গুৱাহাটী, 31 মে' : উন্নত প্ৰযুক্তিৰ ব্যৱহাৰেৰে দুৰ্যোগৰ সৈতে মোকাবিলা কৰিব অসমৰ দুৰ্যোগ ব্যৱস্থাপনা বিভাগে ৷ ইতিমধ্যে যাৱতীয় সকলো ব্যৱস্থা গ্ৰহণৰ বাবে বিভাগটোক নিৰ্দেশ দিছে মুখ্যমন্ত্ৰী সৰ্বানন্দ সোণোৱালে ৷
উন্নত প্ৰযুক্তি বিদ্যাৰ সহায়ত বান সমস্যা, বজ্ৰপাত, ধুমুহা, ভূমিকম্প আদি প্ৰাকৃতিক ঘটনাৰাজিৰ উমান আগতীয়াকৈ লাভ কৰি যাতে সাৱধানতা অৱলম্বন কৰিব পাৰি তাৰ বাবেই এই নিৰ্দেশ দিছে মুখ্যমন্ত্ৰীগৰাকীয়ে ৷
জনতা ভৱনৰ চৌহদত থকা ৰাজ্যিক দুৰ্যোগ ব্যৱস্থাপনা প্ৰাধিকৰণৰ কাৰ্যালয়ত উপস্থিত হৈ দেওবাৰে মুখ্যমন্ত্ৰীয়ে এই নিৰ্দেশ দিয়াৰ লগতে বিভাগটোৰ কাম-কাজৰো বুজ লয় । বানৰ উপদ্ৰৱৰ এই সময়খিনিত পঞ্চায়ত পৰ্যায়লৈকে উদ্ধাৰ আৰু সাহাৰ্যৰ সকলো সা-সৰঞ্জাম যোগান ধৰাৰ উপৰিও আশ্ৰয় শিবিৰসমূহত যাতে ক'ভিড-১৯ ৰ সকলো নীতি নিৰ্দেশনা মানি চলা হয় তাৰ ব্যৱস্থা কৰিবলৈ তেওঁ নিৰ্দেশ দিয়ে ।
বিশেষকৈ আশ্ৰয় শিবিৰৰ শিশু সকলৰ ক্ষেত্ৰত বিশেষ নজৰ ৰাখিবলৈও নিৰ্দেশ দিয়ে মুখ্যমন্ত্ৰীয়ে ৷ আনহাতে, নদীপথেৰে যাত্ৰা কৰা সকলো লোকে লাইফ জেকেট পৰিধান কৰাটো বাধ্যতামূলক কৰিবলৈও দুৰ্যোগ ব্যৱস্থাপনা বিভাগটোক নিৰ্দেশ দিয়ে মুখ্যমন্ত্ৰী সৰ্বানন্দ সোণোৱালে ।
লগতে পঢ়ক : ক্ৰমাৎ ভয়ংকৰ ৰূপ লৈছে ৰাজ্যৰ বান পৰিস্থিতিয়ে