗେମ୍ସ, ଆଉ ସେଥି ମଧ୍ୟରେ ଅଛନ୍ତି କିଛି ମା’ । ନିଜ ଘର ପରିବାର ଛାଡ଼ି ଦେଶର ପତାକା ସାରା ବିଶ୍ବରେ ଉଚ୍ଚ କରିବାକୁ ପଡ଼ିଆକୁ ଓହ୍ଲାଇଛନ୍ତି ଏମାନେ । ଉଭୟ ପଡ଼ିଆ ଓ ପଡ଼ିଆ ବାହାରେ ଏମାନଙ୍କର ସଙ୍ଘର୍ଷର କାହାଣୀ ହେଉଛି ଅତୁଳନୀୟ ଓ ପ୍ରେରଣାଦାୟୀ । ସେହିପରି କିଛି ସୁପର ମମ୍ସଙ୍କ ବିଷୟରେ ଜାଣନ୍ତୁ ଏହି ସ୍ବତନ୍ତ୍ର ଉପସ୍ଥାପନାରେ ।
ଏମସି ମେରୀ କମ୍ (ଭାରତ)
ବିଶ୍ବ ବକ୍ସିଂ ଚାମ୍ପିୟନଶିପ ଇତିହାସର ସବୁଠାରୁ ସଫଳ ବକ୍ସର ଏମସି ମେରୀ କମ୍ ଯିଏକି ଏହି ଇଭେଣ୍ଟରେ ରେକର୍ଡ ସଂଖ୍ୟକ ୮ଟି ପଦକ ହାତେଇଛନ୍ତି । ପ୍ରଥମ ଥର ଅଲମ୍ପିକରେ ଯେତେବେଳେ ମହିଳା ଗର୍ବ ବକ୍ସିଂ ଆରମ୍ଭ ହେଲା ମେରୀ ସେଥିରେ ଭାଗ ନେଇ ୫୧ କିଗ୍ରା ବର୍ଗରେ ଜିତିଥିଲେ କାଂଶ୍ୟ ପଦକ । ୩୮ ବର୍ଷୀୟା ଭାରତୀୟ ମୁଷ୍ଟିଯୁଦ୍ଧ ମେରୀ ହେଉଛନ୍ତି 4 ସନ୍ତାନଙ୍କ ମା’ ।
ସାନିଆ ମିର୍ଜା (ଭାରତ)
ଟେନିସର ଅନ୍ୟଜଣେ ଯାଜୁଲ୍ୟମାନ ତାରକା ହେଉଛନ୍ତି ସାନିଆ ମିର୍ଜା । ୬ଟି ଗ୍ରାଣ୍ଡସ୍ଲାମ ରହିଛି ତାଙ୍କ ନାମରେ । ୩ଟି ଅଲମ୍ପିକ ଖୋଳି ସାରିଥିବା ସାନିଆ ଚତୁର୍ଥ ଥର ପାଇଁ ଜଣେ ମା’ ଭାବରେ ଅଲମ୍ପିକ ଖେଳିବେ । ଏଥର ଅଲମ୍ପିକ ଖେଳିବା ସହ ସାନିଆ ସର୍ବାଧିକ ଥର ଅଲମ୍ପିକ ଖେଳିଥିବା ଭାରତୀୟ ମହିଳା ହେବେ । ସାନିଆ ବର୍ତ୍ତମାନ ତିନି ବର୍ଷୀୟ ପୁଅର ଜନନୀ ।
ଇସାବେଲ ୱେର୍ଥ (ଜର୍ମାନୀ)
ଇସାବେଲ ଅଲମ୍ପିକ ଗେମ୍ସର ସଫଳତମ ଆଥଲେଟ ମାନଙ୍କ ମଧ୍ୟରୁ ଜଣେ । ଇସାବେଲ ଅଶ୍ବାରୋହଣରେ ହାତେଇଛନ୍ତି ୬ଟି ସ୍ବର୍ଣ୍ଣ ଓ ୪ଟି ରୌପ୍ୟ ପଦକ । ଚଳିତ ଅଲମ୍ପିକରେ ୫୨ ବର୍ଷରେ ପଦାର୍ପଣ କରିଥିବା ଇସାବେଲ ରେକର୍ଡ ସଂଖ୍ୟକ ଷଷ୍ଠ ଥର ପାଇଁ ନିଜ ଦେଶର ପ୍ରତିନିଧିତ୍ବ କରିବେ । ଏହାସହ ଉଭୟ ଗ୍ରୁପ ଓ ଏକକ ବର୍ଗରେ ପଦକ ଜିତି ନିଜର ରେକର୍ଡ ମଧ୍ୟ ଭାଙ୍ଗିବାର ସୁଯୋଗ ପାଇବେ ଇସାବେଲ । ଇସାବେଲ ଜଣେ ପୁତ୍ର ସନ୍ତାନର ସୁପର ମମ୍ ।
ଏଲିସନ ଫେଲିକ୍ସ (ୟୁଏସ୍ଏ)
୬ଟି ସ୍ବର୍ଣ୍ଣ ଓ ୩ଟି ରୌପ୍ୟ ପଦକ ସହ ଯୁଗ୍ମ ଭାବେ ଟ୍ରାକର ସବୁଠାରୁ ସଫଳ ଆଥଲେଟ ହେଉଛନ୍ତି ଏଲିସନ । ୩୫ ବର୍ଷୀୟ ଫେଲିକ୍ସ ୨୦୧୮ରେ ମରଣ ସହ ସଂଗ୍ରାମ କରି ନିଜ ଝିଅକୁ ଜନ୍ମ ଦେଇଥିଲେ । ଏହାପରେ ସେ ୨୦୧୯ ଦୋହା ବିଶ୍ବ ଚାମ୍ପିୟନଶିପରେ ଭାଗ ନେଇଥିଲେ ଓ ଦୁଇଟି ସ୍ବର୍ଣ୍ଣ ଜିତି ଉସେନ ବୋଲ୍ଟଙ୍କୁ ଟପିଯାଇଥିଲେ । ଟୋକିଓ ଟିକେଟ ସହ ଏଲିସନ ନିଜର ୧୦ ପଦକ ଜିତି ମର୍ଲେନ ଓଟିଙ୍କ ରେକର୍ଡ ଭାଙ୍ଗିବାର ଲକ୍ଷ୍ୟ ରଖିଛନ୍ତି ।
ମାରିଏଲ ଜାଗୁନିସ (ୟୁଏସ୍ଏ)
36 ବର୍ଷୀୟ ଖଡ୍ଗଯୋଦ୍ଧା ମାରିଏଲ ଯୁକ୍ତରାଷ୍ଟ୍ର ଆମେରିକାର ପ୍ରଥମ ଆଥଲେଟ ଯିଏକି ଖଡ୍ଗଯୁଦ୍ଧ (Fencing) ରେ ଉଭୟ ଏଥେନ୍ସ ଓ ବେଜିଙ୍ଗ ଅଲମ୍ପିକର ଏକକ ବର୍ଗରେ ସ୍ବର୍ଣ୍ଣ ପଦକ ଜିତିଛନ୍ତି । ଏହାଛଡ଼ା ସେ ବେଜିଙ୍ଗ ଓ ରିଓ ଅଲମ୍ପିକର ଟିମ୍ ଇଭେଣ୍ଟରେ ମଧ୍ୟ କାଂଶ୍ୟ ପଦକ ଜିତିଛନ୍ତି । ଜାଗୁନିସ ଟୋକିଓ ଅଲମ୍ପିକରେ ନିଜର ପଞ୍ଚମ ଅଲମ୍ପିକ ଖେଳିବେ ଓ ନିଶ୍ଚିତ ଭାବେ ପଦକ ବିଜୟୀ ହୋଇ ନିଜ ପଦକ ସଂଖ୍ୟା ବୃଦ୍ଧି କରିବେ ବୋଲି ଆଶା ରଖିଛନ୍ତି । ମାରିଏଲ ଜଣେ କନ୍ୟା ରତ୍ନର ଜନନୀ ।
ଶେଲି-ଏନ ଫ୍ରାସର-ପ୍ରେସ (ଜାମାଇକା)
ଜାମାଇକାର ଧାବିକା ଶେଲି-ଏନ ଫ୍ରାସର-ପ୍ରେସ ନିଜ ନାରେ କରିଛନ୍ତି ୬ଟି ଅଲମ୍ପିକ ପଦକ । ଯେଉଁଥିରେ ସାମିଲ ଅଛି ୨ଟି ସ୍ବର୍ଣ୍ଣ, ୩ଟି ରୌପ୍ୟ ଓ ଗୋଟିଏ କାଂଶ୍ୟ ପଦକ । ୨୦୧୬ ରିଓ ଅଲମ୍ପିକ ପରେ ସେ ଏକ ପୁତ୍ର ସନ୍ତାନକୁ ଜନ୍ମଦେଇଥିଲେ । ମା’ ହେବା ପରେ ଏହା ତାଙ୍କର ପ୍ରଥମ ଅଲମ୍ପିକ ହେବ ।
ଆଲେକ୍ସ ମୋର୍ଗାନ (ୟୁଏସ୍ଏ)
୩୧ ବର୍ଷୀୟ ଆମେରିକୀୟ ଫୁଟବଲର ଆଲେକ୍ସ ମୋର୍ଗାନ ୨୦୨୦ରେ କନ୍ୟା ସନ୍ତାନକୁ ଜନ୍ମଦେଇ ମାତୃତ୍ବ ଲାଭ କରିଛନ୍ତି । ୨୦୧୨ ଲଣ୍ଡନ ଅଲମ୍ପିକରେ ସ୍ବର୍ଣ୍ଣ ଜିତିଥିବା ଆଲେକ୍ସ ଚଳିତ ବର୍ଷ ମଧ୍ୟ ପଦକ ଆଶାରେ ପଡ଼ିଆକୁ ଓହ୍ଲାଇବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
