Sachin Deep Fake Video: ఈ మధ్యకాలంలో సెలబ్రిటీల డీప్‌ఫేక్‌ వీడియోలు బారిన పడుతున్న సంగతి తెలిసిందే. ప్రస్తుతం ఈ విషయం తీవ్ర కలకలం రేపుతోంది. ఈ మార్ఫింగ్‌ వీడియోలపై ప్రముఖుల కూడా స్పందిస్తూ ఆందోళన వ్యక్తం చేశారు. తాజాగా క్రికెట్ దిగ్గజం సచిన్ తెందూల్కర్కు సంబంధించిన డీప్‌ఫేక్‌ వీడియో నెట్టింట వైరల్‌ అవుతోంది. సాంకేతిక టెక్నాలజీని వాడి, ఆయన వీడియోతో ఓ బెట్టింగ్ యాప్ను ప్రమోట్ చేస్తున్నట్లు సృష్టించారు. అయితే దీన్ని మాస్టర్‌ బ్లాస్టర్‌ ఖండించారు. ఆ వీడియోలో ఉన్నది తాను కాదంటూ సోషల్ మీడియాలో క్లారిటీ ఇచ్చారు. దీనిపై చర్యలు తీసుకోవాలని ప్రభుత్వానికి విజ్ఞప్తి చేశారు.
'ఈ వీడియో ఫేక్. టెక్నాలజీని వాడి ఇలాంటివి క్రియేట్ చేయడం బాధాకరం. ఆందోళన కలిగిస్తోంది. ఇలాంటి వీడియోలు, యాప్లు, అడ్వర్టైజ్మెంట్లు ఎక్కడ కనిపించినా వెంటనే ఫిర్యాదు చేయండి. ఇలాంటి వాటిని అరికట్టేందుకు సోషల్ మీడియా కంపెనీలు కూడా వీటిపై స్పందించాలి. త్వరితగతిన చర్యలు తీసుకోవడం అత్యవసరం" అని ట్విట్టర్లో రాసుకొచ్చారు. ఈ పోస్ట్‌ను కేంద్ర ఐటీశాఖ మంత్రి ఖాతా, మహారాష్ట్ర సైబర్‌ విభాగ ఖాతాకు ట్యాగ్‌ చేశారు.
కాగా, సచిన్ 'స్కైవార్డ్‌ ఏవియేటర్‌ క్వెస్ట్‌' పేరుతో ఉన్న గేమింగ్‌ యాప్‌నకు ప్రచారం చేస్తున్నట్లుగా వీడియోలో కనిపిస్తోంది. ఈ యాప్‌తో డబ్బులు ఎలా సంపాదించవచ్చో ఆయన చెబుతున్నట్లుగా వీడియోను మార్ఫింగ్‌ చేశారు. సోషల్ మీడియాలో వైరల్‌గా మారిన ఈ వీడియో సచిన్ దృష్టికి రావడంతో ఆయన దీన్ని ఖండించారు.