అదనపు కట్నం కోసం పెళ్లైన నాలుగు నెలలకే ఓ నవవధువును హత్య చేశారు అత్తింటి వారు! కుమార్తెను హత్య చేశారన్న కోపంతో ఆగ్రహానికి గురైన తల్లిదండ్రులు.. ఆమె మృతదేహాన్ని వారి ఇంటి ఎదుటే దహనం చేసేందుకు యత్నించారు. ఈ ఘటన బిహార్లోని గోపాల్గంజ్లో జరిగింది. దీనిపై సమాచారం అందుకున్న పోలీసులు ఘటన స్థలానికి చేరుకుని మృతదేహాన్ని స్వాధీనం చేసుకున్నారు.
ఇదీ జరిగింది
సివాన్ జిల్లా బఢహరియా పోలీస్ స్టేషన్ పరిధిలోని సవ్నా గ్రామానికి చెందిన శంభు శరన్ ప్రసాద్ కూతురు నిశా కుమారి. ఈమెను అలాపుర్ గ్రామానికి చెందిన ముకేశ్ కుమార్కు ఇచ్చి.. సంప్రదాయాల ప్రకారం ఫిబ్రవరిలో ఘనంగా వివాహం చేశారు. పెళ్లి తర్వాత అదనపు కట్నం రూ. 10 లక్షలు తీసుకురావాలంటూ నిశాను వేధింపులకు గురిచేశారు అత్తింటి వారు. మరోవైపు ముకేశ్కు మరో మహిళతో కూడా వివాహేతర సంబంధం ఉంది. ఈ విషయం తెలుసుకున్న నిశా కుమారి.. ముకేశ్ను ప్రశ్నించింది. ఈ విషయమై వీరిద్దరి మధ్య గొడవలు కూడా జరిగాయి. ఈ నేపథ్యంలోనే ఆమెపై దాడి చేసి హత్య చేశారు ముకేశ్ కుటుంబ సభ్యులు. పక్కింటి వారు ఈ విషయాన్ని మృతురాలి తల్లిదండ్రులకు తెలియజేయడం వల్ల వెంటనే వచ్చారు. అప్పటికే ముకేశ్ కుటుంబ సభ్యులు అక్కడి నుంచి పరారయ్యారు.
ఇంట్లోకి వెళ్లి చూసే సరికి తమ కూతురు ఉరి వేసుకుని వేలాడుతూ కనిపించిందని ఆవేదన వ్యక్తం చేశాడు మృతురాలి తండ్రి. దీంతో ఆగ్రహానికి గురైన నిశా కుటుంబ సభ్యులు.. వారి ఇంటి ముందే మృతదేహాన్ని దహనం చేసేందుకు ప్రయత్నించారు. గ్రామస్థులు అడ్డుచెప్పినా వినిపించుకోకుండా మృతదేహానికి ఇంటిముందే నిప్పుపెట్టారు. దీనిపై సమాచారం అందుకున్న పోలీసులు.. ఘటనా స్థలానికి చేరుకున్నారు. నిశా కుటుంబ సభ్యులతో మాట్లాడి సర్దిచెప్పారు.