అల్లు అర్జున్ కథానాయకుడిగా నటించిన 'అల.. వైకుంఠపురములో' చిత్రం సరికొత్త రికార్డును సొంతం చేసుకుంది. తమన్ స్వరాలు అందించిన ఈ సినిమా ఆల్బమ్ తాజాగా 1 బిలియన్ వ్యూస్‌ను దక్కించుకుని యూట్యూబ్లో దూసుకెళ్తోంది. దీంతో చిత్ర నిర్మాణ సంస్థ గీతాఆర్ట్స్‌ సోషల్‌మీడియా వేదికగా సంగీత అభిమానులకు ప్రత్యేకంగా ధన్యవాదాలు తెలిపింది.
"మా ఆల్బమ్‌ను ఇంత పెద్ద సక్సెస్‌ చేసిన సంగీత ప్రియులకు ధన్యవాదాలు. 'అల.. వైకుంఠపురములో' ఆల్బమ్ యూట్యూబ్లో 1 బిలియన్ వ్యూస్‌ను సొంతం చేసుకుని దూసుకెళ్తోంది. నటీనటులు, గాయనీగాయకులు, పాటల రచయితలు, ఇతర చిత్రబృందానికి శుభాకాంక్షలు"
-గీతాఆర్ట్స్‌ ట్వీట్‌
ఈ సినిమాలోని పాటలకు సెలబ్రిటీలు కూడా ఫిదా అవుతున్నారు. ఇప్పటికే బాలీవుడ్‌ నటి శిల్పాశెట్టి 'బుట్టబొమ్మ' సాంగ్‌కు టిక్‌టాక్‌ చేసి అలరించగా.. ఇటీవల అలనాటి తార సిమ్రాన్‌, ఆస్ట్రేలియా క్రికెటర్ డేవిడ్‌ వార్నర్‌, ఇంగ్లాండ్ మాజీ క్రికెటర్ పీటర్సన్ 'బుట్టబొమ్ము' స్టెప్పులతో అలరించారు.
