କେନ୍ଦ୍ରାପଡା ବିଜେଡିର ଅସନ୍ତୁଷ୍ଟ କର୍ମୀ ସମ୍ମିଳନୀ, ବିଜେଡି ଗଣେଶ୍ବରଙ୍କୁ ଟିକେଟ ଦେବା ଚର୍ଚ୍ଚାକୁ ବିରୋଧ - BJD Workers Meeting

BJD Workers Meeting: କେନ୍ଦ୍ରାପଡା: ଆଜି ବିଜେଡିରେ ସାମିଲ ହୋଇପାରନ୍ତି ପୂର୍ବତନ କଂଗ୍ରେସ ନେତା ଗଣେଶ୍ୱର ବେହେରା । ଏହାକୁ ନେଇ କେନ୍ଦ୍ରାପଡା ବିଜେଡିରେ ଉଠିଛି ବିଦ୍ରୋହର ସ୍ଵର । ଅନ୍ୟ ଦଳରୁ ନେତା ଆମଦାନୀ କରି ଏବଂ ପାଞ୍ଚ ପାଞ୍ଚ ଥର ପରାଜିତ ପ୍ରାର୍ଥୀଙ୍କୁ ଟିକେଟ ଦେବା ପ୍ରକ୍ରିୟାକୁ ବିରୋଧ କରିଛନ୍ତି କେନ୍ଦ୍ରାପଡାର ବିଜେଡି ନେତା ଓ କର୍ମୀ । ଏନେଇ ଅସନ୍ତୁଷ୍ଟ ବିଜେଡି କର୍ମୀଙ୍କ ଶନିବାର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା । ପୂର୍ବତନ ଜିଲ୍ଲା ପରିଷଦ ଅଧ୍ୟକ୍ଷ ମାନସ କୁମାର ପରିଡାଙ୍କ ସଭାପତିତ୍ୱରେ ଅନୁଷ୍ଠିତ ଏହି ବୈଠକରେ ଏକ ହଜାରରୁ ଊର୍ଦ୍ଧ୍ବ ଦଳୀୟ କର୍ମୀ ଏକାଠି ହୋଇ ନାରାବାଜି କରିବା ସହ ବିଜେଡି ନେତାଙ୍କୁ ହିଁ ଦଳ ଟିକେଟ ଦେବାକୁ ଦାବି କରିଥିଲେ । ଏଥିସହ ଦଳର ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉଦ୍ଦେଶ୍ୟରେ ଏକ ନିବେଦନ ପତ୍ର ଲେଖିଥିଲେ। ଗଣେଶ୍ବର ବିଜେଡିରେ ମିଶିବା ନେଇ ଚର୍ଚ୍ଚା ହେଉଥିବା ବେଳେ ଜିଲ୍ଲା ରାଜନୀତି ଅସ୍ଥିର ହୋଇ ଉଠିଛି । ଅନୁଷ୍ଠିତ ବୈଠକରେ ପୂର୍ବତନ ବିଧାୟିକା ସିପ୍ରା ମଲ୍ଲିକ,ପୂର୍ବତନ ବିଧାୟକ କିଶୋର ତରାଇ,ଜିଲ୍ଲା ପରିଷଦ ଅଧ୍ୟକ୍ଷା ଗିତାଞ୍ଜଳୀ ସେଠି,ଜିଲା ଯୁବ ବିଜେଡ଼ି ସଭାପତି ରାଜେଶ ଦାସ, ବିଜେଡି ନେତା ମୁରଲୀଧର ସେଠି  ପ୍ରମୁଖ ଉପସ୍ଥିତ ଥିଲେ।

ଇଟିଭି ଭାରତ, କେନ୍ଦ୍ରାପଡା