ମୁଜ୍ଜଫରନଗର: ଉତ୍ତର ପ୍ରଦେଶର ମୁଜ୍ଜଫରନଗର ଜିଲ୍ଲାରେ ଗତକାଲି (ରବିବାର) ଏକ ନିର୍ମାଣାଧିନ ୨ ମହଲା କୋଠା ଭୁଶୁଡି ଯାଇଥିଲା । ଯାହା ଫଳରେ ପ୍ରାୟ ୩୦ ଜଣ କାର୍ଯ୍ୟରତ ଶ୍ରମିକମାନେ ଭଗ୍ନାବଶେଷ ତଳେ ଚାପି ହୋଇଯାଇଥିଲେ । ଗତକାଲି ୬ ଜଣ ଶ୍ରମିକଙ୍କୁ ଉଦ୍ଧାର କରାଯାଇଥିବା ବେଳେ ଆଜି ମିଳିଥିବା ଶେଷ ସୂଚନା ଅନୁସାରେ ୧୫ ଜଣଙ୍କୁ ଉଦ୍ଧାର କରାଯାଇଛି । ଏହି ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବାର ସୂଚନା ରହିଛି । ମୃତକଙ୍କ ନାଁ ମୋହିତ ହୋଇଥିବା ବେଳେ ତାଙ୍କ ଘର ମୁରାଦାବାଦର ବିଲାରୀ ନିୟାମତପୁର ଗାଁ ବୋଲି ଜଣାପଡିଛି । ସେହିପରି ଉଦ୍ଧାର କରାଯାଇଥିବା ୧୧ ଜଣ ଶ୍ରମିକଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି । ଏବେ ବି ଅନେକ ଶ୍ରମିକ ଭଙ୍ଗା କୋଠା ତଳେ ଫସି ରହିଥିବାର ଆଶଙ୍କା କରାଯାଉଛି ।
ଏହା ମଧ୍ୟ ପଢନ୍ତୁ ... ଭୁଶୁଡ଼ିଲା ନିର୍ମାଣାଧିନ କୋଠା, ଫସି ରହିଛନ୍ତି ପ୍ରାୟ ୩୦ କାର୍ଯ୍ୟରତ ଶ୍ରମିକ - Muzaffarnagar Building Collapsed
ସୂଚନାଯୋଗ୍ୟ ଯେ ଗତକାଲି ଦ୍ବିପହର ସମୟରେ ମୁଜ୍ଜଫରନଗର ଜିଲ୍ଲାର ଜାନସାଠ ଥାନା ଅନ୍ତର୍ଗତ ଅଞ୍ଚଳରେ ଏକ ୨ ମହଲା ନିର୍ମାଣାଧିନ କୋଠା ଭୁଶୁଡି ଯାଇଥିଲା । ସେହି ସମୟରେ ଘଟଣା ସ୍ଥଳରେ ଅନେକ ଶ୍ରମିକ ଉପସ୍ଥିତ ଥିଲେ । କୋଠାର ଛାତ ଭୁଶୁଡିବା ପରେ ତରବରିଆ ଭାବେ ସ୍ଥାନୀୟ ଲୋକମାନେ ନିକଟସ୍ଥ ପୋଲିସ ଥାନାକୁ ସୂଚନା ଦେଇଥିଲେ । ପୋଲିସ ସେଠାରେ ପହଞ୍ଚିବା ପରେ ଉଦ୍ଧାର ଅଭିଯାନ ଆରମ୍ଭ ହୋଇଥିଲା । ଏପରିକି ଭାଙ୍ଗିଯାଇଥିବା ଅଂଶଗୁଡିକୁ ହଟାଇବା ପାଇଁ ଜେସିବିର ସହାୟତା ନିଆଯାଇଥିଲା । ସ୍ଥାନୀୟ ଲୋକଙ୍କ ସହାୟତାରେ ଏନଡିଆରଏଫ ଓ ଏସଡିଆରଏଫ ଟିମ୍ ଉଦ୍ଧାର କାର୍ଯ୍ୟରେ ସାମିଲ ରହିଛନ୍ତି । ସେଠାରେ ଡିଆଇଜି ଅଜୟ ସାହାଣୀ, ଡିଏମ ଅରବିନ୍ଦ ମଲ୍ଲପା ବଙ୍ଗାରୀ ଆଦି ଅଧିକାରୀ ଉପସ୍ଥିତ ରହି ସ୍ଥିତି ଅନୁଧ୍ୟାନ କରୁଛନ୍ତି ।
ତେବେ ପାନିପତ-ଖଟିମା ଏନଏଚ ହାଇୱେର ନିର୍ମାଣ ଫଳରେ ଆଖପାଖର ସମସ୍ତ ଘରଗୁଡିକ ୨ରୁ ୩ ଫୁଟ ତଳକୁ ଦବି ଯାଇଛି । ରବିବାର ଦିନ ଉକ୍ତ ଦୁର୍ଘଟଣାଗ୍ରସ୍ତ କୋଠାର ମୂଳଦୁଆକୁ ଜ୍ୟାକ ଦ୍ବାରା ଉଠାଇ ତାର ନିମ୍ନ ଭାଗକୁ ମଜଭୁତ କରିବାର ଚେଷ୍ଟା କରିବା ସମୟରେ ଏହି ଦୁର୍ଘଟଣା ଘଟିଥିଲା ବୋଲି ସୂଚନା ମିଳିଛି । ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମୁଜ୍ଜଫରନଗରର ଏହି ଦୁର୍ଘଟଣା ସମ୍ପର୍କରେ ସଂଜ୍ଞାନ ନେଇଛନ୍ତି । ଏହା ସହ ଆହତ ଶ୍ରମିକମାନଙ୍କ ଉପଯୁକ୍ତ ଚିକିତ୍ସା କରିବା ପାଇଁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ନିର୍ଦ୍ଦେଶ ଦେଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
