শিৱসাগৰ, 13 নৱেম্বৰঃ ৰাজ্যত দিনক দিনে বৃদ্ধি পাইছে হাতী মানুহৰ সংঘাত ৷ খাদ্যৰ সন্ধানত বনাঞ্চল এৰি জনাঞ্চলত প্ৰৱেশ বন্যহস্তীৰ ৷ কেতিয়াবা যদি হাতীৰ আক্ৰমণত মৃত্যু হৈছে সাধাৰণ লোকৰ, কেতিয়াবা আকৌ বন্যহস্তীক ৰোধিবলৈ ৰাইজে পতা ফান্দত পৰি প্ৰাণ হেৰুৱাইছে হাতীয়ে ৷
শিৱসাগৰ জিলাৰ আখৈফুটীয়া ঘাটৰ সমীপত অজ্ঞাত কাৰণত মৃত্যু হৈছে দুটাকৈ বনৰীয়া হাতী পোৱালিৰ ৷ হাতী দুটাৰ বয়স প্ৰায় 10 ৰ পৰা 12 বছৰ হ'ব বুলি নিশ্চিত কৰিছে বন বিভাগে ৷ পকা ধান খাবলৈ আহি ৰহস্যজনকভাৱে মৃত্যু হোৱা হাতী দুটাক লৈ এতিয়া বিমোৰত পৰিছে বন বিভাগৰ লোকসকল ৷ কিয়নো বনৰীয়া হাতী দুটাৰ মৃত্যুৰ কাৰণ বৰ্তমানলৈকে ঠিৰাং কৰিব পৰা নাই বিভাগে ৷ একাংশই বিদ্যুৎস্পৃষ্ট হৈ হাতী দুটাৰ মৃত্যু হৈছে বুলি সন্দেহ প্ৰকাশ কৰিছে যদিও বন বিভাগে তেনে সন্দেহ নাকচ কৰিছে ৷
শিৱসাগৰত দুটা বনৰীয়া হাতীৰ মৃত্যুৱে সৃষ্টি কৰিছে ৰহস্যৰ