ରାଜସ୍ଥାନ ମନ୍ତ୍ରୀଙ୍କ ବିବାଦୀୟ ବୟାନ, ରାହୁଲ ଗାନ୍ଧୀଙ୍କୁ ଶ୍ରୀରାମଙ୍କ ସହ କଲେ ତୁଳନା

ଜୟପୁର: ବିବାଦୀୟ ବୟାନ ପାଇଁ ଅନେକ ସମୟରେ ଚର୍ଚ୍ଚାରେ ରହୁଥିବା ରାଜସ୍ଥାନ ସ୍ବାସ୍ଥ୍ୟମନ୍ତ୍ରୀ ପରସାଦୀ ଲାଲ୍ ମୀନା ପୁଣିଥରେ ନିଜର ଅମାନିଆ ତୁଣ୍ଡ ପାଇଁ ବିବାଦରେ ଛନ୍ଦି ହୋଇଛନ୍ତି । ରାଜସ୍ଥାନ ମନ୍ତ୍ରୀ ପ୍ରଭୁ ଶ୍ରୀରାମଙ୍କ ସହ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ତୁଳନା କରିଛନ୍ତି । ରାହୁଲଙ୍କ ଭାରତ ଯୋଡ଼ ଯାତ୍ରାକୁ ପ୍ରଶଂସା କରିବାକୁ ଯାଇ ମନ୍ତ୍ରୀ କହିଛନ୍ତି, ''ଶ୍ରୀରାମ ଅଯୋଧ୍ୟାରୁ ଶ୍ରୀଲଙ୍କା ଯାଏଁ ବନବାସ ଯାତ୍ରା କରିଥିଲେ । ହେଲେ ରାହୁଲ କନ୍ୟାକୁମାରୀ ଠାରୁ କାଶ୍ମୀର ଯାଏଁ ପଦଯାତ୍ରା କରୁଛନ୍ତି । ଏତିକି ଲମ୍ବା ଯାତ୍ରା ପ୍ରଭୁ ରାମ ମଧ୍ୟ କରିନାହାନ୍ତି ।'' ସ୍ବାସ୍ଥ୍ୟମନ୍ତ୍ରୀଙ୍କ ଏହି ବୟାନକୁ ନେଇ ଏବେ ଚାରିଆଡେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ।

ସୂଚନା ଅନୁଯାୟୀ, ରାଜସ୍ଥାନ ସ୍ବାସ୍ଥ୍ୟମନ୍ତ୍ରୀ ଲାଲ୍ ମୀନା(Rajasthan Minister Parsadi Lal Meena) ଦୌସା ଜିଲ୍ଲାର ଲାଲସୋଟ ଠାରେ ଏକ କାର୍ଯ୍ୟକ୍ରମରେ ସାମିଲ ହେବା ଅବସରରେ ରାହୁଲ ଗାନ୍ଧୀଙ୍କୁ ରାମଚନ୍ଦ୍ରଙ୍କ ସହ ତୁଳନା କରିଛନ୍ତି । ରାହୁଲଙ୍କ ଭାରତ ଯୋଡ଼ ଯାତ୍ରାକୁ ସେ ଐତିହାସିକ କହିଛନ୍ତି । ତାଙ୍କର କହିବାନୁଯାୟୀ, ପ୍ରଭୁ ଶ୍ରୀରାମ ଏତେ ଲମ୍ବା ପଦଯାତ୍ରା କରିନଥିଲେ, ଯେତିକି ରାହୁଲ ଗାନ୍ଧୀ କରିବାକୁ ଯାଉଛନ୍ତି । ଆଜି ପର୍ଯ୍ୟନ୍ତ ଏତେ ଲମ୍ବା ଯାତ୍ରା ଇତିହାସରେ କେହି କରିନାହାନ୍ତି କିମ୍ବା କରିପାରିବେ ନାହିଁ ।''

ଏହି ସମୟରେ କଂଗ୍ରେସ ମନ୍ତ୍ରୀ ବିଜେପି ସରକାରକୁ ଟାର୍ଗେଟ କରିବାକୁ ଭୁଲି ନାହାନ୍ତି । ବିଜେପି ଦେଶରେ ସାମ୍ପ୍ରଦାୟିକ ହିଂସା ବିସ୍ତାର କରୁଛି । ଏହି ବାତାବରଣ ସୁଧାରିବାକୁ ରାହୁଲ ଗାନ୍ଧୀ ଚାଲି ଚାଲି ଯାତ୍ରା କରୁଛନ୍ତି । ସେ ଯାତ୍ରା ମାଧ୍ୟମରେ ଶାନ୍ତି, ଭାଇଚାରା, ପ୍ରେମ, ସୌହାର୍ଦ୍ଧ୍ୟର ବାର୍ତ୍ତା ଦେଉଛନ୍ତି । ପ୍ରକାଶଥାଉ କି, କଂଗ୍ରେସ ନେତା ରାହୁଲ ଗାନ୍ଧୀଙ୍କ ନେତୃତ୍ବରେ ଭାରତ ଯୋଡ଼ ଯାତ୍ରା ଜାରି ରହିଛି । ୧୫୦ ଦିନର ଏହି ଯାତ୍ରାରେ ୧୨ ରାଜ୍ୟ ଏବଂ ଦୁଇଟି କେନ୍ଦ୍ରଶାସିତ ଅଞ୍ଚଳ ଦେଇ ଯାତ୍ରା କରିବେ କଂଗ୍ରେସ କର୍ମୀ । ରାହୁଲଙ୍କ ନେତୃତ୍ବରେ ମୋଟ ୧୧୮ କଂଗ୍ରେସ ନେତା ଓ କର୍ମୀ ପ୍ରତିଦିନ ୬ରୁ ୭ ଘଣ୍ଟା ପଦଯାତ୍ରା କରୁଛନ୍ତି । ତେବେ ୧୫୦ ଦିନ ଏହି ଯାତ୍ରା ମଧ୍ୟରେ କଂଗ୍ରେସ ନେତା କୌଣସି ହୋଟେଲରେ ରହୁନାହାନ୍ତି । ଅତି ସାଧାରଣ ଭାବେ ସେମାନେ ଯାତ୍ରା କରୁଛନ୍ତି । କଣ୍ଟେନରରେ ରାହୁଲ ଗାନ୍ଧୀ ଓ ଅନ୍ୟାନ୍ୟ ନେତାଙ୍କ ରାତ୍ରି ରହଣୀ ପାଇଁ ବ୍ୟବସ୍ଥା କରାଯାଇଛି ।