పాకిస్థాన్లోని బలూచిస్థాన్ రాష్ట్రంలో తెహ్రీక్ ఏ తాలిబన్ పాకిస్థాన్(టీటీపీ) ఉగ్రముఠాకు చెందిన సభ్యుడు (suicide bomber) ఆత్మాహుతి దాడికి పాల్పడ్డాడు(suicide attack in pakistan). ఈ ఘటనలో నలుగురు భద్రతా సిబ్బంది ప్రాణాలు కోల్పోయారు. మరో 20 మంది తీవ్రంగా గాయపడినట్లు అధికారులు తెలిపారు.
రాష్ట్ర రాజధాని క్వెట్టా నగరంలోని మస్టుంగ్ రోడ్ చెక్పాయింట్లోని భద్రతా సిబ్బందే లక్ష్యంగా ఈ దాడి జరిగినట్లు.. నగర డీఐజీ అజార్ అక్రమ్ తెలిపారు. ఆ బలగాలు రాష్ట్రంలోని ఉగ్రవాద నిర్మూలన కోసం పని చేస్తున్నట్లు చెప్పారు. గాయపడిన 20 మందిలో 18 మంది భద్రతా సిబ్బంది కాగా.. ఇద్దరు స్థానికులుగా తెలిపారు. మృతుల సంఖ్య మరింత పెరిగే అవకాశం ఉందన్నారు.
ఈ దాడి చేసింది తామేనని తెహ్రీక్ ఏ తాలిబన్ పాకిస్థాన్ (టీటీపీ) ప్రకటించింది. కాబుల్లో తాలిబన్(Afghanistan Taliban) ప్రభుత్వం వచ్చిన క్రమంలో టీటీపీని అదుపు చేయొచ్చనే పాకిస్థాన్ ఆలోచన సరైంది కాదనే సంకేతాలను పంపేందుకే ఈ దాడికి పాల్పడినట్లు అధికారులు భావిస్తున్నారు.
ఖండించిన ప్రధాని..
భద్రతా బలగాలపై ఆత్మాహుతి(Suicide attack) దాడిని తీవ్రంగా ఖండించారు ప్రధాని ఇమ్రాన్ ఖాన్. దాడిలో ప్రాణాలు కోల్పోయిన జవాన్ల కుటుంబాలకు సంతాపం ప్రకటించారు. క్షతగాత్రులు త్వరగా కోలుకోవాలని ఆకాంక్షించారు. విదేశీ మద్దతుతో చెలరేగుతున్న ఉగ్రవాదుల నుంచి తమ దేశాన్ని కాపాడినందుకు వీర జవాన్లకు సెల్యూట్ చేస్తున్నానన్నారు.
ఇరాక్లో 13 మంది మృతి..
ఉత్తర ఇరాక్లోని కిర్కుక్ ప్రాంతానికి సమీపంలో ఉన్న చెక్పాయింట్పై ఇస్లామిక్ స్టేట్ ఉగ్రవాదులు దాడికి పాల్పడ్డారు. ఈ దాడిలో 13 మంది పోలీసులు ప్రాణాలు కోల్పోయినట్లు స్థానికి మీడియా తెలిపింది. మరో ఐదుగురు తీవ్రంగా గాయపడ్డారు. సటిహా గ్రామంలోని చెక్పాయింట్పై కొందరు సాయుధులు కాల్పులకు పాల్పడ్డారని ఓ అధికారి తెలిపారు. సుమారు ఒక గంట పాటు ఎదురుకాల్పులు జరిగాయని చెప్పారు.
ఇదీ చూడండి: సంబరాల పేరుతో 17 మందిని కాల్చి చంపిన తాలిబన్లు
