రాష్ట్రంలోనిఅన్ని పురపాలికల్లో వందశాతం పన్నుల వసూళ్లే లక్ష్యంగా అధికారులు చర్యలు చేపట్టారు. ఈ మేరకు పురపాలక శాఖ సంచాలకులు సత్యనారాయణ ఆదేశాలు జారీచేశారు. నగర, పురపాలక సంస్థలకు ప్రధాన ఆదాయవనరైన పన్నులను 100శాతం వసూలుచేయాల్సిందేనని.. ఆ విషయంలో గతంలోనే పలుమార్లు ఆదేశాలు జారీచేసిన విషయాన్ని గుర్తుచేశారు.
100శాతం పన్నువసూలు చేయాల్సిందే
కొన్ని పురపాలికల్లో కనీసం 30శాతం పన్నులు కూడా వసూలు చేయడం లేదని అసంతృప్తి వ్యక్తం చేశారు. ప్రస్తుత వివరాల ప్రకారం రాష్ట్రంలోని పురపాలికల్లో ఆదాయపన్ను ద్వారా రూ. 672 కోట్లు రావాల్సి ఉండగా రూ. 416కోట్లు మాత్రమే వసూలైనట్లు వివరించారు. అన్ని రకాలుగా చూస్తే సగటు పన్నుల వసూలు కేవలం 33 శాతంగా ఉందని సత్యనారాయణ పేర్కొన్నారు. ఇక నుంచి పురపాలక శాఖ మంత్రి పన్నుల వసూలును ఎప్పటికప్పుడు పర్యవేక్షిస్తారని ప్రస్తుత ఆర్థిక సంవత్సరానికి సంబంధించి నెలాఖరు వరకు 100శాతం పన్ను వసూలు చేయాల్సిందేనని స్పష్టంచేశారు.
డిఫాల్టర్లకు ఎస్ఎంఎస్ల జారీ
పన్నుల వసూలుకు ప్రత్యేక బృందాలు ఏర్పాటు చేయడంతోపాటు పన్ను చెల్లించాలంటూ డిఫాల్టర్లకు ఎస్ఎంఎస్లు పంపాలని అధికారులకు సూచించారు. పురపాలికలోని అన్ని విభాగాల అధికారుల్ని ఆ ప్రక్రియలో భాగస్వామ్యుల్ని చేయాలని, ఎక్కువ బకాయిలు ఉన్న వారిపై ప్రత్యేకంగా దృష్టిసారించాలని సూచించారు. అవసరమైతే అధికారులు స్వయంగా బకాయిదార్లతో మాట్లాడాలని ఆదేశించారు. ప్రభుత్వ భవనాల బకాయిలకు సంబంధించి కలెక్టర్లు తగు చర్యలు తీసుకోవాలని సూచించారు. బకాయిదార్లకు నోటీసులు జారీచేయడం, నోటీసు బోర్డుల్లో సహా వైబ్సైట్ల్లోనూ వారి పేర్లు ప్రదర్శించాలని తెలిపారు. బకాయిల వసూలుకు ఏర్పాటు చేసిన ప్రత్యేక బృందాలతో నిత్యం సమీక్షించి రోజువారీ ప్రగతిని వెబ్‌సైట్‌లో నమోదు చేయాలని తెలిపారు. వందశాతం పన్నుల వసూలే లక్ష్యంగా అదనపు కలెక్టర్లు నిత్యం పర్యవేక్షించాలని కోరారు. పన్నులు వసూలు చేయని మున్సిపల్ కమిషనర్లపై చర్యలు తప్పవని సత్యనారాయణ హెచ్చరించారు.
ఇదీ చూడండి: బంగాల్పై భాజపా గురి- దీదీని దించేందుకు పక్కా స్కెచ్
