హైదరాబాద్-రంగారెడ్డి-మహబూబ్నగర్ పట్టభద్రుల ఎమ్మెల్సీ పోరుకు అధికారులు అన్ని ఏర్పాట్లు చేశారు. ఆదివారం ఉదయం 8 గంటల నుంచి సాయంత్రం 4 గంటల వరకు జరగనున్న ఓటింగ్ కోసం... 799 పోలింగ్ కేంద్రాలు ఏర్పాటు చేశారు. మూడు ఉమ్మడి జిల్లాల పరిధిలో 5 లక్షల 31 వేల 268 మంది ఓటు హక్కు వినియోగించుకోనున్నారు. హైదరాబాద్ ఎల్బీ స్టేడియంలో సిబ్బందికి ఎన్నికల సామగ్రి పంపిణీ చేశారు.
పోస్టల్ బ్యాలెట్
పోలింగ్ కోసం అన్ని ఏర్పాట్లు చేసినట్లు రిటర్నింగ్ అధికారి ప్రియాంక అల తెలిపారు. ఒక్కో పోలింగ్ కేంద్రంలో వెయ్యిమంది ఓటు వేసే అవకాశం ఉందని వెల్లడించారు. ఈ ఎన్నికలకు మెుత్తం 3, 835 మంది సిబ్బంది విధుల్లో పాల్గొననున్నారు. 459 మంది వృద్ధులు, కరోనా బాధితులు పోస్టల్ బ్యాలెట్ ద్వారా ఓటు హక్కు వినియోగించుకున్నారు.
జంబో బ్యాలెట్
ఉమ్మడి మహబూబ్ నగర్ జిల్లాలోనూ పట్టభద్రుల మండలి పోరు కోసం పటిష్ఠ ఏర్పాట్లు చేశారు. ఉమ్మడి పాలమూరు జిల్లావ్యాప్తంగా 173 పోలింగ్ కేంద్రాలు ఏర్పాటు చేశారు. జంబో బ్యాలెట్ బాక్సుల్లో ఓటువేయడానికి తగిన ఏర్పాట్లు చేశామని అధికారులు తెలిపారు. లక్షా 19,367 మంది పట్టభద్రులు ఓటు హక్కును వినియోగించుకోనున్నారు.