নিউজ ডেস্ক, 12 মাৰ্চ : কেন্দ্ৰৰ নৰেন্দ্ৰ মোদী চৰকাৰে জাতিধ্বংসী নাগৰিকত্ব সংশোধনী আইনৰ বিধি প্রস্তুতৰ জাননী জাৰি কৰিলেও কোনো কাৰণতে 'কা' মানি ল'ব বিচৰা নাই অসমৰ দল-সংগঠনে । 'কা'ৰ নিয়মাৱলী বলৱৎ হোৱাৰ লগে লগে সমগ্ৰ ৰাজ্য এতিয়া প্রতিবাদত মুখৰ হৈ পৰিছে ।
কংগ্ৰেছ, চিপিআইএম, বি বৰুৱা মহাবিদ্যালয়, আৰ্য মহাবিদ্যালয়ৰ ছাত্ৰ-ছাত্ৰীসকলে মঙলবাৰে মহানগৰীত 'কা'ৰ বিৰুদ্ধে প্ৰতিবাদ সাব্যস্ত কৰে । 'কা' আমি নামানো, বিজেপি চৰকাৰ হায় হায়, হিমন্ত বিশ্ব শৰ্মা হায় হায় আদি চৰকাৰ বিৰোধী শ্লোগান দি প্ৰতিবাদ সাব্যস্ত কৰে । আনহাতে, ৰাজীৱ ভৱনত কংগ্ৰেছ নেতা-কৰ্মীসকলে 'কা'ৰ প্ৰতিলিপি জ্বলাই প্ৰতিবাদ সাব্যস্ত কৰে ।
প্ৰতিবাদ সাব্যস্ত কৰি বিৰোধী দলপতি দেৱব্ৰত শইকীয়াই কয়, "অসমক ভালপোৱা সকলোৱে কাৰ বিৰুদ্ধে আন্দোলন কৰিব লাগে । চৰকাৰক বাধ্য কৰিব লাগে 'কা' প্ৰত্যাহাৰ কৰিবলৈ । 'কা'ৰ জৰিয়তে অসমীয়া জাতিটো ধ্বংস কৰিব ওলাইছে । 'কা'ৰ বাবে অসম চুক্তি অসাৰ হৈ গ'ল । 'কা'ক ৰাজনৈতিক হাতিয়াৰ হিচাপে ব্যৱহাৰ কৰাটো দুৰ্ভাগ্যজনক ।"
তেওঁ লগতে অসম গণ পৰিষদক সমালোচনা কৰি কয় 'কা' সন্দৰ্ভত অগপৰ স্থিতি প্ৰশ্নবোধক হৈ পৰিছে । অসম চুক্তিক লৈ জন্ম হৈছিল দলটো । কিন্তু 'কা'ই অসম চুক্তিৰ কলিজাটোকে নস্যাৎ কৰিছে । এইক্ষেত্ৰত অগপই কেনেকৈ নিজক আগুৱাই নিব সেইটোও প্ৰশ্ন বুলি তেওঁ মন্তব্য কৰে । এই প্ৰতিবাদী কাৰ্যসূচীত প্ৰাক্তন মন্ত্ৰী প্ৰণতি ফুকন, মীৰা বৰঠাকুৰকে ধৰি প্ৰায় শতাধিক নেতা-কৰ্মীয়ে অংশগ্ৰহণ কৰে ।
ইপিনে ৰাজীৱ ভৱনৰ সন্মুখত আৰক্ষী বাহিনীও সষ্টম হৈ পৰে । ৰাজীৱ ভৱনৰ সন্মুখত বেৰিকেড দি ৰাস্তা বন্ধ কৰি দিয়াৰ লগতে গে'টত তলা লগাই দিয়ে ।