Bandi Sanjay Visited Vemulawada Rajanna Temple: వేములవాడ రాజన్న ఆలయ అభివృద్ధికి ఏడాదికి రూ.100 కోట్ల చొప్పున రూ.400 కోట్లు ఖర్చు చేస్తానని చెప్పి సీఎం కేసీఆర్ మాటతప్పారని బీజేపీ రాష్ట్ర అధ్యక్షుడు బండి సంజయ్ ఆరోపణలు చేశారు. వేములవాడ మహాశివరాత్రి జాతర సందర్భంగా రాజరాజేశ్వర స్వామి వారిని బండి సంజయ్ దర్శించుకున్నారు. దర్శనం అనంతరం బండి సంజయ్ సీఎం కేసీఆర్పై తీవ్రస్థాయిలో విమర్శలు చేశారు.
దేశం సుభీక్షంగా ఉండాలని రాజన్నను కోరుకున్నట్లు బండి సంజయ్ తెలిపారు. రాజన్న సన్నిధికి దర్శించుకోవడానికి ఎక్కువగా పేద ప్రజలే వస్తున్నారని పేర్కొన్నారు. శివదీక్ష పరులు ఎక్కువగా పెరిగిపోయారని, వేములవాడ రాజరాజేశ్వర స్వామి దర్శించుకునేందుకు వచ్చిన భక్తులు శివుని మర్చిపోలేరని కొనియాడారు.
అలాగే ముఖ్యమంత్రి కేసీఆర్ను కూడా ఈ ప్రాంత ప్రజలు మర్చిపోలేరని మండిపడ్డారు. ఎందుకంటే యాదాద్రి అభివృద్ధి చేసినట్లే.. వేములవాడను కూడా అభివృద్ధి చేస్తానని చెప్పి మర్చిపోయారని విమర్శించారు. మహాశివరాత్రి జాతర సందర్భంగా భక్తులకు కనీస సౌకర్యాలు ఏర్పాటు చేయడంలో ఈ ప్రభుత్వం విఫలం అయ్యిందని ధ్వజమెత్తారు. "సాక్ష్యాత్తు ఆ పరమశివుని సన్నిధిలో అడుగుతున్నా.. నీ బిడ్డ పేరు దొంగ సారా దందాలో నాలుగుసార్లు వచ్చిందని.. మరి ఎందుకు నోరు విప్పడం లేదు" అని ప్రశ్నించారు. రాజన్న సన్నిధిలో బీజేపీ మెడికల్ సెల్ను ఏర్పాటు చేసిందని తెలిపారు.
"వేములవాడ అభివృద్ధికి సీఎం కేసీఆర్ ఇప్పటి వరకు ఎంత కేటాయించారో చెప్పాలి. నీ బిడ్డ అక్రమ మద్యం కేసులో రూ.100కోట్ల తీసుకుపోయింది. ఎప్పటికైనా పోలీసులు అరెస్ట్ చేయడం ఖాయం. అయితే వేములవాడ దేవాలయానికి సీఎం రూ.50కోట్లు అడిగితే డబ్బులు ఇవ్వడం లేదు. ఎమ్మెల్సీ కవితకు మాత్రం రూ.100కోట్లు ఎక్కడి నుంచి వచ్చాయో చెప్పాలి. ఇవాళ శివరాత్రి జాతరలో పేదవాళ్లకు కనీస సౌకర్యాలు కూడా ఈ ప్రభుత్వం కల్పించలేదు. ఆ ఆది దేవుడు అన్నీ చూస్తూనే ఉన్నాడు. ఆ దేవుడు సీఎంను చూస్తూ ఊరుకోడని.. అలాగే ప్రధాని మోదీ కూడా సీఎం కేసీఆర్ను విడిచిపెట్టే ప్రసక్తి లేదు." - బండి సంజయ్, బీజేపీ రాష్ట్ర అధ్యక్షుడు
ఇవీ చదవండి:
