মৰাণ, 23 মাৰ্চ : লোকসভা নিৰ্বাচনৰ দিন চমু চপাৰ লগে লগে প্ৰচাৰ তুংগত কৰি তুলিছে প্ৰতিটো ৰাজনৈতিক দলে । ৰাজ্যৰ 14 টা লোকসভা সমষ্টিৰ ভিতৰত অতি আকৰ্ষণীয় হৈ উঠিছে ডিব্ৰুগড় লোকসভা সমষ্টি দখলৰ বাবে শাসক-বিৰোধীৰ নিৰ্বাচনী যুঁজখন ।
ডিব্ৰুগড় লোকসভা সমষ্টিৰ বিজেপি মিত্ৰজোঁটৰ প্ৰাৰ্থীক জয়যুক্ত কৰাৰ উদ্দেশ্যে অসম গণ পৰিষদ দলেও গ্ৰহণ কৰিছে নিৰ্বাচনী ৰণনীতি । ডিব্ৰুগড়ত দলীয় কৰ্মীৰ সৈতে শুকুৰবাৰে আলোচনাত মিলিত হ'ল অসম গণ পৰিষদৰ সভাপতি অতুল বৰা আৰু কাৰ্যকৰী সভাপতি কেশৱ মহন্ত ।
ডিব্ৰুগড় লোকসভা সমষ্টিৰ মিত্ৰজোঁটৰ প্ৰাৰ্থী সৰ্বানন্দ সোণোৱালৰ বিজয় নিশ্চিত বুলি দাবী কৰি সমষ্টিটোৰ বিৰোধী ঐক্য মঞ্চৰ প্ৰাৰ্থী লুৰীণজ্যোতি গগৈৰ সৈতে সৰ্বানন্দৰ কোনো ধৰণৰ তুলনাই কৰিব নোৱাৰি বুলি কয় মন্ত্ৰী অতুল বৰাই । মুখ্যমন্ত্ৰী ড৹ হিমন্ত বিশ্ব শৰ্মাৰ নেতৃত্বত অসমত দ্ৰুত গতিত উন্নয়ন হোৱাৰ বাবে অসমৰ জনসাধাৰণে বিজেপি মিত্ৰজোঁটৰ প্ৰাৰ্থী সৰ্বানন্দ সোণোৱালক ভোট প্ৰদান কৰিব বুলিও নিশ্চিতি প্ৰদান কৰে মন্ত্ৰী অতুল বৰাই ।
অসমত 14 খন আসনতে বিজেপি জয়যুক্ত হ’ব বুলি দাবী কৰি বিৰোধী দলক অসমৰ ৰাইজে কেতিয়াও ভোট নিদিয়ে বুলি সংবাদ মাধ্যমৰ আগত কয় অসম গণ পৰিষদৰ সভাপতি অতুল বৰাই । লুৰীণজ্যোতিৰ বিৰুদ্ধাচৰণ কৰিবলৈ গৈ বৰাই অসম আন্দোলন, অগপ দল কিয় গঠন হ’ল আদি সন্দৰ্ভতো বাখ্যা আগবঢ়ায় ৷