স্প’ৰ্টছ ডেস্ক, ১৪ জুন: বৃহস্পতিবাৰে বাংলাদেশ আৰু নেদাৰলেণ্ডৰ মাজত অনুষ্ঠিত মেচৰ পিচত বাংলাদেশৰ অভিজ্ঞ ক্ৰিকেটাৰ ছাকিব আল হাছানৰ ফৰ্মক লৈ বীৰেন্দ্ৰ ছেহৱাগে কৰা সমালোচনাৰ উত্তৰ দিছে ছাকিবে ।
চলিত টি-২০ বিশ্বকাপৰ প্ৰথম দুখন মেচত শ্ৰীলংকা আৰু দক্ষিণ আফ্ৰিকাৰ বিৰুদ্ধে ক্ৰমান্বয়ে ৮ আৰু ৩ ৰাণ সংগ্ৰহ কৰি ৩৭ বছৰীয়া খেলুৱৈগৰাকীয়ে আন্তৰাষ্ট্ৰীয় ক্ৰিকেটলৈ দুৰ্বল প্ৰত্যাৱৰ্তন কৰে । অৱশ্যে তেওঁ নেদাৰলেণ্ডৰ বিৰুদ্ধে মেচখনত ৪৬ টা বলত ৬৪ ৰাণৰ এক 'মেচ উইনিং' ইনিংছেৰে পুনৰ গৰজি উঠে । তেওঁৰ এই ইনিংছটোৰ সহায়তে বাংলাদেশে মেচখনত জয়লাভ কৰে আৰু ছুপাৰ এইটত প্ৰৱেশ কৰে ।
আনহাতে, প্ৰথম দুখন মেচত তেওঁৰ দুৰ্বল প্ৰদৰ্শনৰ পিচত বহু ক্ৰিকেট বিশেষজ্ঞৰ সমালোচনাৰ সন্মুখীন হৈছিল ছাকিব । বীৰেন্দ্ৰ ছেহৱাগো তাৰে ভিতৰত এজন আছিল । কিন্তু এই সন্দৰ্ভত সোধা প্ৰশ্নৰ উত্তৰ দিয়াৰ পূৰ্বে বাংলাদেশৰ অলৰাউণ্ডাৰগৰাকীয়ে কোনে এই মন্তব্য কৰিছিল বুলিহে ওলোটাই সোধে ।
"এগৰাকী খেলুৱৈ কেতিয়াও আন কাৰো উত্তৰ দিবলৈ নাহে (খেলপথাৰত) ।" মেচৰ অন্তত সংবাদমেলত ছাকিবে কয় । "এগৰাকী খেলুৱৈৰ কাম হ'ল বেটাৰ হ'লে বেটিং কৰি দললৈ অৱদান আগবঢ়োৱা । যদি তেওঁ এজন বলাৰ হয় তেন্তে ভাল বলিং কৰা, কিয়নো কেতিয়াবা উইকেট পোৱাটোও ভাগ্যৰ ওপৰত নিৰ্ভৰ কৰে । যদি তেওঁ ফিল্ডাৰ হয় তেন্তে ৰাণ ৰক্ষা কৰা আৰু তেওঁলৈ অহা কেচবোৰ আয়ত্ত কৰা ।" ছাকিবে লগতে কয় ।
উল্লেখ্য যে ইয়াৰ পূৰ্বে ছেহৱাগে ছাকিবৰ ওপৰত তীব্ৰ আক্ৰমণ কৰিছিল । "যদি তেওঁক (ছাকিব) অভিজ্ঞতাৰ বাবে দলত অন্তৰ্ভুক্ত কৰা হৈছিল, তেন্তে আমি সেয়া চাব পৰা নাই । এই উইকেটত অন্ততঃ কিছু সময় অতিবাহিত কৰক, এনে নহয় যে আপুনি (মেথিউ) হেডেন বা (আডাম) গিলক্ৰিষ্ট, যিয়ে এটা শ্বৰ্ট বলৰ পুল শ্বট খেলিব পাৰে । আপুনি কেৱল এজন বাংলাদেশৰ খেলুৱৈ । আপোনাৰ মান অনুসৰি খেলিব । যিহেতু আপুনি হুক বা পুল খেলিব নোৱাৰে, সেয়েহে আপুনি যিবোৰ জানে সেই ষ্ট্ৰোকবোৰহে খেলিব লাগে ।" ছেহৱাগে সোমবাৰে এটা ক্ৰিকবাজ শ্ব'ত এনেদৰে কৈছিল ।
