Fake Rank Card NIT Warangal Admission : నకిలీ ర్యాంక్​ కార్డుతో NITలో ప్రవేశానికి యత్నం.. చివరకు..?

Fake Rank Card NIT Warangal Admission : వరంగల్​ నిట్​లో ప్రవేశానికి చాలామంది విద్యార్థులు ఆరాటపడుతుంటారు. ఇంటర్ నుంచే నిట్ ప్రవేశ పరీక్షకు సన్నద్ధమై.. మంచి ర్యాంకును సాధించి అక్కడ సీటు పొందుతారు. అయితే తాజాగా వరంగల్​ నిట్​లో ప్రవేశం పొందేందుకు ఓ యువతి నకిలీ ర్యాంక్​ కార్డుతో యత్నించగా తనిఖీల్లో అసలు విషయం బయటపడింది. అడ్డంగా దొరికిపోయింది.

Fake Rank Card NIT Warangal Admission :డిగ్రీ, పీజీ, ఇంజినీరింగ్‌.. ఏ కోర్సులైనా పూర్తి చేయాలంటే కనీసం మూడు నుంచి నాలుగేళ్లు పడుతుంది. ఆ తర్వాత సంబంధిత విశ్వవిద్యాలయాల నుంచిసర్టిఫికెట్ వస్తుంది. ఇవన్నీ లేకుండానే కోర్సును బట్టి డబ్బులు తీసుకుని నకిలీ ధ్రువపత్రాలను చేతిలో పెడుతున్నాయి కొన్ని ముఠాలు. అలాంటి అక్రమార్కులను పట్టుకోవడానికి పోలీసులు ఎన్ని చర్యలు చేపట్టినా.. కొత్త ముఠాలు పుట్టుకొస్తుండటం ఆందోళన కలిగిస్తోంది. రాష్ట్రంలో ఇటీవల కాలంలో నకిలీ ధ్రువపత్రాలు సృష్టించి.. చేసే మోసాలు పెరిగిపోతున్నాయి.

Warangal NIT Fake Admission Issue :తాజాగా వరంగల్ నిట్​లోకి నకిలీ ర్యాంక్ కార్డు(Fake Rank Card)​తో సీట్ పొందేందుకు ఓ విద్యార్థిని యత్నించడం కలకలం రేపుతోంది. అధికారుల తనిఖీల్లో.. ఆ యువతి నకిలీ ర్యాంక్ కార్డు ఉదంతం వెలుగులోకి వచ్చింది. మహారాష్ట్రకు చెందిన యువతి మంచి ర్యాంకు రాకున్నా.. వచ్చినట్లుగానకిలీ కార్డు సృష్టించుకుని.. నిట్​లో ప్రవేశం పొందేందుకు యత్నించింది. విద్యార్థిని ర్యాంక్ కార్డు, నిట్ అలాట్ ​మెంట్ పత్రాలు(NIT Allotment Documents) నకిలీవిగా అధికారుల తనిఖీల్లో గుర్తించారు.

Warangal NIT Admission Issue :యువతికి 5 లక్షల ర్యాంకు వస్తే.. దానిని 50 వేలుగా మార్చుకుని ప్రవేశం పొందేందుకు సిద్ధమైంది. నిట్ అధికారుల విచారణలో.. విద్యార్థిని పత్రాలను ఫోర్జరీ చేసినట్లుగా అంగీకరించినట్లు కూడా తెలుస్తోంది. రూర్కెలాలో కూడా ముగ్గురు విద్యార్ధులు.. ఇదే తరహాలో సీటు పొందేందుకు యత్నించినట్లు సమాచారం. దీంతో ఇది దేశవ్యాప్తంగా జరుగుతున్న కుంభకోణంగా తెలుస్తోంది.

ఫోర్జరీ ద్వారా ప్రతిష్ఠాత్మక విద్యాసంస్థల్లో ప్రవేశం వెనక పెద్ద ముఠానే ఉన్నట్లు స్పష్టమవుతోంది. కాసులకు కక్కుర్తి పడి.. ఈ ముఠా.. విద్యార్థులతో కుమ్మక్కై.. నకిలీ ర్యాంక్ కార్డులు, అలాట్ ​మెంట్ పత్రాలు సృష్టిస్తున్నారు. సెంట్రల్ సీట్ అలకేషన్ బోర్డు(Central Seat Allocation Board) దీనిపై సమగ్రంగా విచారిస్తే.. మరిన్ని అక్రమ ప్రవేశాలు వెలుగులోకి వచ్చే అవకాశాలున్నాయి. ఇలాంటి మోసాలను కట్టడి చేస్తేనే.. ప్రతిభ గల విద్యార్థులకు అన్యాయం జరగకుండా ఉంటుంది.

దేశంలోని నిట్​లలో వరంగల్‌కు మంచి గుర్తింపు ఉంది. కొందరు విద్యార్థులు ఐఐటీల్లో సీట్లు వచ్చినా కాదనుకొని ఇక్కడ సీఎస్‌ఈ, ఈసీసీ, మెకానికల్‌, సివిల్‌ ఇంజినీరింగ్‌ బ్రాంచ్‌లను ఏరికోరి ఎంపిక చేసుకుంటారు. ఇందులో సీటు వస్తే కొలువు ఖాయమని విద్యార్థులు భావిస్తుంటారు. ఏటా ప్రాంగణ నియామకాల్లో ఉద్యోగాలు పొందుతున్న వారి సంఖ్య పెరగడం శుభ పరిణామం. 2021 సంవత్సరంలో వెయ్యి మంది ఉద్యోగాలు పొందగా, అత్యధిక వార్షిక ప్యాకేజీ రూ. 62.5 లక్షలు. ఇక 2022 ఏడాది 1050 మంది ఎంపికైనట్లు నిట్ సెంటర్‌ ఫర్‌ కెరీర్‌ ప్లానింగ్‌ అండ్‌ డెవలప్‌మెంట్ అధికారి తెలిపారు.