গুৱাহাটী, ১২ ছেপ্টেম্বৰ : ২০২২ আৰু ২০২৩ চনৰ বৰ্ষ দুটাত উত্তৰ-পূৱৰ দুখন ৰাজ্যত অনুষ্ঠিত হ'ব বিধানসভাৰ নিৰ্বাচন । মণিপুৰ আৰু ত্ৰিপুৰাত অনুষ্ঠিত হ'বলগীয়া এই নিৰ্বাচন নেচনেল ডেমক্ৰেটিক এলায়েন্সৰ বাবে অধিক গুৰুত্বপূৰ্ণ হ'ব । আপাতঃ ৰাজনৈতিক সমীকৰণলৈ চালে বিজেপি বা সহযোগী দল সমূহৰ পক্ষতে নিৰ্বাচনী পৰিবেশ আছে যেন লাগে যদিও কেতবোৰ বিশেষ ইচ্যুৱে পৰিস্থিতিৰ পৰিৱৰ্তন ঘটালেও আচৰিত হ’বলগীয়া একো নাথাকিব ।
২০১৪ চনত নতুন দিল্লীত নৰেন্দ্ৰ মোদীৰ নেতৃত্বত এখন বি এছ চৰকাৰ গঠন হোৱা আৰু তাৰ পিছতে অসমত সৰ্বানন্দ সোণোৱালৰ নেতৃত্বত বিজেপি চৰকাৰ গঠন হোৱা ঘটনাই নিঃসন্দেহে প্ৰভাৱিত কৰিছিল উত্তৰ-পূৰ্বাঞ্চলৰ আটাইকেইখন ৰাজ্যৰ ৰাজনীতি । কিন্তু শেহতীয়া ৰাজনৈতিক পৰিস্থিতিত কেতবোৰ সিদ্ধান্ত আৰু সামগ্ৰিক পৰিস্থিতিয়ে বিজেপি বা সহযোগী দলৰ বিজয়ৰ পথত যে জটিলতা আনি দিছে সেয়া নিশ্চিত ।
বিশেষকৈ নাগৰিকত্ব আইনৰ সংশোধনী, মণিপুৰত ইনাৰ লাইন পাৰ্মিটৰ প্ৰচলন, গো-ধন বিপননৰ ক্ষেত্ৰত অনা নিষেধাজ্ঞা, ত্ৰিপুৰাত জনগোষ্ঠীয় দলৰ আত্মপ্ৰকাশ, তৃণমূল দলৰ অভাৱনীয় সম্প্ৰসাৰণ, মুখ্যমন্ত্ৰী বিপ্লৱ দেৱৰ ব্যাক্তিত্ব ইত্যাদিয়ে ইতিমধ্যে ই এন ডি এৰ প্ৰতি নেতিবাচক ধাৰণাৰ সৃষ্টি কৰিছে ।
মন কৰিবলগীয়া যে, এনে পৰিস্থিতিত নেডাৰ আহ্বায়ক হিচাপে অসমৰ মুখ্যমন্ত্ৰী হিমন্ত বিশ্ব শৰ্মাৰ প্ৰতি প্ৰত্যাহ্বানৰ সৃষ্টি কৰিছে । দলৰ এক শীৰ্ষ সূত্ৰৰ মতে এনে পৰিস্থিতি অনুমান কৰিব পাৰি হিমন্ত বিশ্ব শৰ্মাই এতিয়াৰে পৰাই দুয়োখন ৰাজ্যত নিৰ্বাচনী কুচ-কাৱাজ আৰম্ভ কৰিছে । সূত্ৰটোৰ মতে, চলিত মাহৰ শেষৰ সপ্তাহত তেওঁ দুদিনীয়া কাৰ্যসূচীৰে মণিপুৰত উপস্থিত হ'ব আৰু প্ৰাক নিৰ্বাচনী পৰিকল্পনাৰ কাম আৰম্ভ কৰিব ।
জানিব পৰা মতে বিজেপিৰ আগ্ৰাসনে মণিপুৰত জাতীয় কংগ্ৰেছ দলক অস্তিত্ব হীন কৰি তুলিছে যদিও মুখ্যমন্ত্ৰী এন বিৰেন্দ্ৰ সিঙৰ ভূমিকাই চৰকাৰৰ ভিতৰতে অসন্তুষ্টি ৰ সৃষ্টি কৰিছে । গতিকে পৰিস্থিতিৰ সলনি হ’লেও আচৰিত হ'ব লগীয়া একো নাথাকিব । হিমন্ত বিশ্ব শৰ্মাৰ বাবে সেয়াও হৈ পৰিছে প্ৰত্যাহ্বানৰ বিষয় ।
আনহাতে, ২০২৩ চনৰ প্ৰথম ভাগত অনুষ্ঠিত হ'বলগীয়া ত্ৰিপুৰাৰ নিৰ্বাচনৰ বাবেও এতিয়াৰ পৰাই তৎপৰ হৈছে নেডা ।
লোক সভাৰ নিৰ্বাচনৰ বাবে মাত্ৰ এটা বছৰ থকা সময়ত ৰাজকুমাৰ প্ৰদুৎ আৰু তৃণমূল কংগ্ৰেছৰ নেতৃত্ব দিবলৈ অসমৰ পৰা যোৱা সুস্মিতা দেৱে যে ৰাজ্যখনত বিজেপিৰ বিৰুদ্ধে প্ৰতিৰোধ গঢ়ি তুলিব সেয়া নিশ্চিত । গতিকে বিল্পৱ দেৱৰ দৰে নেতাৰ নেতৃত্বাধীন ত্ৰিপুৰা চৰকাৰৰ যাত্ৰা অব্যাহত ৰাখিব লাগিলে হিমন্ত বিশ্ব শৰ্মাই আগতীয়া তৎপৰতা ল'বই লাগিব । উল্লেখ্য যে এনে নিৰ্বাচন কেন্দ্ৰিক বিষয়ক আগস্থান দিয়ে অক্টোবৰ মাহত অনুষ্ঠিত হ'বলগীয়া পূজাৰ সময়ত মুখ্যমন্ত্ৰী হিমন্ত বিশ্ব শৰ্মাই দুদিনীয়া কাৰ্যসূচীৰে আগৰতলাত উপস্থিত হৈ কেইবাখনো দলীয় বৈঠকত অংশগ্ৰহণ কৰাৰ কথা ।
লগতে পঢ়ক :অস্ত্ৰধাৰী সংগঠন শেষ নোহোৱালৈকে অসমত থাকিব AFSPA : হিমন্ত বিশ্ব শৰ্মা
