Geeta Workers In Jagtial : ఈత సాగుతో గీత కార్మికులకు ఉపాధి
Published: May 26, 2023, 8:53 AM
Geeta Workers In Jagtial : ఈత సాగుతో గీత కార్మికులకు ఉపాధి
Published: May 26, 2023, 8:53 AM
Geeta Workers In Jagtial : రైతులు సేంద్రీయ వ్యవసాయం, ఉద్యాన పంటలను సాగు చేసి లాభాలను పొందటం చూస్తూనే ఉన్నాం. కానీ, గీత కార్మికులు జగిత్యాల జిల్లాలోని అంతర్గాంలో ఈత వనం సాగు చేపట్టి అద్భుత ఫలితాలను సాధిస్తున్నారు. సూక్ష్మసేద్య పద్ధతిలో సాగు చేపట్టి తక్కువ సమయంలోనే ఈత నీరా ఉత్పత్తి చేస్తూ స్థానికంగానే ఉపాధి పొందుతున్నారు. అంతేకాదు ఈ కార్మికులు నీరాకేఫ్‌ను సైతం ప్రారంభించబోతున్నారు. ఇంతకీ ఈ ఈత సాగు ఎలా ఉంటుందో చూడాలంటే జగిత్యాలకు వెళ్లాల్సిందే.
Geeta Workers In Jagtial : జగిత్యాల గ్రామీణ మండలం అంతర్గాం గీత కార్మికులు గ్రామంలో పని లేక పొట్టకూటి కోసం గల్ఫ్కు వలస వెళ్లేవారు. గీత కార్మికులకు వచ్చిన ఆలోచనతో సూక్ష్మ సేద్య పద్ధతిలో ఆరేళ్ల క్రితం 5 ఎకరాల్లో ఈత మొక్కల పెంపకాన్ని మొదలుపెట్టారు. ప్రభుత్వ పథకం కింద తెచ్చుకున్న 5 వేల మొక్కలను తెచ్చి ఇక్కడ నాటారు. సాధారణంగా 10 సంవత్సరాలకు గాని గీతకు రాని చెట్లు.. డ్రిప్‌ పద్ధతిలో నీరు, ఎరువులు అందించడంతో నాలుగేళ్లకే గీతకు వచ్చాయి. దీంతో రెండేళ్లుగా కల్లు గీత గీస్తూ నీరా ఉత్పత్తి చేస్తున్నారు. గ్రామంలోనే కాకుండా సమీపంలోని జగిత్యాల పట్టణ పరిసరాల్లో నీరాను విక్రయిస్తున్నారు.
Neera Production In Jagtial : ఇక్కడ పని దొరక్క గల్ఫ్ దేశాలకు వెళ్లిన కార్మికులు సైతం స్వగ్రామానికి తిరిగొచ్చి ఇక్కడే ఇప్పుడు ఉపాధి పొందుతున్నారు. అయితే ఈత వనం సాగు కోసం స్థానిక నాయకుడు మాకునూరి జితేందర్‌ రావు బీజం పోయగా, స్థానిక ఎమ్మెల్యే డా.సంజయ్‌ కుమార్‌ సహకరించారని వారు చెప్పారు. మొత్తంగా గ్రామంలో 120 పైనే కుటుంబాలకు చెందినవారు రోజుకి 2 నుంచి 3 వేల వరకూ సంపాదిస్తున్నారు. గతంలో చేసేందుకు పనిదొరక్క ఇబ్బంది పడ్డ మాకు పనితో పాటు నాలుగు డబ్బులు వెనకేసుకోగలుగుతున్నామని గీత కార్మికులు ఆనందం వ్యక్తం చేస్తున్నారు.
"మాకు 5 వేల ఈత చెట్లను ప్రభుత్వం ఇచ్చింది. ఆ చెట్లను నాటి నాలుగేళ్ల తర్వాత అవి ఈతకు వచ్చాయి. ఇప్పటికీ రెండు ఏళ్లుగా మేము వాటి నుంచి నీరా తీస్తున్నాం. ఈ నీరాను తీసుకెళ్లి సిటీలో కూడా విక్రయించే ప్రయత్నం చేస్తున్నాం. ప్రభుత్వ తరఫునుంచి సాయం ఏమైనా చేస్తే ఇక్కడే నీరా కేఫ్ పెట్టాలనుకుంటున్నాం. ప్రభుత్వం టెక్నాలజీ పరంగా మాకు హెల్ప్ చేస్తే.. సిటీకి కూడా మేము ఈ నీరాని సరఫరా చేస్తాం". - శ్రీనివాసరావు, గీత కార్మికుడు
తెలంగాణ ప్రభుత్వం కుల వృత్తుల వారిని ప్రోత్సహించేందుకు అనేక సంక్షేమ పథకాలను చేపట్టింది. అలాగే హైదరాబాద్‌ లాంటి మహానగరాల్లో నీరాకేఫ్‌లను ఏర్పాటు చేసి గీత కార్మికులకు ప్రోత్సాహం ఇస్తోంది. నీరాకేఫ్‌లు మంచి ఫలితాన్ని ఇస్తుండడంతో త్వరలో అంతర్గాంలో నీరాకేఫ్‌ ఏర్పాటుకు సన్నాహాలు చేస్తున్నామని వారు అంటున్నారు. నీరాకేఫ్‌ ఏర్పాటు చేస్తే జగిత్యాల పట్టణ ప్రాంత వాసులు వచ్చి ఇక్కడ నీరా తాగి వెళ్తారని గీత కార్మికులు అభిప్రాయం వ్యక్తం చేస్తున్నారు. ప్రభుత్వం తమకు మరింత సహకారం అందిస్తే మరి కొంత మందికి ఉపాధి అవకాశాలు మెరుగు పడతాయని గీత కార్మికులు పేర్కొంటున్నారు.
ఇవీ చదవండి:
