ବାଲେଶ୍ବର: ଛୋଟ ବୟସରେ ପରୋପକାରର ବଡ ଭାବନା । ଖେଳକୁଦ ବୟସରେ କ୍ୟାନ୍ସର ରୋଗୀଙ୍କ ପାଇଁ କେଶ ଦାନ କରି ଚର୍ଚ୍ଚାରେ ୧୦ ବର୍ଷର ଛାତ୍ରୀ । ବାଲେଶ୍ଵର ଜିଲ୍ଲା ଔପଦା ବ୍ଲକର ଚଅଁପୁର ଗ୍ରାମର ନିରଞ୍ଜନ ପଣ୍ଡା ଏବଂ ଜ୍ୟୋତ୍ସ୍ନାରାଣୀ ପଣ୍ଡାଙ୍କ ସାନଝିଅ ହେଉଛନ୍ତି ହିରଣ୍ମୟୀ । ଅନ୍ୟମାନଙ୍କ ପାଇଁ କିଛି କରିବା ନିଶା ପାଇଁ ସେ ସବୁଠୁଁ ସାଉଁଟିଛନ୍ତି ପ୍ରଶଂସା । କ୍ୟାନ୍ସର ରୋଗୀଙ୍କୁ କେଶ ଦାନ ଦେବାପାଇଁ ଦୁଇବର୍ଷ ଧରି ସେ କେଶ ବଢ଼ାଇ ଏବେ ତାହା ଏକ ଟ୍ରଷ୍ଟ ମାଧ୍ୟମରେ ଦାନ କରିଛନ୍ତି ।
ମାମୁଁଙ୍କ ସହ ଫୋନରେ ଭିଡିଓ ଦେଖୁଥିବା ବେଳେ ସେ କେଶଦାନ ବିଷୟରେ ଅନୁସନ୍ଧିତ୍ସୁ ହୋଇଥିଲେ । ତାଙ୍କ ମାମୁଁ କହିଥିଲେ ଯେ, କ୍ୟାନସର ରୋଗୀଙ୍କ କେମୋ ଥେରାପୀ ପରେ କେଶ ଝଡିଯିବାରୁ ସେମାନେ ନକଲି କେଶ ବା ୱିଗ୍ ବ୍ୟବହାର କରିଥାନ୍ତି । ସେଥିପାଇଁ ୱିଗ୍ ତିଆରି ପାଇଁ ଅନେକ ଲୋକ ମାଗଣାରେ ନିଜର କେଶ ଦାନ କରିଥାନ୍ତି । ଏହି କଥା ମାମୁଁଙ୍କ ପାଖରୁ ଶୁଣି ହିରଣ୍ମୟୀ ମାମୁଁଙ୍କୁ ନିଜର କେଶ ଦାନ କରିବା କଥା ଜିଦ ଧରି ବସିଥିଲେ । ସେତେବେଳେ ହିରଣ୍ମୟୀଙ୍କୁ ମାତ୍ର ୮ ବର୍ଷ ବୟସ ହୋଇଥିବାରୁ ମାମୁଁ ତାଙ୍କୁ ବଡ଼ ହେଲେ କେଶ ଦାନ କରିବା ପାଇଁ କହିଥିଲେ । ଦୁଇବର୍ଷ ଧରି ସେ କେଶର ଯତ୍ନ ନେବାସହ ତାହା ବଢାଇବାକୁ ଲାଗିଥିଲେ । ପରବର୍ତ୍ତୀ ମୁହୂର୍ତ୍ତରେ କେଶଦାନ କରିବା ପାଇଁ ହିରଣ୍ମୟୀଙ୍କ କେଶ ବଢିବା ପରେ ମାମୁଁଙ୍କ ସହ ସୋରରେ ଶୋଭା ଟ୍ରଷ୍ଟ ମାଧ୍ୟମରେ ସେ କେଶଦାନ କରିଥିଲେ । କେବଳ କେଶଦାନ ନୁହେଁ ବଡ଼ ହେଲେ ସେ ସମାଜର ଅବହେଳିତ, ନିଷ୍ପେସିତ ମାନଙ୍କ ସେବାରେ ନିଜକୁ ନିୟୋଜିତ କରିବେ ବୋଲି ମଧ୍ୟ କହିଛନ୍ତି ।
ଏହା ମଧ୍ୟ ପଢନ୍ତୁ ... ଦୁଇ ଜଣଙ୍କୁ ନୂଆ ଜୀବନ ଦେଇ ଅମର ହୋଇଗଲେ ଓମ୍
ତେବେ କେବଳ ପରୋପକାରିତା ନୁହଁ ବରଂ ଆହୁରି ଅନେକ ପ୍ରତିଭାର ଅଧିକାରିଣୀ ହେଉଛନ୍ତି ହିରଣ୍ମଣୀ । ଭଲ ପାଠ ପଢିବା, ଭଲ ଚିତ୍ର ଆଙ୍କିବା ସହ ଭଲ ନୃତ୍ୟ ମଧ୍ୟ କରିପାରନ୍ତି ହିରଣ୍ମୟୀ । ଅନ୍ୟପଟେ 2020 ମସିହାରେ ଗଢି ଉଠିଥିବା ଶୋଭା ଟ୍ରଷ୍ଟ କେଶ ଦାନ କରୁଥିବା ଲୋକମାନଙ୍କ କେଶ ନେଇ ଭୁବନେଶ୍ବର ଏବଂ ପରେ ହାଇଦ୍ରାବାଦ ପଠାଇ ଥାଆନ୍ତି । ସେଠାରେ ଥିବା ଏକ ସଂସ୍ଥା ଦ୍ବାରା ଟଙ୍କା ଖର୍ଚ୍ଚ କରାଯାଇ ଏହିସବୁ କେଶରୁ ନକଲି କେଶ ବା ୱିଗ୍ ତିଆରି କରାଯାଇ ପୁଣି ଭୁବନେଶ୍ବର ପଠାଯାଇଥାଏ । ଏହାପରେ ଶୋଭା ଟ୍ରଷ୍ଟର ସଦସ୍ୟ ମାନଙ୍କ ଦ୍ବାରା ଏହାକୁ ଆବଶ୍ୟକ କରୁଥିବା କ୍ୟାନ୍ସର ରୋଗୀମାନଙ୍କୁ ମାଗଣା ବଣ୍ଟା ଯାଇଥାଏ । ଏବେ ସୁଦ୍ଧା ଶୋଭା ଟ୍ରଷ୍ଟ ଦ୍ବାରା ବାଲେଶ୍ଵର ଜିଲ୍ଲାର ସୋର, ଖଇରା, ବର୍ତ୍ତନା ଆଦି ଅଞ୍ଚଳର ପ୍ରାୟ 25 ଜଣଙ୍କୁ ୱିଗ୍ ବଣ୍ଟା ସରିବା ନେଇ ଶୋଭା ଟ୍ରଷ୍ଟର ଆଡ଼ଭାଇଜର କୁଞ୍ଜଲତା ମାହୁନ୍ତ ପ୍ରକାଶ କରିଛନ୍ତି ।
ଇଟିଭି ଭାରତ, ବାଲେଶ୍ବର
