ETV Bharat / politics

মহাৰাষ্ট্ৰত লোকসভাৰ ৪০ খনতকৈও অধিক আসন লাভ কৰিম : আত্মবিশ্বাসী মুখ্যমন্ত্ৰী একনাথ সিন্দে - Maharashtra CM Eknath Shinde

author img

By ETV Bharat Assamese Team

Published : May 28, 2024, 4:34 PM IST

Eknath Shinde Exclusive : মহাৰাষ্ট্ৰৰ মুখ্যমন্ত্ৰী একনাথ সিন্দেই ই টিভি ভাৰত মহাৰাষ্ট্ৰৰ সম্পাদক শচীন পৰবৰ সৈতে বিভিন্ন বিষয় সন্দৰ্ভত মতামত আগবঢ়ায় । মুখ্যমন্ত্ৰীগৰাকীয়ে কয় যে মহাযুটিয়ে মহাৰাষ্ট্ৰত ৪০ খনতকৈও অধিক আসন লাভ কৰিব । উল্লেখ্য যে মহাৰাষ্ট্ৰত ৪৮ খন লোকসভা আসন আছে । আনহাতে, একনাথ সিন্দেই প্ৰধানমন্ত্ৰী নৰেন্দ্ৰ মোদীৰ প্ৰশংসা কৰাৰ বিপৰীতে কংগ্ৰেছৰ প্ৰাক্তন মুৰব্বী ৰাহুল গান্ধীক তীব্ৰ সমালোচনা কৰে ।

Eknath Shinde Exclusive
লোকসভা নিৰ্বাচনত আত্মবিশ্বাসী মহাৰাষ্ট্ৰৰ মুখ্যমন্ত্ৰী (ETV Bharat)

বিশেষ প্ৰতিবেদন, ২৮ মে' : মহাৰাষ্ট্ৰৰ মুখ্যমন্ত্ৰী একনাথ সিন্দেই বিশ্বাস ব্যক্ত কৰিছে যে বিগত দুটা বছৰত তেওঁৰ চৰকাৰে কৰা কাম আৰু প্ৰধানমন্ত্ৰী নৰেন্দ্ৰ মোদীৰ কামৰ ওপৰত ভিত্তি কৰি 'মহাযুটিয়ে' ৰাজ্যখনৰ ৪০ খনতকৈও অধিক লোকসভা আসনত জয়লাভ কৰিব ।

মহাৰাষ্ট্ৰত লোকসভাৰ ৪০ খনতকৈও অধিক আসন লাভ কৰিম : আত্মবিশ্বাসী মুখ্যমন্ত্ৰী একনাথ সিন্দে (EETV Bharat)

উল্লেখ্য যে উত্তৰ প্ৰদেশৰ পিচত মহাৰাষ্ট্ৰত দেশৰ দ্বিতীয় সৰ্বাধিক সংখ্যক লোকসভা আসন আছে । মহাৰাষ্ট্ৰত ৪৮ খন লোকসভা আসন আছে । মহাযুটিত আছে বিজেপি, মুখ্যমন্ত্ৰী একনাথ সিন্দেৰ নেতৃত্বত শিৱসেনা আৰু মহাৰাষ্ট্ৰৰ উপ-মুখ্যমন্ত্ৰী অজিত পাৱাৰৰ নেতৃত্বত নেচনেলিষ্ট কংগ্ৰেছ পাৰ্টী (এনচিপি) । এই জোঁটটোৱে ৰাজ থাকৰে নেতৃত্বাধীন মহাৰাষ্ট্ৰ নৱনিৰ্মাণ সেনাৰো (এমএনএছ) সমৰ্থন লাভ কৰিছে ।

আমি মহাৰাষ্ট্ৰত ৪০ খনতকৈ অধিক আসন লাভ কৰিম

থানে জিলাৰ বাসিন্দা মুখ্যমন্ত্ৰী সিন্দেই ই টিভি ভাৰতৰ সৈতে হোৱা এক বিশেষ সাক্ষাৎকাৰত কয়, "পাঁচটা পৰ্যায়ৰ ভোটগ্ৰহণৰ পিচত (মহাৰাষ্ট্ৰত) মই নিশ্চিত যে ৰাজ্যখনত আমাৰ চৰকাৰে মেট্ৰ' সম্পৰ্কীয় কাম, বালাচাহেব থাকৰে সমৃদ্ধি মহামাৰ্গ, (মেট্ৰ' ) কাৰ-শ্বেড, অভিলাষী অটল সেতু, মুম্বাই উপকূলীয় পথ আদিৰ দৰে বন্ধ প্ৰকল্পসমূহ পুনৰ আৰম্ভ কৰাৰ দৰে কামৰ ওপৰত ভিত্তি কৰি আমি ভাল ফলাফল লাভ কৰিম ।"

"কৃষক, মহিলা আৰু যুৱসকলৰ বাবে আমাৰ চৰকাৰে লোৱা সিদ্ধান্ত, উদ্যোগৰ বিকাশৰ বাবে আৰু বিগত ১০ বছৰত (প্ৰধানমন্ত্ৰী) নৰেন্দ্ৰ মোদীজীয়ে কৰা কাম, যিটো কংগ্ৰেছে ৫০-৬০ বছৰে কৰাত ব্যৰ্থ হৈছিল আৰু তেওঁলোকে আগন্তুক ১০০ বছৰতো কৰিব নোৱাৰিব, এইবোৰৰ বাবে নিৰ্বাচনত ভাল ফলাফল লাভ কৰিম । আমি উন্নয়নৰ কাৰ্যসূচী লৈ জনসাধাৰণৰ ওচৰলৈ গৈছো আৰু মানুহে উন্নয়নক অগ্ৰাধিকাৰ দিছে । সেয়েহে মই নিশ্চিত যে মহাযুটিয়ে মহাৰাষ্ট্ৰত ৪০ খনতকৈও অধিক আসন লাভ কৰিব ।"

মহা বিকাশ আঘাড়ীৰ শাসনকালত মহাৰাষ্ট্ৰত উন্নয়ন স্থবিৰ হৈছিল

প্ৰয়াত আনন্দ দিঘেৰ শিষ্য সিন্দেৰ মতে, তেওঁৰ চৰকাৰ শাসনলৈ অহাৰ পূৰ্বে, যেতিয়া মহা বিকাশ আঘাড়ী (এমভিএ) চৰকাৰ শাসনত আছিল, মহাৰাষ্ট্ৰ প্ৰত্যক্ষ বিদেশী বিনিয়োগৰ চতুৰ্থ স্থানত আছিল আৰু জিডিপিৰ ক্ষেত্ৰত পিচপৰি আছিল ।

"আমাৰ চৰকাৰ শাসনলৈ অহাৰ পিচত মহাৰাষ্ট্ৰ প্ৰত্যক্ষ বিদেশী বিনিয়োগত (এফডিআই) প্ৰথম স্থানলৈ আগ্ৰসৰ হৈছে, আমি জিডিপিত যথেষ্ট অৰিহণা যোগাইছো, ৬ লাখ টকাৰ বিনিয়োগ হৈছিল আৰু ৰাজ্যখনলৈ উদ্যোগ আহি আছে । বৰ্তমান মানুহ ৰাজ্যখনলৈ আহি আছে, কিন্তু প্ৰথমে ইয়াৰ পৰা তেওঁলোক পলাই গৈছিল । পূৰ্বতে মানুহে উদ্যোগপতিসকলৰ ঘৰৰ ওচৰত বোমা বা জিলেটিন ৰাখিছিল, তেওঁলোকে তেওঁলোকৰ বিৰুদ্ধে প্ৰতিবাদ কৰিছিল । আমাৰ চৰকাৰ শাসনলৈ অহাৰ পিচত এই সকলোবোৰ বন্ধ হৈছে । আমি উদ্যোগক প্ৰচাৰ কৰিছো আৰু উদ্যোগপতিসকলক ৰঙা দলিচাৰে আদৰণি জনাইছো, ৰাজসাহায্য আৰু প্ৰক্ৰিয়া সহজ কৰিছো । সেয়েহে মহাৰাষ্ট্ৰক সমগ্ৰ বিশ্বৰ উদ্যোগপতিসকলে অগ্ৰাধিকাৰ দিছে আৰু পছন্দ কৰিছে ।" মুখ্যমন্ত্ৰীয়ে লগতে কয় ।

"আমাৰ ওচৰত আন্তঃগাঁথনি, সম্ভাৱনা, ভাল সংযোগ, দক্ষ জনশক্তি আছে আৰু বিনিয়োগৰ ফলত ই নিযুক্তি সৃষ্টিত সহায় কৰিব । মানুহে সংস্থাপন পাব আৰু ৰাজ্যখনত উন্নয়ন হৈছে । দ্বৈত ইঞ্জিন চৰকাৰ (এখন ৰাজ্যত আৰু আনখন কেন্দ্ৰত)- দুয়োখনে উন্নয়ন বিচাৰে । আমাক কেন্দ্ৰয়ো সমৰ্থন জনাইছে ।" তেওঁ লগতে কয় ।

মানুহে ঘৰত বহি থকাসকলক ভোট নিদিয়ে

সিন্দেই মহাৰাষ্ট্ৰৰ প্ৰাক্তন মুখ্যমন্ত্ৰী তথা শিৱসেনা (উদ্ধৱ বালাচাহেব থাকৰে)ৰ মুৰব্বী উদ্ধৱ থাকৰেক সমালোচনা কৰি কয় যে মানুহে ঘৰত বহি ফেচবুক লাইভ কৰা কোনো ব্যক্তিক ভোট নিদিয়ে ।

"যিসকল কৰ্মক্ষেত্ৰত আছে আৰু উন্নয়নৰ বাবে কাম কৰে, তেওঁলোকক মানুহে সমৰ্থন কৰে । সমগ্ৰ ৰাজ্যতে উন্নয়নমূলক কাম চলি আছে ।" পঞ্চপাখাড়ীৰ বিধায়ক সিন্দেই কয় ।

ৰাইজৰ ওচৰলৈ উন্নয়নৰ কাৰ্যসূচী লৈ যোৱা হৈছে

সিন্দেই কয় যে তেওঁ আৰু উপ-মুখ্যমন্ত্ৰী দেৱেন্দ্ৰ ফাড়নভিশ আৰু অজিত পাৱাৰে এটা দল গঠন কৰিছে আৰু তেওঁলোকে কেৱল উন্নয়নৰ কাৰ্যসূচী লৈ ভোটাৰৰ ওচৰলৈ গৈছে ।

"আমি উন্নয়ন আৰু আমাৰ চৰকাৰে কৰা কামৰ বিষয় লৈ ৰাইজৰ ওচৰলৈ গৈছোঁ । আমাৰ প্ৰথম চৰকাৰে দুবছৰৰ ভিতৰতে বহুকেইটা সিদ্ধান্ত লৈছে, যেনে মহিলাসকলৰ বাবে 'লেক লড়কি' আঁচনি, ৰাজ্যিক পৰিবহণৰ বাছত ৫০ শতাংশ ৰেহাই, যুৱসকলৰ বাবে ষ্টাৰ্ট-আপ । গতিকে মই বিশ্বাস কৰোঁ যে মানুহে আমি কৰা কামৰ বাবে ভোট দিব আৰু তেওঁলোকে আমাৰ কাম ভাল পাব ।" সিন্দেই দৃঢ়তাৰে কয় ।

মোদীজীয়ে উন্নয়নৰ বাবে মহাৰাষ্ট্ৰক প্ৰশংসা কৰিছে

উল্লেখ্য যে প্ৰধানমন্ত্ৰী নৰেন্দ্ৰ মোদীয়ে মুম্বাইৰ ঘাটকোপাৰ অঞ্চলত এটা ৰোড শ্ব' অনুষ্ঠিত কৰিছিল । প্ৰধানমন্ত্ৰীয়ে ৰাজপথত নামি মুম্বাইত দুখনকৈ ৰেলী কৰিবলগা হৈছিল, তেনেক্ষেত্ৰত নিৰ্বাচন ইমান কঠিন হৈ পৰিছে নেকি বুলি সোধাত সিন্দেই ইয়াৰ প্ৰত্যুত্তৰত কয়, "এইটো এটা নিয়ম নে আইন যে প্ৰধানমন্ত্ৰী আহিব নালাগে... । প্ৰধানমন্ত্ৰী অহাৰ মুহূৰ্তত বিৰোধীয়ে ভয় খাইছিল... মোদীজীয়ে ৰাজ্যখনৰ উন্নয়নমূলক কামৰ বাবে মহাৰাষ্ট্ৰক প্ৰশংসা কৰিছে ।"

"যেতিয়াই আমি মোদীজীক মেট্ৰ'-২, মেট্ৰ'-৭, সমৃদ্ধি ঘাইপথ, অটল সেতু উদ্বোধনৰ বাবে মাতিছিলোঁ, তেওঁ উন্নয়ন পছন্দ কৰাৰ বাবে স্বেচ্ছাই আহিছিল । মানুহে মোদীজীক ভালপায় আৰু তেওঁক চাবলৈ লাখ লাখ মানুহ আছিল (ৰোড শ্ব' আৰু ৰেলীৰ সময়ত) । বিৰোধী দল দুৰ্বল হৈ পৰিছে, কিয়নো তেওঁলোকে সৰু পথ আৰু পথৰ কোণতহে ৰেলী কৰিবলগা হৈছিল ।" সিন্দেই লগতে কয় ।

আনহাতে, মহাৰাষ্ট্ৰৰ মুখ্যমন্ত্ৰীয়ে ৰগৰ কৰি কয়, "বিৰোধী পক্ষক চিৰদিনৰ বাবে ৰাস্তালৈ অনাৰ বাবে মোদীজী ৰাস্তালৈ আহিছে ।"

বিৰোধীৰ কথা ক'বলৈ কোনো ইছ্যু নাই

সিন্দেই বিৰোধীক সমালোচনা কৰি কয় যে তেওঁলোকৰ কথা ক'বলৈ কোনো ইছ্যু নাই । "তেওঁলোকে উন্নয়নৰ ওপৰত কথা ক'ব নোৱাৰে । কিয়নো যদি তেওঁলোকে তেনে কৰে, তেন্তে প্ৰধানমন্ত্ৰীয়ে কামৰ হিচাপ দিব আৰু তেওঁলোকৰ মুখ বন্ধ হৈ যাব । সেয়েহে তেওঁলোকে সংবিধান সলনি কৰাৰ কথা কয় । ডঃ বাবাচাহেব আম্বেদকাৰৰ সংবিধানৰ বাবে দেশখন চলি আছে আৰু যাৰ বাবে মোদীজীৰ দৰে এজন সাধাৰণ মানুহ প্ৰধানমন্ত্ৰী হ'ব পাৰিছে, যিটো প্ৰধানমন্ত্ৰীয়েও স্বীকাৰ কৰে ।" সিন্দেই কয় ।

তেওঁ লগতে কয় যে কংগ্ৰেছে ৫০-৬০ বছৰ ধৰি সংবিধানৰ বিষয়ে চিন্তা কৰা নাছিল । "সংবিধান দিৱস উদযাপন কোনে আৰম্ভ কৰিছিল, সেয়া আছিল মোদীজী... ডঃ বাবাচাহেব আম্বেদকাৰক পৰাস্ত কৰা কংগ্ৰেছেই আছিল । ডঃ (বাবাচাহেব) আম্বেদকাৰে ক'বলৈ আৰম্ভ কৰিছিল যে কংগ্ৰেছ হৈছে এনে এটা ঘৰ যিটো জ্বলি যায়, আৰু ইয়াৰ পৰা আঁতৰি থাকিব লাগে । গতিকে মই ক'ম যে সংবিধানত কোনো পৰিৱৰ্তন নহয় । কংগ্ৰেছে ৮২ বাৰ সংবিধান সংশোধন কৰিছে । কংগ্ৰেছ স্বাৰ্থপৰ আৰু প্ৰধানমন্ত্ৰী মোদীয়ে ৰাষ্ট্ৰীয় নিৰাপত্তাৰ ক্ষেত্ৰত আপোচ নকৰে । এনে এজন ব্যক্তি প্ৰধানমন্ত্ৰী হৈছে, যাক কংগ্ৰেছে হজম কৰিব পৰা নাই ।" তেওঁ কয় ।

মোদীয়ে ভাৰতক 'ছুপাৰ পাৱাৰ' কৰি তুলিব

সিন্দেয়ে কয় যে মোদীয়ে এইটো নিশ্চিত কৰিব যে দেশখন এক মহাশক্তিত পৰিণত হ'ব আৰু দেশক উন্নয়নৰ পথত লৈ যাব । "তেওঁলোকে (কংগ্ৰেছে) কি কৰে, বিদেশত দেশক বদনাম কৰে, সেয়া দেশপ্ৰেম নেকি ? তেওঁলোকে পাকিস্তানৰ ভাষা কৈ আছে আৰু তেওঁলোকে হেমন্ত কাৰকাৰে, বিজয় চালাস্কাৰ আৰু তুকাৰাম ওমবালেৰ দৰে আৰক্ষীৰ শ্বহীদবৰণক লৈ প্ৰশ্ন উত্থাপন কৰিছে । এয়া তেওঁলোকৰ শ্বহীদৰ প্ৰতি অপমান । তেওঁলোকৰ এজেণ্ডা এটাই, সেইটো হৈছে মোদীক পৰাস্ত কৰা । কিন্তু তেওঁলোক ২০১৪ চনত পৰাস্ত হৈছিল, ২০১৯ চনত হৈছে আৰু ২০২৪ চনতো তেওঁলোক উৰি যাব ।" সিন্দেই কয় ।

কংগ্ৰেছৰ প্ৰাক্তন মুৰব্বী ৰাহুল গান্ধীক তীব্ৰ আক্ৰমণ মুখ্যমন্ত্ৰী সিন্দেৰ

ৰাহুল গান্ধীয়ে দাবী কৰিছিল যে যদি কংগ্ৰেছ ক্ষমতালৈ আহে, তেন্তে বিজেপি নেতাসকলক কাৰাগাৰলৈ নিক্ষেপ কৰা হ'ব । এই সন্দৰ্ভত সোধা প্ৰশ্নত সিন্দেই কয়, "কোনোবাই যদি সপোনতো ৰাহুল গান্ধী প্ৰধানমন্ত্ৰী হোৱা দেখিবলৈ পায়, কিন্তু সাৰ পাই উঠি সেয়া পাহৰি যায় । ভাৰত জোড়ো, ভাৰত টোড়ো কৰি তেওঁ ইফালে-সিফালে দৌৰে, কিন্তু প্ৰধানমন্ত্ৰী মোদীয়ে 10 বছৰত এটা দিনো ছুটী লোৱা নাই আৰু তেওঁৰ জীৱন দেশৰ বাবে উৎসৰ্গিত কৰিছে । যদি আপুনি মানুহক শুই অৱস্থাতো সোধে যে কোন প্ৰধানমন্ত্ৰী হ'ব, তেওঁলোকে ক'ব, মোদীজী । ৰাহুল গান্ধীৰ নাম কোনে ল'ব ? তেওঁৰ কাম কি মোক কওক । তেওঁ কেতিয়াও প্ৰধানমন্ত্ৰী হ'ব নোৱাৰে আৰু সেয়েহে আগলৈ এই বিষয়ে আলোচনা কৰাৰ কোনো অৰ্থ নাই ।" সিন্দেৰ মতে মহাৰাষ্ট্ৰৰ জনসাধাৰণৰ সৈতে তেওঁৰ সম্পৰ্ক কেৱল নিৰ্বাচনতে সীমাবদ্ধ নহয়, তাৰো বাহিৰত ।

মুখ্যমন্ত্ৰী সিন্দেই ঐক্যবদ্ধ শিৱসেনাক বিভক্ত কৰাৰ অভিযোগক খাৰিজ কৰে । মুখ্যমন্ত্ৰীয়ে লগতে কয় যে দলটো আৰু ইয়াৰ প্ৰতীক- ধনু আৰু কাঁড়ক বচাবলৈ শিৱসেনাক বিভাজন কৰাৰ সিদ্ধান্ত প্ৰয়োজনীয় আছিল ।

"শিৱ সৈনিকসকলক বচাবলৈ এইটো কৰা হৈছে । কিয়নো ক্ষমতাৰ লোভৰ বাবে আমাৰ নেতাসকল অন্ধ হৈ পৰিছিল । তেওঁলোকে মহাৰাষ্ট্ৰৰ লোকসকলক পিচফালৰ পৰা আঘাত কৰিছিল । মহাৰাষ্ট্ৰৰ 12.5 কোটি লোকে বিজেপি আৰু শিৱসেনাৰ সপক্ষে ভোট দিছিল, কিন্তু কংগ্ৰেছৰ সৈতে চৰকাৰ গঠন কৰা হৈছিল । সেয়েহে প্ৰথমতে তেওঁলোকে জনসাধাৰণক পিচফালৰ পৰা আঘাত কৰিছিল আৰু বালাচাহেব থাকৰেৰ আদৰ্শৰ পৰা আঁতৰি গৈ তেওঁক পিচফালৰ পৰা আঘাত কৰিছিল । তেওঁলোকে তেওঁলোকৰ সহযোগী বিজেপিক আঘাত কৰিছিল । যদি আমি একত্ৰিত শিৱসেনাত থাকিলোহেঁতেন, দলটো শেষ হ'লহেঁতেন । গতিকে আমি এই সিদ্ধান্তটো লৈছিলো আৰু মানুহে ইয়াক ভাল পাইছে ।" তেওঁ দাবী কৰে ।

পুনেৰ বিলাসী কাৰ দুৰ্ঘটনাৰ গোচৰত কাকো ৰেহাই দিয়া নহ'ব

ইফালে এগৰাকী ১৭ বছৰীয়া কিশোৰৰ সৈতে সংঘটিত পুনেৰ বিলাসী কাৰ প'ৰ্ছি দুৰ্ঘটনা সন্দৰ্ভত মুখ্যমন্ত্ৰীয়ে স্পষ্টভাৱে কয় যে তেওঁ পুনে আৰক্ষী আয়ুক্তক গোচৰটোত কঠোৰ ব্যৱস্থা গ্ৰহণ কৰিবলৈ কৈছে ।

"আইনৰ চকুত সকলোৱে সমান । মই (পুনে) আৰক্ষী আয়ুক্তক ফোন কৰিছোঁ আৰু স্পষ্টকৈ কৈছোঁ যে এই ক্ষেত্ৰত কাকো ৰেহাই দিয়া উচিত নহয় । সকলো অপৰাধীয়ে কাৰাগাৰলৈ যোৱা উচিত, তেওঁলোক যিমানেই শক্তিশালী নহওক কিয় । এইটো মোৰ নিৰ্দেশনা আছিল, কাৰণ যি দুটাৰ প্ৰাণ গৈছে তেওঁলোক কাৰোবাৰ পুত্ৰ আৰু কন্যা । কাৰোবাৰ ওপৰেৰে গাড়ী চলাই কাৰোবাক মুক্তভাৱে চলিবলৈ দিয়াৰ অধিকাৰ কাৰো নাই, আমাৰ ৰাজ্যত এনে নহ'ব ।" মুখ্যমন্ত্ৰী সিন্দেই এই কথা কৈ সামৰণি মাৰে ।

লগতে পঢ়ক :ৰাহুলক কটাক্ষ উত্তৰ প্ৰদেশৰ উপ মুখ্যমন্ত্ৰীৰ - Lok Sabha Election 2024
ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.