ଲକ୍ଷ୍ନୌ: ସମୟ ଥିଲା ଯେତେବେଳେ ନେହେରୁ-ଗାନ୍ଧୀ ପରିବାରର ଏକ ଡଜନ ନେତା ଅନେକ ନିର୍ବାଚନମଣ୍ଡଳୀରେ କବଜା କରୁଥିଲେ । କିନ୍ତୁ ଆଜି ସମୟ ବଦଳିଛି । ଗାନ୍ଧୀ ପରିବାର ନିଜ ପାରମ୍ପରିକ ଆସନ ରାୟବରେଲି ଓ ଆମେଠିରେ ମଧ୍ୟ ପ୍ରାର୍ଥୀ ଦେବାରେ ସମସ୍ୟାର ସାମ୍ନା କରୁଛି । 2019 ଲୋକସଭା ନିର୍ବାଚନରେ ରାହୁଲ ଗାନ୍ଧୀ, କେନ୍ଦ୍ରମନ୍ତ୍ରୀ ସ୍ମୃତି ଇରାନୀଙ୍କ ଠାରୁ ପରାଜିତ ହେବା ପରେ ୱାୟନାଡ ଆସନକୁ ନିଜର ସ୍ଥାୟୀ ଆସନ କରିଛନ୍ତି । 2019ରେ ରାହୁଲ ୱାୟନାଡରୁ ଜିତିଥିଲେ ଏବଂ ଏଥର ମଧ୍ୟ ସେ ଏଠାରୁ ପ୍ରତିଦ୍ବନ୍ଦ୍ବିତା କରୁଛନ୍ତି । 2019ରେ ସୋନିଆ ଗାନ୍ଧୀ କଂଗ୍ରେସ ପାଇଁ ଏକମାତ୍ର ରାୟବରେଲି ଆସନ ଜିତିଥିଲେ । କିଛି ମାସ ପୂର୍ବରୁ ସେ ରାଜ୍ୟସଭା ଯାଇଛନ୍ତି । ଏଭଳି ପରିସ୍ଥିତିରେ ଗାନ୍ଧୀ ପରିବାରର ଗଡ଼ ଥିବା ରାଇବରେଲି ଆସନରେ ପରିବାରରୁ ନା ବାହାରୁ ପ୍ରାର୍ଥୀ ରହିବେ ସେ ନେଇ ଚାଲିଛି କଳ୍ପନା ଜଳ୍ପନା ।
ଜବାହରଲାଲ ନେହେରୁ: ଦେଶର ପ୍ରଥମ ପ୍ରଧାନମନ୍ତ୍ରୀ ପଣ୍ଡିତ ଜବାହରଲାଲ ନେହେରୁଙ୍କ ବିଷୟରେ ଆଲୋଚନା କଲେ ସେ 1952 ମସିହାରେ ଫୁଲପୁର ଆସନରୁ ନିର୍ବାଚନରେ ଜିତି ସଂସଦରେ ପହଞ୍ଚିଥିଲେ । 1957 ଏବଂ 1962ରେ ମଧ୍ୟ ନେହେରୁ ଏହି ଆସନରୁ ବିଜୟୀ ହୋଇଥିଲେ । ବର୍ତ୍ତମାନ ପରିସ୍ଥିତି ଏପରି ଯେ 1984 ପରେ କଂଗ୍ରେସ ଥରେ ବି ଏହି ଆସନ ଜିତିବାରେ ସକ୍ଷମ ହୋଇନାହିଁ । 2014ରେ ବିଜେପିର ବରିଷ୍ଠ ନେତା କେଶବ ପ୍ରସାଦ ମୌର୍ଯ୍ୟ ଏହି ଆସନରୁ ନିର୍ବାଚିତ ହୋଇଥିବାବେଳେ 2019ରେ ବିଜେପି କେଶରୀ ଦେବୀ ପଟେଲ ଜିତିଥିଲେ ।
ଉମା ନେହେରୁ: ଜବାହରଲାଲ ନେହେରୁଙ୍କ ସମ୍ପର୍କୀୟ ଶ୍ୟାମଲାଲ ନେହେରୁଙ୍କ ପତ୍ନୀ ଉମା ନେହେରୁ ମଧ୍ୟ ଜଣେ ସ୍ବାଧୀନତା ସଂଗ୍ରାମୀ ଥିଲେ । ସେ 1952 ମସିହାରେ ସୀତାପୁର ସଂସଦୀୟ ଆସନରୁ କଂଗ୍ରେସ ଟିକେଟରୁ ନିଜର ପ୍ରଥମ ଲୋକସଭା ନିର୍ବାଚନରେ ପ୍ରତିଦ୍ବନ୍ଦ୍ବିତା କରିଥିଲେ । 1957 ମସିହାରେ ମଧ୍ୟ ସେ ସମାନ ଆସନରୁ ଲୋକସଭାକୁ ନିର୍ବାଚିତ ହୋଇଥିଲେ । ସେ 28 ଅଗଷ୍ଟ 1963ରେ 79 ବର୍ଷ ବୟସରେ ଦେହାନ୍ତ ହୋଇଥିଲା । ସେମାନଙ୍କର 2ଟି ସନ୍ତାନ ଥିଲେ ଶ୍ୟାମ କୁମାରୀ ଖାନ ଏବଂ ଆନନ୍ଦ କୁମାର ନେହେରୁ । ଆନନ୍ଦ କୁମାର ନେହେରୁଙ୍କ ପୁଅ ଅରୁଣ ନେହେରୁ ମଧ୍ୟ ରାଜୀବ ଗାନ୍ଧୀଙ୍କ ସରକାରରେ କେନ୍ଦ୍ରମନ୍ତ୍ରୀ ଥିଲେ ।
ବିଜୟ ଲକ୍ଷ୍ମୀ ପଣ୍ଡିତ: ଜାତିର ପିତା ମହାତ୍ମା ଗାନ୍ଧୀଙ୍କ ଦ୍ବାରା ଅନୁପ୍ରାଣିତ ହୋଇ ସ୍ବାଧୀନତା ସଂଗ୍ରାମ ଆନ୍ଦୋଳନରେ ସକ୍ରିୟ ଥିବା ପଣ୍ଡିତ ଜବାହରଲାଲ ନେହେରୁଙ୍କ ବଡ଼ ଭଉଣୀ 1952 ମସିହାରେ ପ୍ରଥମ ଲୋକସଭା ନିର୍ବାଚନରେ ଲକ୍ଷ୍ନୌର ପ୍ରତିନିଧିତ୍ବ କରିଥିଲେ ଏବଂ ସଂସଦରେ ପହଞ୍ଚିଥିଲେ । ସ୍ବାଧୀନତା ଆନ୍ଦୋଳନ ସମୟରେ ତାଙ୍କୁ ଏବଂ ତାଙ୍କ ସ୍ବାମୀଙ୍କୁ ଜେଲ ଯିବାକୁ ପଡିଥିଲା । ସେ 1962ରୁ 1964 ପର୍ଯ୍ୟନ୍ତ ମହାରାଷ୍ଟ୍ରର ରାଜ୍ୟପାଳ ଥିଲେ । 1979ରେ ସେ ମିଳିତ ଜାତିସଂଘ ମାନବ ଅଧିକାର ଆୟୋଗରେ ଭାରତର ପ୍ରତିନିଧୀ ଭାବରେ ମଧ୍ୟ ନିଯୁକ୍ତ ହୋଇଥିଲେ । 1990ରେ ତାଙ୍କର ମୃତ୍ୟୁ ହୋଇଥିଲା । ତାଙ୍କ ଝିଅ ହେଉଛନ୍ତି ଚନ୍ଦ୍ରଲେଖା ଏବଂ ନୟନ୍ତରା ସେହଗଲ ।
ଫିରୋଜ ଗାନ୍ଧୀ: ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ସ୍ବାମୀ ଫିରୋଜ ଗାନ୍ଧୀ ମଧ୍ୟ 1952 ମସିହାରେ ରାୟବରେଲି ସଂସଦୀୟ ଆସନରୁ ନିର୍ବାଚିତ ହୋଇ ସଂସଦରେ ପହଞ୍ଚିଥିଲେ । 1957 ମସିହାରେ ସେ ରାୟବରେଲି ଆସନକୁ ପ୍ରତିନିଧିତ୍ବ କରିଥିଲେ । ଫିରୋଜ ମୂଳତଃ ମୁମ୍ବାଇ ବାସିନ୍ଦା ଥିବା ବେଳେ ପାର୍ସୀ ଧର୍ମ ଥିଲେ । 1942 ମସିହାରେ ଇନ୍ଦିରା ଗାନ୍ଧୀଙ୍କୁ ସେ ବିବାହ କରିଥିଲେ । ଜନ୍ମରୁ ତାଙ୍କର ନାମ ଫିରୋଜ ଜାହାଙ୍ଗୀର ଥିଲା । ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀ ଏବଂ ସଞ୍ଜୟ ଗାନ୍ଧୀ ତାଙ୍କର ପୁତ୍ର ଥିଲେ । 1960ରେ ହୃଦଘାତ ଯୋଗୁଁ ତାଙ୍କର ଦେହାନ୍ତ ହୋଇଥିଲା ।
ଇନ୍ଦିରା ଗାନ୍ଧୀ: ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ 1967 ମସିହାରେ ନିଜର ରାଜନୈତିକ କ୍ୟାରିୟର ଆରମ୍ଭ କରିଥିଲେ । ସେ ରାୟବରେଲି ଆସନରୁ ନିର୍ବାଚିତ ହୋଇ ପ୍ରଥମ ଥର ପାଇଁ ସାଂସଦ ହୋଇଥିଲେ । ସେ 1971 ଏବଂ 1980ରେ ମଧ୍ୟ ଏହି ଆସନରୁ ଜିତିଥିଲେ । ଯଦିଓ ଏହା ପୂର୍ବରୁ 1977 ମସିହାରେ ସମାଜବାଦୀ ନେତା ତଥା ଦେଶର ସ୍ବାସ୍ଥ୍ୟମନ୍ତ୍ରୀ ରଜନାରାୟଣଙ୍କ ଠାରୁ ତାଙ୍କୁ ପରାଜୟର ସମ୍ମୁଖୀନ ହେବାକୁ ପଡିଥିଲା । ସେ ଭାରତର ପ୍ରଥମ ମହିଳା ପ୍ରଧାନମନ୍ତ୍ରୀ ଥିଲେ । ଗୃହ, ବୈଦେଶିକ ବ୍ୟାପାର, ପ୍ରତିରକ୍ଷା ଏବଂ ଅର୍ଥ ଭଳି ଗୁରୁତ୍ବପୂର୍ଣ୍ଣ ମନ୍ତ୍ରାଳୟ ଦାୟିତ୍ବ ସମ୍ଭାଳିଥିଲେ । ତାଙ୍କୁ 13 ଅକ୍ଟୋବର 1984ରେ 66 ବର୍ଷ ବୟସରେ ହତ୍ୟା କରାଯାଇଥିଲା ।
ସଞ୍ଜୟ ଗାନ୍ଧୀ: 1977 ମସିହାରେ ପ୍ରଥମ ଥର ପାଇଁ ଆମେଠି ସଂସଦୀୟ ଆସନରେ ପ୍ରତିଦ୍ବନ୍ଦ୍ବିତା କରିଥିବା ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ସାନପୁଅ ସଞ୍ଜୟ ଗାନ୍ଧୀଙ୍କୁ ଜନତା ପାର୍ଟିର ରବିନ୍ଦ୍ର ପ୍ରତାପ ସିଂଙ୍କଠାରୁ ପରାଜୟର ସମ୍ମୁଖୀନ ହେବାକୁ ପଡ଼ିଥିଲା । ତେବେ 1980ରେ ପ୍ରଥମ ଥର ପାଇଁ ସେ ଏହି ଆସନରୁ ସଫଳତା ପାଇ ସାଂସଦ ହୋଇଥିଲେ । କିଛି ମାସ ପରେ ଜୁନ 23, 1980ରେ ସେ ମାତ୍ର 33 ବର୍ଷ ବୟସରେ ବିମାନ ଦୁର୍ଘଟଣାରେ ମୃତ୍ୟୁବରଣ କରିଥିଲେ । ତାଙ୍କ ପତ୍ନୀ ମେନକା ଗାନ୍ଧୀ ଏବଂ ପୁଅ ବରୁଣ ଗାନ୍ଧୀ ଏବେ ମଧ୍ୟ ରାଜନୀତିରେ ସକ୍ରିୟ ଅଛନ୍ତି । ମେନକା ଗାନ୍ଧୀ ଚଳିତ ନିର୍ବାଚନରେ ସୁଲତାନପୁର ଆସନରୁ ନିର୍ବାଚନ ଲଢୁଛନ୍ତି ।
ଅରୁଣ ନେହେରୁ: ଜବାହରଲାଲ ନେହେରୁଙ୍କ ପୁତୁରା ତଥା ଆନନ୍ଦ କୁମାର ନେହେରୁଙ୍କ ପୁତ୍ର ତଥା ରାଜୀବ ଗାନ୍ଧୀଙ୍କ ସମ୍ପର୍କୀୟ ଅରୁଣ ନେହେରୁ ପ୍ରଥମ ଥର ପାଇଁ ରାୟବରେଲି ସଂସଦୀୟ ଆସନରୁ ସାଂସଦ ହୋଇଥିଲେ । ସେ 1984ରେ ସମାନ ଆସନରୁ ବିଜୟୀ ହୋଇଥିଲେ । 1989ରେ ସେ କଂଗ୍ରେସ ଛାଡି ଜନତା ଦଳରେ ଯୋଗ ଦେଇଥିଲେ ଏବଂ ବିଲହୌର ଲୋକସଭା ଆସନରୁ ନିର୍ବାଚିତ ହୋଇ ସଂସଦରେ ପହଞ୍ଚିଥିଲେ । ପ୍ରଥମରୁ ସେ ଜଣେ ବ୍ୟବସାୟୀ ଥିଲେ, କିନ୍ତୁ ଇନ୍ଦିରା ଗାନ୍ଧୀଙ୍କ ଜିଦରେ ସେ ରାଜନୀତିରେ ପ୍ରବେଶ କରିବାକୁ ରାଜି ହୋଇଥିଲେ । ଯେତେବେଳେ ରାଜୀବ ଗାନ୍ଧୀ ପ୍ରଧାନମନ୍ତ୍ରୀ ହୋଇଥିଲେ ସେତେବେଳେ ଅରୁଣ ନେହେରୁ ତାଙ୍କର ପରାମର୍ଶଦାତା ଥିଲେ । ସେ ମଧ୍ୟ କେନ୍ଦ୍ର ସରକାରଙ୍କ ବିଭିନ୍ନ ମନ୍ତ୍ରଣାଳୟରେ ମନ୍ତ୍ରୀ ଥିଲେ । ସେ 25 ଜୁଲାଇ 2013ରେ 69 ବର୍ଷ ବୟସରେ ମୃତ୍ୟୁବରଣ କରିଥିଲେ ।
ରାଜୀବ ଗାନ୍ଧୀ: ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ପୁଅ ରାଜୀବ ଗାନ୍ଧୀ 1981 ମସିହାରେ ରାଜନୀତିରେ ପ୍ରବେଶ କରିଥିଲେ । ସାନଭାଇ ସଞ୍ଜୟ ଗାନ୍ଧୀଙ୍କ ମୃତ୍ୟୁ କାରଣରୁ ଖାଲିଥିବା ଆମେଠି ସଂସଦୀୟ ଆସନ ପାଇଁ ଉପ-ନିର୍ବାଚନରେ ଜିତି ପ୍ରଥମ ଥର ସଂସଦରେ ପହଞ୍ଚିଥିଲେ । ଏହା ପରେ ସେ 1984, 1989 ଏବଂ 1991ରେ ଆମେଠି ଆସନରୁ ନିର୍ବାଚିତ ହୋଇଥିଲେ । କୁହାଯାଏ ରାଜୀବ ଗାନ୍ଧୀଙ୍କ ରାଜନୀତିରେ ଅଧିକ ଆଗ୍ରହ ନଥିଲା । ସେ ଏକ ବିମାନରେ ପାଇଲଟ୍ ଭାବରେ କାର୍ଯ୍ୟ କରୁଥିଲେ, କିନ୍ତୁ ସାନଭାଇ ସଞ୍ଜୟ ଗାନ୍ଧୀଙ୍କ ଦୁର୍ଘଟଣାରେ ମୃତ୍ୟୁ ପରେ ତାଙ୍କୁ ରାଜନୀତିରେ ପ୍ରବେଶ କରିବାକୁ ପଡିଥିଲା । ଇନ୍ଦିରା ଗାନ୍ଧୀଙ୍କ ମୃତ୍ୟୁ ପରେ ସେ 1984ରେ ଦେଶର ପ୍ରଧାନମନ୍ତ୍ରୀ ହୋଇଥିଲେ । 21 ମେ 1991ରେ ତାଙ୍କୁ ଏକ ନିର୍ବାଚନ ସଭାରେ ବୋମା ବିସ୍ଫୋରଣରେ ହତ୍ୟା କରାଯାଇଥିଲା ।
ଏହା ବି ପଢନ୍ତୁ- ଆମେଠୀରୁ ଏଥର ରାହୁଲଙ୍କ ପରିବର୍ତ୍ତେ ଭିଣୋଇ ରବର୍ଟ ଭଦ୍ରା !
ମେନକା ଗାନ୍ଧୀ: ଇନ୍ଦିରା ଗାନ୍ଧୀଙ୍କ ସାନପୁଅ ସଞ୍ଜୟ ଗାନ୍ଧୀଙ୍କ ପତ୍ନୀ ମେନକା ଗାନ୍ଧୀ 1984 ନିର୍ବାଚନରେ ରାଜନୀତିରେ ପ୍ରବେଶ କରିଥିଲେ । ସେ ନିଜ ଦେଢଶୂର ରାଜୀବ ଗାନ୍ଧୀଙ୍କ ବିରୋଧରେ ଆମେଠି ସଂସଦୀୟ ଆସନରୁ ଏହି ନିର୍ବାଚନରେ ପ୍ରତିଦ୍ବନ୍ଦ୍ବିତା କରିଥିଲେ ଏବଂ ତାଙ୍କୁ ପରାଜୟର ସାମ୍ନା କରିବାକୁ ପଡିଥିଲା । 1989 ରେ ସେ ଆମେଠି ଛାଡି ପିଲିଭିତ ଆସନ ବାଛି ଜନତା ଦଳ ଟିକେଟରେ ଜିତି ପ୍ରଥମ ଥର ପାଇଁ ସଂସଦରେ ପହଞ୍ଚିଥିଲେ । 1996ରେ ମଧ୍ୟ ସେ ଜନତା ଦଳ ଟିକେଟରେ ପିଲିଭିତରୁ ନିର୍ବାଚନରେ ପ୍ରତିଦ୍ବନ୍ଦ୍ବିତା କରି ଜିତିଥିଲେ ମଧ୍ୟ । 1998 ଏବଂ 1999ରେ ମଧ୍ୟ ସେ ଜଣେ ସ୍ବାଧୀନ ପ୍ରାର୍ଥୀ ଭାବରେ ସମାନ ଆସନରୁ ଜିତିଥିଲେ । 2004ରେ ସେ ବିଜେପିର ସଦସ୍ୟତା ଗ୍ରହଣ କରି ଜିତିବା ପରେ ଲୋକସଭାରେ ପହଞ୍ଚିଥିଲେ । 2014ରେ ସେ ପିଲିଭିତରୁ ଏବଂ 2009 ରୁ 2019 ମଧ୍ୟରେ ସୁଲତାନପୁର ସଂସଦୀୟ ଆସନରୁ ପ୍ରତିଦ୍ବନ୍ଦ୍ବିତା କରି ନିର୍ବାଚନରେ ଜିତିଥିଲେ । ଏଥର ସେ ପୁଣି ସୁଲତାନପୁରରୁ ପ୍ରତିଦ୍ବନ୍ଦ୍ବିତା କରୁଛନ୍ତି ।
ସୋନିଆ ଗାନ୍ଧୀ: ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ପତ୍ନୀ ସୋନିଆ ଗାନ୍ଧୀ ପ୍ରଥମ ଥର ପାଇଁ 1999ରେ ଆମେଠି ସଂସଦୀୟ ଆସନରୁ କଂଗ୍ରେସ ଟିକେଟରେ ନିର୍ବାଚନ ଲଢି ବିଜୟିନୀ ହୋଇଥିଲେ । ଏହାପରେ ସେ 2004, 2009, 2014 ଏବଂ 2019ରେ ରାୟବରେଲିରୁ ନିର୍ବାଚନ ଜିତିବାରେ ଲାଗିଲେ । 77 ବର୍ଷୀୟ ସୋନିଆ ଗାନ୍ଧୀ ଏହି ଲୋକସଭା ନିର୍ବାଚନରେ ଅଂଶଗ୍ରହଣ କରିନାହାନ୍ତି । ସେ ସାଂସଦ ଭାବେ ରାଜ୍ୟସଭାକୁ ଯାଇଛନ୍ତି । 2004ରୁ 2014 ପର୍ଯ୍ୟନ୍ତ କଂଗ୍ରେସ ସଭାପତି ତଥା ୟୁପିଏ ଅଧ୍ୟକ୍ଷ ସୋନିଆ ଗାନ୍ଧୀଙ୍କ କାର୍ଯ୍ୟକାଳ ସମୟରେ କଂଗ୍ରେସ ସରକାର କେନ୍ଦ୍ରରେ ଥିଲା । ଏହା ପରେ କଂଗ୍ରେସର ସ୍ଥିତି ଦୁର୍ବଳ ହେବାରେ ଲାଗିଛି ।
ରାହୁଲ ଗାନ୍ଧୀ: ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ପୁଅ ରାହୁଲ ଗାନ୍ଧୀ 2004ରେ ତାଙ୍କ ମାମୁଁ, ପିତା ଏବଂ ମାଆଙ୍କ ପାରମ୍ପରିକ ଆସନ କୁହାଯାଉଥିବା ଆମେଠି ସଂସଦୀୟ ଆସନରୁ ରାଜନୀତି ଆରମ୍ଭ କରିଥିଲେ । ରାହୁଲ ଗାନ୍ଧୀ ମଧ୍ୟ ଏଠାରୁ 2009 ଏବଂ 2014 ଲୋକସଭା ନିର୍ବାଚନରେ ଜିତିଥିଲେ, କିନ୍ତୁ 2019ରେ ତାଙ୍କୁ ବିଜେପି ନେତା ସ୍ମୃତି ଇରାନୀ ପରାସ୍ତ କରିଥିଲେ । ରାହୁଲ ଗାନ୍ଧୀ ଏହି ନିର୍ବାଚନରେ ଆମେଠି ଆସନରୁ କେରଳର ୱାୟନାଡ ଆସନରୁ ପ୍ରତିଦ୍ବନ୍ଦ୍ବିତା କରିଥିଲେ । ତେଣୁ ସେ ୱାୟନାଡ ଆସନରୁ ଜିତି ସଂସଦରେ ପହଞ୍ଚିଥିଲେ । ରାହୁଲ 2024 ଲୋକସଭା ନିର୍ବାଚନ ପାଇଁ ୱାୟନାଡରୁ ନାମାଙ୍କନପତ୍ର ଦାଖଲ କରିଛନ୍ତି । କିନ୍ତୁ ବର୍ତ୍ତମାନ ପର୍ଯ୍ୟନ୍ତ ଆମେଠି ଏବଂ ରାୟବରେଲିରୁ କୌଣସି ପ୍ରାର୍ଥୀଙ୍କ ନାମ ଘୋଷଣା ହୋଇନାହିଁ । ଏଭଳି ପରିସ୍ଥିତିରେ ରାହୁଲ ଗାନ୍ଧୀ ଆମେଠିରୁ ନିର୍ବାଚନ ଲଢିବେ ନାହିଁ ବୋଲି କଳ୍ପନାଜଳ୍ପନା କରାଯାଉଛି । ରାଇବରେଲି ଉପରେ ମଧ୍ୟ ଚର୍ଚ୍ଚା ଜାରି ରହିଛି ।
ବରୁଣ ଗାନ୍ଧୀ: ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ନାତି ତଥା ସଞ୍ଜୟ ଗାନ୍ଧୀଙ୍କ ପୁଅ ବରୁଣ ଗାନ୍ଧୀ ତାଙ୍କ ମା' ମେନକା ଗାନ୍ଧୀଙ୍କ ପାରମ୍ପରିକ ଆସନରୁ 2009ରେ ନିଜର ରାଜନୈତିକ ଇନିଂସ ଆରମ୍ଭ କରିଥିଲେ । 2014ରେ ସେ ପିଲିଭିତ ଛାଡି ସୁଲତାନପୁର ଆସନରୁ ନିର୍ବାଚନରେ ପ୍ରତିଦ୍ବନ୍ଦ୍ବିତା କରି ଜିତିଥିଲେ । 2019ରେ ସେ ପୁନର୍ବାର ପିଲିଭିତକୁ ବାଛିଲେ ଏବଂ ବିଜୟୀ ମଧ୍ୟ ହେଲେ । 2019 ପରେ ମନ୍ତ୍ରୀ ପରିଷଦ ଏବଂ ସଂଗଠନରେ ସ୍ଥାନ ନ ପାଇବା ପରେ ବରୁଣ ଗାନ୍ଧୀ ବିଜେପି ଏବଂ ସରକାରଙ୍କ ବିରୋଧରେ ସ୍ବର ଉତ୍ତୋଳନ କରିଥିଲେ । ସେ ଟ୍ବିଟର ଏବଂ ଖବରକାଗଜରେ ଆର୍ଟିକିଲ ମଧ୍ୟ ଲେଖିଛନ୍ତି । ଏହା ପରେ ନିକଟରେ ହୋଇଥିବା ନିର୍ବାଚନରେ ବିଜେପି ତାଙ୍କ ଟିକେଟ ବାତିଲ କରିଦେଇଛି । ଏବେ ବରୁଣ ଚୁପ ଅଛନ୍ତି । ଏବେ ଦେଖିବାକୁ ବାକି ରହିଲା ତାଙ୍କ ରାଜନୈତିକ ଭବିଷ୍ୟତ କୁଆଡେ ଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
